EU ចង់ឃើញសភាពិភាក្សាសេចក្តីព្រាងច្បាប់ស្តីពី NGOs មានភាពទូលាយ

ថ្ងៃទី ២៦ ខែ មិថុនា ឆ្នាំ ២០១៥
ម៉ោង ១២:៤៥
sara

រាជធានីភ្នំពេញ ៖ សហគមន៍អឺរ៉ុប (EU) ចង់ឃើញរដ្ឋសភានៃព្រះរាជាណាចក្រកម្ពុជាពិភាក្សាសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ឬហៅថាច្បាប់ NGOs មានភាពទូលាយ ។ នេះបើតាមលើកឡើងរបស់ឯកអគ្គរដ្ឋទូតសហគមន៍អឺរ៉ុបប្រចាំនៅកម្ពុជា ក្នុងជំនួបពិភាក្សាជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា នាព្រឹកថ្ងៃទី ២៥ មិថុនា នៅវិមានរដ្ឋសភា ។

បើតាមការស្រង់សម្តីរបស់ឯកអគ្គរដ្ឋទូតសហគមន៍អឺរ៉ុប លោក កែវ ពិសិដ្ឋ នាយកខុទ្ទកាល័យ និងជាអ្នកនាំពាក្យសម្តេច ហេង សំរិន បានឲ្យដឹងថា លោកឯកអគ្គរដ្ឋទូតលើកឡើងថា ច្បាប់ស្តីពីការគ្រប់គ្រងសមាគម និងអង្គការមិនមែនរដ្ឋាភិបាល ជាច្បាប់មួយមានសារសំខាន់ណាស់ ដែលប្រជាជនកម្ពុជាកំពុងរង់ចាំមើលការរៀបចំពិភាក្សាបានទូលាយកម្រិតណា ហើយបន្ទាប់ពីច្បាប់នេះចេញទៅ គឺមាន ការគាំទ្រច្រើនកម្រិតណា ។ លោកគិតថា រដ្ឋសភានឹងមានការពិភាក្សាដោយទូលំទូលាយ ។

ជាមួយគ្នានោះដែរ តំណាងប្រទេសក្នុងសហគមន៍អឺរ៉ុបសន្យាថា នឹងជួយកម្ពុជាគ្រប់បែបយ៉ាងដើម្បីឲ្យមានការអភិវឌ្ឍលើគ្រប់វិស័យ ក្នុងនោះក៏មានការអភិវឌ្ឍលទ្ធិប្រជាធិបតេយ្យផងដែរ ។ ប៉ុន្តែប្រទេសមួយនេះគួរដោះស្រាយឲ្យចប់នូវភាពរកាំរកូសនៃសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ឬច្បាប់គ្រប់គ្រង NGOs។

លោក ហ្សង់ ហ្វ្រង់ស្វ័រ កូតាំង (Jean-Francois Cautain) ឯកអគ្គរដ្ឋទូតសហគមន៍អឺរ៉ុប ត្រូវចប់អាណត្តិប្រចាំកម្ពុជាបញ្ជាក់ថា «លោកបានស្នើឲ្យរដ្ឋសភាកម្ពុជាបើកកិច្ចពិភាក្សាទៅលើសេចក្តីព្រាងច្បាប់នេះឲ្យបានទូលំទូលាយ ព្រោះច្បាប់នេះមានសារសំខាន់ណាស់ ។ បច្ចុប្បន្ននេះប្រជាជនកម្ពុជាកំពុងតាមដានថា តើរដ្ឋសភារៀបចំការបើកឲ្យមានការពិភាក្សាជាសាធារណៈទូលាយកម្រិតណា ហើយបន្ទាប់ពីច្បាប់ហ្នឹងចេញទៅ ថាតើមានការគាំទ្រកម្រិតណា ?»។

ឯកអគ្គរដ្ឋទូតលើកឡើងទៀតថា ប្រទេសក្នុងសហគមន៍អឺរ៉ុបបានត្រៀមខ្លួនជានិច្ចក្នុងការជួយជ្រោមជ្រែងកម្ពុជាគ្រប់បែបយ៉ាងទាំងផ្នែកនយោបាយ និងសេដ្ឋកិច្ចពាណិជ្ជកម្ម ក្នុងនោះក៏បានបើកទូលាយចំពោះការនាំចូលផលិតផលពីកម្ពុជាដោយមិនជាប់របាំងពាណិជ្ជកម្ម លើកលែងតែការនាំចូលអាវុធ និងប្រភេទទំនិញដែលគ្មានអនាម័យ ហើយខុសស្តង់ដាអឺរ៉ុប ។

