ខេត្ដកណាល ៖ ក្រោយពីសារព័ត៌មានកោះសន្ដិភាពលេខ៦៩១៥ ចេញផ្សាយថ្ងៃទី២៣ ខែមីនា ឆ្នាំ២០១០ មានចំណងជើងថា “កុមារកំព្រា៦នាក់បងប្អូនកំពុងស្រេកឃ្លានអាហារ” រួចមក ធ្វើឱ្យមជ្ឈដ្ឋានមហាជនមានការអាណិតអាសូរយ៉ាងខ្លាំងដល់ពួកគេដែល រស់គ្មានមេបាគ្រប់គ្រង និងមិនបានរៀនសូត្រ គឺរស់នៅក្នុងខ្ទមជរាត្រមង់ត្រមោចទាំង៦នាក់បងប្អូន ខ្វះភាពកក់ក្ដៅ ហើយសូម្បីតែអាហារក៏ពុំមានហូបគ្រប់គ្រាន់ផងនោះ ។
ដោយមានសន្ដានចិត្ដអាណិតអាសូរចំពោះជីវិតកំព្រានេះ មានសប្បុរសជនជាច្រើនបាននាំយកអំណោយទៅចែកជូនកុមារកំព្រាទាំង៦នាក់នោះដល់លំនៅឋាន ដែលមានជាគ្រឿងឧបភោគបរិភោគ សំភារប្រើប្រាស់ និងថវិកាមួយចំនួន។ ស្របពេលដែលសប្បុរសជនយកអំណោយទៅឱ្យនោះកុមារកំព្រាទាំង៦នាក់នោះ ក៏ត្រូវបានខាងអាជ្ញាធរស្រុកស្អាងនាំយកទៅឱ្យរស់នៅក្នុងមណ្ឌលកុមារកំព្រាឈ្មោះ “ ភូមិកុមារ អរុណរះ ” ដែលស្ថិតនៅឯទួលក្រសាំងដែរ។ សប្បុរសជនដែលបាននាំយកអំណោយទៅឱ្យកុមារកំព្រាដោយផ្ទាល់នោះរួមមាន
១-លោកឧកញ៉ា ជា សឿន ទីប្រឹក្សាសម្ដេចអគ្គមហាធម្មពោធិសាល ជា ស៊ីម និងជាមេបញ្ជាការរងកងពលតូចលេខ៧០ បានផ្ដល់ថវិកាចំនួន៥០ម៉ឺនរៀល, អង្ករ៥០គីឡូក្រាម, មី២កេស, ទឹកត្រី២យួរ, ទឹកស៊ីអ៊ីវ២យួរ, ត្រីខកំប៉ុង៤ឡូ, ប្រេងឆា៤លីត្រ, កន្ទេលជ័រ២, ទឹកបរិសុទ្ធ១០យួរ, សំភារផ្ទះបាយមួយសំរាប់, នំធុងមួយធុង និងនំចាហួយ មួយប្រអប់។
២-លោកឡាយ ចាន់ឌី ភ្នាក់ ងារសារព័ត៌មានកំណើតថ្មី នៅខេត្ដស្ទឹងត្រែង បានជួយឧបត្ថម្ភថវិកា២០ម៉ឺនរៀល, អង្ករ១០០គីឡូក្រាម, មី៤កេស, ទឹកត្រី១យួរ, ទឹកស៊ីអ៊ីវ១យួរ, អំបិល១គីឡូក្រាម, ប៊ីចេង១គីឡូក្រាម ។ សូមបញ្ជាក់ថា អំណោយទាំងនេះ ត្រូវបានចាត់ចែងពាក់កណ្ដាលទុកឱ្យឪពុកមារបស់កុមារកំព្រាទាំង៦នាក់ ដែលមានកូន៨នាក់ក្នុងបន្ទុក សំរាប់ធ្វើបុណ្យជូនដល់សពឪពុកម្ដាយរបស់ពួកគេដែលបានស្លាប់ចោលទៅនោះ។ ចំណែកពាក់កណ្ដាលទៀតយកទៅប្រគល់ជូនអ្នកគ្រប់គ្រងមណ្ឌលកុមារអរុណរះទុកសំរាប់ឧបត្ថម្ភដល់កុមារកំព្រាទាំង៦នាក់នោះ។
៣-លោកខឹម ច័ន្ទគីរី អភិបាលស្រុកស្អាងបានជួយឧបត្ថម្ភអង្ករ៥០គីឡូក្រាម ។
