ពលករចំណាកស្រុក ត្រូវបានដឹកពីព្រំដែន មកធ្វើចត្តាឡីស័ក តាមស្រុកកំណើតហើយ
- កំពង់ឆ្នាំង
ខេត្តកំពង់ឆ្នាំង៖ ពលករចំណាកស្រុក មកពីប្រទេសថៃ ចំនួន ៣៣នាក់ នៅយប់ថ្ងៃទី២៧ ខែធ្នូ ឆ្នាំ២០២០ ត្រូវបានក្រុមការងារមន្ទីរសុខាភិបាល ខេត្តកំពង់ឆ្នាំង…
ខេត្តកំពង់ឆ្នាំង៖ ពលករចំណាកស្រុក មកពីប្រទេសថៃ ចំនួន ៣៣នាក់ នៅយប់ថ្ងៃទី២៧ ខែធ្នូ ឆ្នាំ២០២០ ត្រូវបានក្រុមការងារមន្ទីរសុខាភិបាល ខេត្តកំពង់ឆ្នាំង…
ខេត្តកំពង់ឆ្នាំង៖ ពលករចំណាកស្រុក មកពីប្រទេសថៃ ចំនួន ៣៣នាក់ នៅយប់ថ្ងៃទី២៧ ខែធ្នូ ឆ្នាំ២០២០ ត្រូវបានក្រុមការងារមន្ទីរសុខាភិបាល ខេត្តកំពង់ឆ្នាំង ទទួលពីក្រុមដឹកជញ្ជូនរបស់កងយោធពលខេមរភូមិន្ទ ដើម្បីដាក់ឲ្យធ្វើចត្តាឡីស័ក រយៈពេល ១៤ថ្ងៃ នៅមណ្ឌលចត្តាឡីស័ក កម្រិត២ នៅក្នុងសាលាគំរូក្រុង។
លោកវេជ្ជបណ្ឌិត ងិន សារ៉េត ប្រធានមណ្ឌលចត្តាឡីស័កកម្រិត ២ សាលាគំរូក្រុង បានបញ្ជាក់ថា នៅយប់ថ្ងៃទី២៧ ខែធ្នូ មណ្ឌលចត្តាឡីស័ក កម្រិត២ សាលាគំរូក្រុង បានទទួលពលករចំណាកស្រុក មកពីប្រទេសថៃ ចំនួន ៣៣នាក់។ បើគិតមកដល់ពេលនេះ ទាំងមុនទាំងក្រោយ មានចំនួនសរុប ៣៦នាក់ ( ស្រី ៧នាក់) ក្នុងនោះ ក៏មានកុមារ ២នាក់ ( ស្រី១នាក់ ) ផងដែរ។
លោកវេជ្ជបណ្ឌិត បានបញ្ជាក់ថា ចំពោះអ្នកមកថ្មី នៅយប់ថ្ងៃទី២៧ ខែធ្នូ គឺបានយកសំណាក និងធ្វើចត្តាឡីស័ក នៅឯព្រំប្រទល់ដែនរួចម្ដងហើយ។ ប៉ុន្តែការមកធ្វើចិត្តាឡីស័ក នៅស្រុកកំណើត នៅពេលនេះ គឺបង្គ្រប់រយៈពេល ១៤ថ្ងៃ។
ជាមួយគ្នានេះ លោកវេជ្ជបណ្ឌិត បន្ថែមថា នៅថ្ងៃទី១៣ នៃការធ្វើចត្តាឡីស័ករបស់ពលករទាំងអស់ នឹងត្រូវមន្ត្រីជំនាញសុខាភិបាល យកសំណាក ទៅពិនិត្យ ជាលើកទី២ ទៀត។ បើឃើញថា ពួកគាត់អវិជ្ជមាន ដូចការធ្វើតេស្ត នៅឯព្រំប្រទល់ដែន នោះពួកគាត់ នឹងបានវិលត្រឡប់ទៅផ្ទះវិញ។
ពលករចំណាកស្រុក ដែលមានទីលំនៅភូមិឃុំច្រេស ស្រុកកំពង់ត្រឡាច ខេត្តកំពង់ឆ្នាំង បានឲ្យដឹងថា គាត់បានចំណាកស្រុកពីប្រទេសថៃ ហើយក៏បានធ្វើចត្តាឡីស័ក នៅឯព្រំប្រទល់ដែនម្ដងរួចហើយ គឺបានរយៈពេល ១០ថ្ងៃ ដោយបានធ្វើសំណាកអវិជ្ជមានទាំងអស់គ្នា។ បន្ទាប់មក ក្រុមការងារ បានបញ្ជូនពួកគាត់ មកដល់ខេត្តកំពង់ឆ្នាំង ដែលជាស្រុកកំណើត ដើម្បីបន្តធ្វើចត្តាឡីស័ក ៤ថ្ងៃទៀត ដើម្បីគម្រប់ ១៤ថ្ងៃ។
ចំពោះការការសម្រាកនៅទីកន្លែងមណ្ឌលចត្តាឡីស័ក ពួកគាត់បានទទួលអាហារគ្រប់គ្រាន់ គឺមួយថ្ងៃ ៣ពេល មានទឹក មានបង្គន់អនាម័យ និងមានកន្លែងស្នាក់នៅត្រឹមត្រូវ។
ពួកគាត់សូមថ្លែងអរគុណដល់រាជរដ្ឋាភិបាល ក៏ដូចជាអាជ្ញាធរខេត្តកំពង់ឆ្នាំង ដែលបានយកចិត្តទុកដាក់ ចំពោះពលករចំណាកស្រុក ដូចរូបគាត់។
គួរបញ្ជាក់ដែរថា សាលាគំរូក្រុង ត្រូវបានមន្ទីរសុខាភិបាល ខេត្តកំពង់ឆ្នាំង ក៏ដូចជាអាជ្ញាធរក្រុង ខេត្ត រៀបចំធ្វើជាកន្លែងសម្រាប់ពលករចំណាកស្រុក មកធ្វើចត្តាឡីស័ក ដោយមានបន្ទប់សម្រាកត្រឹមត្រូវ មានគ្រែ មានទឹក មានភ្លើង រួមទាំងការព័ទ្ធខ្សែការពារ មិនអនុញ្ញាតឱ្យចេញចូល ដោយមានដាក់កម្លាំងប្រចាំការ ឈរការពារទាំងយប់ទាំងថ្ងៃផងដែរ៕ ដោយ៖ ពៅ សុខហ៊ាន
ចែករំលែកព័តមាននេះ