ខេត្តប៉ៃលិន៖ ជនសង្ស័យពីរនាក់ ត្រូវបានកម្លាំងនគរបាលអធិការស្រុកសាលាក្រៅ ចាប់ឃាត់ខ្លួន បន្ទាប់ពីមានពាក្យបណ្តឹងរបស់មេការអគារកាស៊ីណូចិន ខណៈពេលបាត់ដែក នៅក្នុងការដ្ឋាន។ ក្រោយពេលស៊ើបអង្កេត ដឹងថាបាត់ដែក មេការនោះ បានដាក់ពាក្យបណ្តឹង ឱ្យនគរបាលឃាត់ខ្លួនទាំងពីរនាក់នោះតែម្តង។ ហេតុការណ៍ចាប់ឃាត់ខ្លួននេះ បានធ្វើឡើង នៅវេលាម៉ោង៨ និង០០នាទីយប់ថ្ងៃពុធ ទី១៦ ខែធ្នូ ឆ្នាំ២០២០ នៅចំណុចអាគារកាស៊ីណូចិន ស្ថិតនៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ជនសង្ស័យទី១- មាន ឈ្មោះ ថា ភាព ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ ទី២. ឈ្មោះ ស្រី សុខ ភេទប្រុស អាយុ៣០ឆ្នាំ ជនជាតិខ្មែរ មុខរបរមិនពិតប្រាកដ។ ទាំងពីរនាក់ស្នាក់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ប្រភពបន្តទៀតថា មុនពេលកើតហេតុ គេឃើញជនសង្ស័យខាងលើ បានចូលទៅលួចយកដែកប្រភេទ ដែកសរសៃ ចំនួន ៣០ដើម និងដែកកញ្ច្រែង សម្រាប់ចាក់បេតុងចំនួន ០១បន្ទះ ដើម្បីទុកលក់អេតចាយ។ លុះមេជាងសង្កេតឃើញថា មានការបាត់ដែក ក៏ប្តឹងនគរបាលឱ្យតាមដាន និងចាប់ឃាត់ខ្លួនតែម្តង។ វត្ថុតាង ជាដែក ត្រូវបានរក្សាទុកនៅប៉ុស្តិ៍នគរបាលរដ្ឋបាលស្ទឹងកាច់។ ចំណែកជនសង្ស័យ ត្រូវបានឃាត់ខ្លួន នៅអធិការដ្ឋាននគរបាលស្រុកសាលាក្រៅ ដើម្បីកសាងសំណុំរឿង បញ្ជូនទៅលើ ឱ្យចាត់ការតាមនីតិវិធី៕ ដោយ ៖ នីយ៉ា
ចែករំលែកព័តមាននេះ