លោកគូសបញ្ជាក់ថា ទំនាក់ទំនងរវាងកម្ពុជា និងសហគមន៍អឺរ៉ុបមានរយៈពេលជាង២០ឆ្នាំមកហើយ ហើយសហគមន៍នេះគឺជាទីផ្សារធំរបស់កម្ពុជា ។ ទំនាក់ទំនងពាណិជ្ជកម្មទ្វេភាគីនេះមានភាពល្អប្រសើរ បើទោះបីជាមិនទាន់សមាមាត្រនឹងគ្នាក៏ដោយ ។

សម្តេចពញាចក្រី ហេង សំរិន បានចាត់ទុកប្រទេសសហគមន៍អឺរ៉ុបជាដៃគូអភិវឌ្ឍន៍ដ៏មានសារសំខាន់របស់កម្ពុជា ។ សម្តេចមានប្រសាសន៍ថា ទំនាក់ទំនងរវាងសហគមន៍ និងកម្ពុជាបានវិវត្តន៍គួរកត់សម្គាល់ ។ ចំពោះសេចក្តីព្រាងច្បាប់ដែលកំពុងមានភាពរកាំរកូសរវាងរាជរដ្ឋាភិបាល និងអង្គការសង្គមស៊ីវិលនេះ ត្រូវបានសម្តេចប្រធានរដ្ឋសភាបញ្ជាក់ថា គណៈកម្មាធិការអចិន្ត្រៃយ៍រដ្ឋសភាបានប្រគល់សេចក្តីព្រាងច្បាប់នេះឲ្យទៅគណៈកម្មការជំនាញរដ្ឋសភាមាន គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន ដោយសហការជាមួយគណៈកម្មការមហាផ្ទៃ ការពារជាតិ និងមុខងារសាធារណៈ និងគណៈកម្មការនីតិកម្ម និងយុត្តិធម៌របស់រដ្ឋសភាធ្វើការសិក្សា និងពិនិត្យតាមនីតិវិធីជាមុនសិន បន្ទាប់មកនឹងបើកឲ្យមានកិច្ចពិគ្រោះយោបល់ជាមួយអង្គការសង្គមស៊ីវិល និងអង្គទូតនានា មុននឹងដាក់ជូនអង្គរដ្ឋសភាពិភាក្សា និងអនុម័ត ។

ជាមួយគ្នានោះដែរ សម្តេចក៏បានវាយតម្លៃខ្ពស់ចំពោះបេសកកម្មការទូតរបស់លោក ដែលរួមចំណែកយ៉ាងសំខាន់ក្នុងការពង្រឹងទំនាក់ទំនងកិច្ចសហប្រតិបត្តិការរវាងកម្ពុជា ជាមួយនឹងបណ្តាប្រទេសក្នុងសហគមន៍អឺរ៉ុប ទាំងវិស័យនយោបាយ ការទូត ពាណិជ្ជកម្ម អប់រំ វប្បធម៌ ទេសចរណ៍ និងបណ្តាវិស័យផ្សេងដទៃទៀត។ ជាពិសេសចូលរួមចំណែកនៅក្នុងការអភិវឌ្ឍលើគ្រប់វិស័យនៅកម្ពុជា ។

សម្តេចបន្ថែមថា ប្រទេសនៅសហគមន៍អឺរ៉ុប គឺជាប្រទេសដៃគូអភិវឌ្ឍន៍ដ៏មានសារសំខាន់របស់កម្ពុជា ។ ពាក់ព័ន្ធនឹងនយោបាយនាំចេញពីកម្ពុជាទៅ EU សម្តេចមានប្រសាសន៍ថា ដោយប្រព័ន្ធ (GSP) ដែលបណ្តាប្រទេសនៅសហគមន៍អឺរ៉ុបនាំចេញមកកម្ពុជា គឺមានទំហំពាណិជ្ជកម្មមានកំណើនខ្ពស់ ។ សម្តេចក៏បានសំណូមពរឱ្យបណ្តាប្រទេសនៅសហគមន៍អឺរ៉ុប បើកទូលាយបន្ថែមទៀតសម្រាប់ផលិតផល ក៏ដូចជាកសិផលពីកម្ពុជាទៅសហគមន៍អឺរ៉ុប ដោយមិនមានជាប់របាំងពាណិជ្ជកម្ម ។

