ប្រភពព័ត៌មាននៅសាលាដំបូងរាជធានីភ្នំពេញ ត្រូវបានបង្ហើបឲ្យដឹងថា ដំបូងវេលាម៉ោងប្រហែល៨យប់ថ្ងៃទី១៣ ខែធ្នូ A TAO នឹងមិត្តភក្តិមួយក្រុម មានឈ្មោះ A TU បានទៅផឹកស៊ីនៅហាងចិនមួយ ក្បែរផ្សារតនាផ្លាហ្សា លុះម៉ោងប្រមាណ៩កន្លះ A TU បានចេញទៅមុន ហើយ A TAO បានទូរស័ព្ទហៅ ឈ្មោះ QUI QUI មកផឹកជាមួយ លុះបន្តិចក្រោយមកមានមិត្តភក្តិឈ្មោះ QUI QUI មួយក្រុមទៀតបានជិះម៉ូតូកង់បីមកផឹកស៊ីដែរ ស្រាប់តែប្រហែល១៥ នាទី A TU បានផ្ញើសារតាមទូរស័ព្ទមក A TAO ដោយប្រាប់ថា មានគេចង់ធ្វើបាបវា(A TU)នៅក្នុងខារ៉ាអូខេផ្លាហ្សាបឹងត្របែក។
គ្រាន់តែឮដូច្នោះ A TAO បាននាំឈ្មោះ QUI QUI ស្ត្រីម្នាក់ឡើងជិះរថយន្តទៅផ្ទះ ដើម្បីយកកាំភ្លើងវែងមួយដើមម៉ាកM១៦ ប្រភេទទំនើប និងគ្រាប់២បង់ មាន៥៤គ្រាប់ ដែលជាកាំភ្លើងរបស់ថៅខ្លួន ហើយសំដៅមកកាន់ហាងខារ៉ាអូខេផ្លាហ្សាបឹងត្របែកនោះ ។ នៅពេលទៅដល់ហាងA TAO បានឲ្យស្ត្រីឈ្មោះ ZHANG WEN LI កាន់កាបូបដាក់កាំភ្លើង ហើយគេបានដើរចូលក្នុងហាង តែត្រូវបានសមត្ថកិច្ចចាប់ខ្លួន ដោយជាប់ពាក់ព័ន្ធពីបទ.កាន់កាប់អាវុធខុសច្បាប់។ ក្រោយឃាត់ខ្លួនសមត្ថកិច្ចកងរាជអាវុធហត្ថ បានកសាងសំណុំរឿងបញ្ជូនជនសង្ស័យទាំង៣នាក់ទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់៕ ដោយ ៖ ឃឹម ប៊ុណាក់
ចែករំលែកព័តមាននេះ