យល់ដឹងពីគន្លឹះ6យ៉ាង ដើម្បីសុខភាពផ្លូវចិត្តល្អ
- ភ្នំពេញ
រាជធានីភ្នំពេញ ៖ លោកអ្នកប្រហែលជាបានដឹងច្រើនហើយអំពីវិធីសាស្ត្រក្នុងការថែទាំសុខភាព តាមរយៈអត្ថបទ និងវីដេអូអប់រំសុខភាពរបស់មន្ទីរពេទ្យកាល់ម៉ែត ។ ពេលនេះ យើងខ្ញុំសូមលើកយកមកចែកជូនលោកអ្នកនូវគន្លឹះល្អៗចំនួន៦យ៉ាង ដែលលោកអ្នកអាចយកទៅអនុវត្តដើម្បីទទួលបាននូវសុខភាពផ្លូវចិត្តល្អ។ នេះបើតាមការឲ្យដឹងពីលោកវេជ្ជបណ្ឌិត ទួន សុវណ្ណរិទ្ធិ ឯកទេសវិកលវិទ្យានៃមន្ទីរពេទ្យកាល់ម៉ែត ។
លោកវេជ្ជបណ្ឌិត ទួន សុវណ្ណរិទ្ធិ បានបញ្ជាក់ថា៖ គន្លឹះល្អៗចំនួន៦យ៉ាង ដែលលោកអ្នកអាចយកទៅអនុវត្តដើម្បីទទួលបាននូវសុខភាពផ្លូវចិត្តល្អគឺមាន ៖
ទី១-យកចិត្តទុកដាក់ចំពោះរបបអាហារ។ ពិតណាស់ របបអាហារក៏ជះឥទ្ធិពលដល់សុខភាពផ្លូវចិត្តផងដែរ ។ ការបរិភោគអាហារទៀងពេលសមស្រប និងសម្បូរបែបក៏ជួយឲ្យសុខភាពផ្លូវចិត្តមានភាពល្អប្រសើរដែរ។ ម្យ៉ាងទៀត សូមចៀសវាងសារធាតុញៀន ជាតិស្រវឹង ឬភេសជ្ជៈប៉ូវកម្លាំងមួយចំនួនដែលអាចភ្ញោចឲ្យខួរក្បាលយើងដំណើរការមិនល្អ ងាយមានជំងឺផ្លូវចិត្ត ។
ទី២-ធ្វើសកម្មភាពរាងកាយឲ្យច្រើន ។ ការធ្វើសកម្មភាពរាងកាយឲ្យច្រើនដូចជាការដើរ ឬហាត់ប្រាណជាដើមជួយឲ្យបន្ថយភាពតានតឹងចិត្ត បញ្ចេញជាតិពុល ហើយជួយឲ្យយើងមានអារម្មណ៍ល្អ ។
ទី៣-ដើរហាត់ប្រាណជាមួយគ្រួសារ ឬមិត្តភក្តិការ ។ ដើរហាត់ប្រាណជាមួយគ្រួសារ ឬមិត្តភក្តិ ក្រៅពីជួយដល់ការកាត់បន្ថយភាពតានតឹងចិត្ត និងបញ្ចេញជាតិពុលហើយ ហើយក៏បង្កើនភាពស្និទ្ធស្នាល ហើយជួយឲ្យកាន់តែមានអារម្មណ៍កក់ក្ដៅ ។
ទី៤-សម្រាន្តឲ្យបានគ្រប់គ្រាន់ ។ ទាំងកាយទាំងចិត្តយើងសុទ្ធតែត្រូវការការសម្រាក ។ យកល្អយើងគួរគេងឲ្យបាន៨ម៉ោងក្នុងមួយថ្ងៃ ដើម្បីឲ្យខួរក្បាលយើងមានភាពស្រស់ស្រាយ និងអាចបន្តដំណើរការយ៉ាងល្អនៅថ្ងៃស្អែក ។
ទី៥-ចែករំលែកពីអារម្មណ៍ខ្លួនឯងជាមួយមនុស្សជាទីទុកចិត្ត ។ ការចែករំលែកពីអារម្មណ៍ខ្លួនឯង អាចរាប់ថាជាតម្រូវការមូលដ្ឋានសម្រាប់សុខភាពផ្លូវចិត្ត ។ សូមស្វែងរកមនុស្សជាទីទុកចិត្ត ហើយរៀនពីរបៀបចែករំលែកអារម្មណ៍ខ្លួនឯង ដែលមានលក្ខណៈសាមញ្ញៗ ទាំងអារម្មណ៍ល្អ និងអារម្មណ៍មិនល្អ នោះដល់ពេលមានរឿងធំ យើងក៏អាចចែករំលែកបានដូចគ្នា ។
និងទី៦-ពិភាក្សាជាមួយវេជ្ជបណ្ឌិតឯកទេសផ្លូវចិត្តប្រាកដណាស់ លោកអ្នកក៏អាចជួបពិភាក្សាជាមួយវេជ្ជបណ្ឌិតឯកទេសផ្លូវចិត្តដើម្បីទទួលបានការវាយតម្លៃ ព្យាបាល និងដំបូន្មានល្អៗទាក់ទងនឹងបញ្ហាសុខភាពផ្លូវចិត្ត ក្នុងករណីចាំបាច់ ។
លោកវេជ្ជបណ្ឌិត ទួន សុវណ្ណរិទ្ធិ ឯកទេសវិកលវិទ្យានៃមន្ទីរពេទ្យកាល់ម៉ែតក៏បានសំណូមថា៖ ប្រសិនបើលោកអ្នកចង់ទទួលបានការព្យាបាលប្រកបដោយប្រសិទ្ធភាព និងដំបូន្មានល្អៗសម្រាប់បញ្ហាសុខភាពផ្លូវចិត្ត សូមអញ្ជើញមកជួបផ្ទាល់ជាមួយក្រុមវេជ្ជបណ្ឌិតឯកទេសនៅមន្ទីរពេទ្យកាល់ម៉ែត ៕
ចែករំលែកព័តមាននេះ