ជាមួយគ្នានេះ សម្តេចលើកឡើងថា សម្រាប់អាណត្តិរដ្ឋសភានីតិកាលទី៥នេះ យើងបានធ្វើកំណែទម្រង់យ៉ាងច្រើនដូចជា ៖

១-មានការចូលរួមក្នុងក្បាលម៉ាស៊ីនដឹកនាំរបស់គណបក្សប្រឆាំង ។

២-ធ្វើវិសោធនកម្មច្បាប់សំខាន់នានាជាច្រើន រួមទាំងការធ្វើកំណែទម្រង់ (គជប) និងច្បាប់បោះឆ្នោត ។ សំខាន់មួយទៀត គណបក្សទាំងពីរក៏បានបង្កើតឡើងនូវវប្បធម៌សន្ទនា ដែលនេះជាគន្លឹះមួយដើម្បីដោះស្រាយនូវបញ្ហានានាដែលមិនយល់គ្នារវាងគណបក្សទាំងពីរ គឺគណបក្សដឹកនាំរដ្ឋាភិបាល និងគណបក្សក្រៅរដ្ឋាភិបាល ។

ឆ្លើយតបនឹងការស្នើសុំរបស់សម្តេចប្រធានរដ្ឋសភាឱ្យបណ្តាប្រទេសនៅសហគមន៍អឺរ៉ុបបើកទូលាយបន្ថែមចំពោះទំនិញផលិតផល និងកសិផលពីកម្ពុជាទៅអឺរ៉ុបនោះ លោក ហ្សង់ហ្វ្រង់ស្វ័រ កូតាំង មានប្រសាសន៍ថា សម្រាប់ទំនិញរបស់កម្ពុជា សហគមន៍អឺរ៉ុបបានបើកជាទូលាយដោយមិនមានរបាំងពាណិជ្ជកម្មអ្វីទេ លើកលែងតែនាំចូលអាវុធ និងប្រភេទទំនិញដែលមិនមានអនាម័យ និងខុសស្តង់ដា ។

គួររំឭកថា ទាក់ទិននឹងសេចក្តីព្រាងច្បាប់NGOs កាលពីពេលកន្លងមកនេះ ក្រុមអង្គការ សង្គមស៊ីវិល បណ្តាញសមាគម និងសហគមន៍ បាននាំគ្នាទៅតវ៉ានៅមុខរដ្ឋសភា ដោយសុំកុំឲ្យរដ្ឋសភាអនុម័តសេចក្តីព្រាងច្បាប់ដែលកំពុងមានភាពចម្រូងចម្រាស់មួយនេះ ។ ជាមួយគ្នា នេះ អ្នកតំណាងរាស្ត្រ ក្នុងគណបក្សដែលមានសំឡេងតិចក្នុងរដ្ឋសភាបានព្រមានថា ក្រុមរបស់ខ្លួនដែលមានគ្នា៥៥នាក់នឹងធ្វើពហិការមិនចូលប្រជុំពេញអង្គរដ្ឋសភាសម្រាប់ការអនុម័តសេចក្តីព្រាងច្បាប់ដែលមិនមានការកែប្រែនេះឡើយ ។ ជាងនេះទៀត លោក សម រង្ស៊ី ប្រធានគណបក្សសង្គ្រោះជាតិ និងជាប្រធាន ក្រុមតំណាងរាស្ត្រភាគតិចក្នុងរដ្ឋសភា នឹងជួបពិភាក្សាជាមួយសម្តេចតេជោ ហ៊ុន សែន ដើម្បីជជែកពីសេចក្តីព្រាងច្បាប់ NGOs នេះ ។

បច្ចុប្បន្ន នៅកម្ពុជាមានសមាគម និងអង្គការមិនមែនរដ្ឋាភិបាលជិត៤.០០០ ក្នុងនោះមានសមាគម និងអង្គការអន្តរជាតិជាង៤០០ ដែលបានចុះបញ្ជីនៅក្រសួងការបរទេស ៕