រាជធានីភ្នំពេញ ៖ ក្នុងខែវិឆ្ឆិកា ឆ្នាំ២០២០នេះ ខេត្តព្រះសីហនុទទួលបានភ្ញៀវទេសចរណ៍ជាតិ និងអន្តរជាតិចំនួន១.០១៨.៩២៣នាក់ ថយចុះប្រមាណ៥៤,៣០% ប្រៀបធៀបទៅនឹងឆ្នាំ២០១៩ កន្លងទៅ (នេះបើយោងតាមរបាយការណ៍របស់មន្ទីរទេសចរណ៍ខេត្តព្រះសីហនុ)។ តាមរបាយការណ៍បានបញ្ជាក់ថា ក្នុងចំណោមភ្ញៀវទេសចរណ៍ជាង១លាននាក់នោះ គឺមានភ្ញៀវទេសចរណ៍ជាតិចំនួន៧៩៣.៦០៧នាក់ ថយចុះប្រមាណ៤០,៩៣% ខណដែលភ្ញៀវទេសចរណ៍អន្តរជាតិចំនួន២២៥.៣១៦នាក់ ថយចុះ៧៤,៥៦% ធៀបនឹងឆ្នាំ២០១៩កន្លងទៅ។
ចំពោះភ្ញៀវទេសចរណ៍អន្តរជាតិដែលបានទៅសម្រាកកម្សាន្តនៅខេត្តព្រះសីហនុគេសង្កេតឃើញថា ភ្ញៀវទេសចរណ៍ស្ថិតក្នុងលំដាប់ថ្នាក់លេខ១ មានចំនួន៦៨.៨៩០នាក់ ថយចុះ៨៥,២៤% ខណៈដែលភ្ញៀវមកពីប្រទេសអូស្ត្រាលីស្ថិតក្នុងលំដាប់ថ្នាក់លលេខ២ មានចំនួន៦.៥៤០នាក់ ថយចុះ៦៤,៧៤% និងភ្ញៀវមកពីសហរដ្ឋអាមេរិកមានចំនួន៥.៩៥៣នាក់ ថយចុះ៧៤,១៣% ធៀបឆ្នាំ២០១៩។
ក្រៅពីនោះគឺភ្ញៀវមកពីអង់គ្លេស,បារាំង,អាឡឺម៉ង់,វៀតណាម,កាណាដា,ម៉ាឡេស៊ីនិងឥណ្ឌូនេស៊ី។ ចំណែកភ្ញៀវទេសចរណ៍ដែលទៅសម្រាកកម្សាន្តនៅតាមបណ្តាកោះនានានៅខេត្តព្រះសីហនុមានចំនួនសរុប១២៩.៨៩៩នាក់ ថយចុះ៥១,៣២%ក្នុងនោះភ្ញៀវជាតិចំនួន៦២.៧៩៦នាក់ ថយចុះ១៧,៧៣% ភ្ញៀវអន្តរជាតិចំនួន៦៧.១០៣នាក់ ថយចុះ៦៤,៧៧%ធៀបទៅនឹងឆ្នាំ២០១៩៕ ដោយ ៖ សុខ សារ៉ាយ
ចែករំលែកព័តមាននេះ