៤-មន្ទីរសង្គមកិច្ចខេត្ដកណ្ដាល បានជួយឧបត្ថម្ភថវិកា១០ម៉ឺនរៀល, អង្ករ៥០គីឡូក្រាម, មី២កេស, ប៊ីចេងកន្លះគីឡូក្រាម, អំបិល១គីឡូក្រាម, ទឹកត្រី៣ដប, ទឹកស៊ីអ៊ីវ៣ដប, សាច់ជ្រូក១គីឡូក្រាម និងបន្លែសំរាប់ស្លមួយចំនួនទៀត ។
នៅវេលារសៀលនៃថ្ងៃដដែលនោះ លោកឌួង លាង តំណាងឯកឧត្ដមស៊ាន បូរ៉ាត ទីប្រឹក្សាផ្ទាល់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងជាប្រធានគណៈពង្រឹងមូលដ្ឋានឃុំកោះខែល ស្រុកស្អាង បាននាំយកអំណោយជាថវិកាចំនួន៥០ម៉ឺនរៀល, អង្ករ១០០គីឡូក្រាម, ចាន-ឆ្នាំង, ទឹកត្រី ទឹកស៊ីអ៊ីវ មុងកន្ទេល សម្លៀកបំពាក់មួយចំនួនដែលសរុបជាថវិកាអស់ចំនួន៥០ម៉ឺនរៀលទៀត។ អំណោយទាំងនេះត្រូវបានយកទៅប្រគល់ឱ្យខាងអ្នកគ្រប់គ្រងមណ្ឌលកុមារអរុណរះ។
លោកឌួង លាង បានមានប្រសាសន៍ថា តាមពិតអំណោយទាំងអស់នេះគឺលោកមានបំណងយកទៅប្រគល់ឱ្យកុមារកំព្រា៦នាក់ នៅឯភូមិកំណើតឯណោះទេ តែដោយកុមារទាំងនោះបានមករស់នៅក្នុងមណ្ឌល ទើបប្រគល់ឱ្យខាងមណ្ឌលចាត់ចែងតែម្ដង។ លោកមានប្រសាសន៍ទៀតថា អំណោយទាំងនេះគឺស្ដែងចេញពីទឹកចិត្ដរបស់គណបក្សប្រជាជនកម្ពុជាដែលធ្លាប់អះអាងថា មិនទុកឱ្យប្រជាពលរដ្ឋណាម្នាក់ស្លាប់ដោយសារការអត់បាយនោះឡើយ។ លោកក៏បានផ្ដាំផ្ញើដល់កុមារនៅក្នុងមណ្ឌលទាំងអស់ឱ្យខិតខំរៀនសូត្រ ជាពិសេសស្ដាប់ការណែនាំរបស់លោកគ្រូ អ្នកគ្រូ ដើម្បីធ្វើខ្លួនឱ្យក្លាយទៅជាកូនល្អ សិស្សល្អ ។
ជាមួយនឹងទឹកចិត្ដដ៏ថ្លៃថ្លារបស់សប្បុរសជនទាំងអស់ កុមារកំព្រាទាំង៦នាក់ ពិសេសឪពុកមារបស់ពួកគេបានថ្លែងអំណរគុណយ៉ាងជ្រាលជ្រៅ និងសប្បាយរីករាយឥតឧបមាដែលឃើញសប្បុរសជនទាំងអស់ បានជួយសង្ក្រោះក្មួយៗរបស់គាត់ឱ្យរួចផុតពីភាពអត់ឃ្លាន ហើយសំខាន់បំផុតនោះ គឺពួកគេបានទៅនៅក្នុងមណ្ឌលកុមារកំព្រា ដោយមានការអប់រំនិងការចិញ្ចឹមបីបាច់ថែរក្សាយ៉ាងយកចិត្ដទុកដាក់ដែលពីមុនមកពួកគេមិនដែលធ្លាប់បានទទួលឡើយ។ ទន្ទឹមនឹងនេះដែរ លោកក៏មិនភ្លេចថ្លែងអំណរគុណដល់សារព័ត៌មានកោះសន្ដិភាពដែលបានជួយចុះផ្សាយជូនដំណឹងដល់សប្បុរសជនរហូតទទួលបានអំណោយដ៏ច្រើនសន្ធឹកសន្ធាប់នេះ។ សូមជូនពរដល់សប្បុរសជនទាំងអស់ឱ្យជួបប្រទះតែនឹងសេចក្ដីសុខ-ចំរើន កុំបីឃ្លៀងឃ្លាតឡើយ ។
សូមបញ្ជាក់ជូនថា អំណោយនៅមានច្រើនទៀតដែលយើងនឹងធ្វើការចុះផ្សាយជាបន្ដបន្ទាប់។
ចែករំលែកព័តមាននេះ