ខេត្តមណ្ឌលគិរី៖ ដីព្រៃមួយកន្លែងក្នុងភូមិពូត្រែង ឃុំដាក់ដាំ ស្រុកអូររាំង ត្រូវបានកម្លាំងជំនាញចុះបង្ក្រាបតាមបញ្ជារបស់អភិបាលស្រុកអូររាំង ក្រោយមានការជូនដំណឹងពីប្រជាពលរដ្ឋ ដោយករណីនេះគឺមានគម្របព្រៃឈើជាច្រើនហិកតា ត្រូវបានគេឈូសឆាយដួលរៀបដល់ដី ដោយប្រើប្រាស់គ្រឿងចក្រ កាលពីថ្ងៃទី១៣…
ខេត្តមណ្ឌលគិរី៖ ដីព្រៃមួយកន្លែងក្នុងភូមិពូត្រែង ឃុំដាក់ដាំ ស្រុកអូររាំង ត្រូវបានកម្លាំងជំនាញចុះបង្ក្រាបតាមបញ្ជារបស់អភិបាលស្រុកអូររាំង ក្រោយមានការជូនដំណឹងពីប្រជាពលរដ្ឋ ដោយករណីនេះគឺមានគម្របព្រៃឈើជាច្រើនហិកតា ត្រូវបានគេឈូសឆាយដួលរៀបដល់ដី ដោយប្រើប្រាស់គ្រឿងចក្រ កាលពីថ្ងៃទី១៣ ធ្នូ ២០២០។
លោក សៀក មុន្នី អភិបាលស្រុកអូររាំងបានឲ្យដឹងថា ក្រោយទទួលបានដំណឹងនៃការឈូសឆាយដីព្រៃនេះភ្លាម លោកបញ្ជាឲ្យកម្លាំងនគរបាលមូលដ្ឋានចុះបង្ក្រាបភ្លាមផងដែរ ហើយក្នុងករណីនេះកម្លាំងនគរបាលនឹងប្រគល់ឲ្យមន្ត្រី ជំនាញព្រៃឈើចាត់ការបន្តតាមច្បាប់ ។
យោងតាមប្រភពនិងរបាយការណ៍របស់មន្ត្រីជំនាញ តាមការពិនិត្យជាក់ស្ដែងលើទីតាំងដីមិនមានដំណាំអ្វីឡើយ ឃើញមានតែស្នាមឈូសដី និងផ្តួលដើមឈើថ្មីៗដោយប្រើកម្លាំងគ្រឿងចក្រ ដែលជុំវិញទីតាំងដីគឺសុទ្ធតែជាព្រៃស្រោង ។
តាមការស៊ើបសួររបស់មន្ត្រីផ្នែករដ្ឋបាលព្រៃឈើកែវសីមា បានប្រាប់ថា ដីដែលបានឈូសឆាយខាងលើមានទំហំប្រមាណ៤,៥ហិកតា និងជាកម្មសិទ្ធិរបស់ឈ្មោះ គឹម យ៉ារ័ក្ស ភេទប្រុស អាយុ៣៩ឆ្នាំ ជនជាតិខ្មែរ មានទីលំនៅបច្ចុប្បន្នភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី បានយកអេស្កាវ៉ាទ័រចំនួន០១គ្រឿង ដើម្បីឈូសឆាយដីព្រៃខាងលើ ដែលមានអ្នកបើកបរឈ្មោះ តាន់ ធារ៉ា ត្រូវបានកម្លាំងនគរបាលចាប់ឃាត់យកមករក្សាទុកនៅប៉ុស្តិ៍នគរបាលរដ្ឋបាលដាក់ដាំ ដោយមានការចង្អុលបង្ហាញពីតំណាងអយ្យការអមសាលាដំបូងខេត្តមណ្ឌលគិរី អោយសមត្ថកិច្ចនគរបាលប្រគល់ជនសង្ស័យ និងវត្ថុតាងខាងលើជូនសមត្ថកិច្ចមន្ទីរបរិស្ថានខេត្តមណ្ឌលគិរី ដើម្បីក៏សាងសំណុំរឿងតាមនីតិវិធី។
លោក កែវ សុភក៌ ប្រធានមន្ទីរបរិស្ថានខេត្តមណ្ឌលគិរីបានឲ្យដឹងនៅល្ងាចថ្ងៃទី១៣ធ្នូនេះថា សំណុំរឿងនេះមន្ត្រី ជំនាញកំពុងស្រាវជ្រាវបន្តថាតើ ម្ចាស់ដី ឬម្ចាស់គ្រឿងចក្រ មានច្បាប់អនុញ្ញាតឈូសឆាយព្រៃឬអត់ ដើម្បីកសាងសំណុំ រឿងបញ្ជូនទៅតុលាការ ។ លោកបញ្ជាក់ថា មនុស្ស០១នាក់ដែលបានឃាត់ខ្លួន ត្រូវបានធ្វើកិច្ចសន្យាឲ្យត្រឡប់ទៅវិញ ចំណែកវត្ថុតាងគ្រឿងចក្រ គឺកំពុងរក្សាទុកនៅប៉ុស្តិ៍រដ្ឋបាលឃុំដាក់ដាំ ។
បើតាមប្រភពលួចបង្ហើបថា ករណីនេះម្ចាស់គ្រឿងឈូសឆាយព្រៃកំពុងរត់ការឲ្យដោះ លែងយកគ្រឿងចក្រមកវិញ ឬសម្រាលបទល្មើសដែលបានប្រព្រឹត្ត ហើយចំពោះបទល្មើសមួយនេះបើតាម មន្ត្រីជំនាញព្រៃឈើបានបង្ហើប គឺជាបទល្មើសឈូសឆាយដីព្រៃធ្វើជាកម្មសិទ្ធិ មានទោសមិនស្រាលនោះទេ៕
ចែករំលែកព័តមាននេះ