រាជធានីភ្នំពេញ ៖ ខ្មែរមានពាក្យស្លោកដ៏មានប្រជាប្រិយភាពមួយដែលដំណាលមកតគ្នាជាច្រើនជំនាន់មកហើយ៖ «ទីណាមានទឹក ទីនោះមានត្រី»។ ជាអកុសលក្នុងអំឡុង៥ឆ្នាំចុងក្រោយនេះ មានអ្នកនេសាទជាច្រើនបានត្អូញត្អែរថា គាត់ចាប់សំរាមបានច្រើនជាងចាប់ត្រី នេះបើយោងតាមករបាយការណ៍របស់ គម្រោងអច្ឆរិយភាពនៃទន្លេមេគង្គ (Wonders of the Mekong) បានឱ្យដឹងនៅថ្ងៃទី ០៨ ខែ ធ្នូ ឆ្នាំ ២០២០នេះ។
គម្រោងអច្ឆរិយភាពនៃទន្លេមេគង្គ បានបន្តថា មានសំរាមជាច្រើនប្រភេទដែលអ្នកនេសាទចាប់បានពីក្នុងទឹកទន្លេជាមួយនឹងត្រីបន្តិចបន្តួច។ នៅពេលកំណើនប្រជាពលរដ្ឋកើនឡើងខ្ពស់ ស្របពេលជាមួយគ្នានោះដែរ សំរាមក៏កើនឡើងយ៉ាងគំហុកផងដែរ ពិសេសកាកសំណល់ប្លាស្ទិក ។ គ្រួសារដែលរស់នៅតាមដងទន្លេមួយចំនួនសម្រេចចិត្តបោះសំរាមចោលទៅក្នុងទឹកទន្លេ។ ពួកគាត់ប្រហែលជាមិនបានដឹងទេថា សំរាមប្រចាំថ្ងៃដែលបានលិចចូលក្នុងទឹកទន្លេ មិនបានចេញទៅណាឆ្ងាយពីផ្ទះរបស់គាត់ ឬពីជីវិតរស់នៅរបស់គាត់ទេ វាបានលិចចុះទៅក្នុងទឹក ទាក់ជាប់ត្រី និងសម្លាប់ត្រីដែលជាអាហារដ៏សំខាន់របស់ប្រជាជនខ្មែរយើងដោយមិនដឹងខ្លួន។ រូបថតទាំងអស់នេះ ថតបានពីចំណុចទន្លេសាប ក្នុងភូមិសាស្ត្រសង្កាត់ព្រែកតាសេក ខណ្ឌជ្រោយចង្វារ ក្រុងភ្នំពេញ វាបានបង្ហាញអំពីសំរាមដែលអ្នកនេសាទចាប់បានពីក្នុងទន្លេជាមួយនឹងត្រីមួយចំនួន ហើយត្រីខ្លះអាចត្រូវបានសម្លាប់ដោយសំរាមទាំងនេះ។
គម្រោងអច្ឆរិយភាពនៃទន្លេមេគង្គ បន្ថែមថា «សូមមេត្តាពិចារណាឡើងវិញដោយជ្រើសរើសយកនូវជម្រើសដទៃផ្សេងទៀត ដូចជាការទុកដាក់សំរាមនៅក្នុងផ្ទះមុនពេលភ្នាក់ងារសំរាមមកប្រមូល បែងចែកសំរាមឱ្យបានត្រឹមត្រូវ កាត់បន្ថយការប្រើប្រាស់សម្ភារច្នៃពីប្លាស្ទិក ឬជម្រើសប្រើប្រាស់សម្ភារធ្វើពីប្លាស្ទិកឡើងវិញតាមដែលអាចធ្វើទៅបាន កែច្នៃសំរាមដែលងាយរលួយទៅជាជីកំប៉ុស្ត។ល។ យើងទាំងអស់គ្នាអាចជាចំណែកមួយនៃដំណោះស្រាយនៃបញ្ហាទាំងអស់នេះ។ យើងអាចធ្វើការរួមគ្នាថែរក្សាទន្លេរបស់យើងឱ្យមានសុខភាពល្អ និងដើម្បីធានានូវប្រភពអាហារប្រូតេអ៊ីនខ្ពស់របស់យើងឱ្យបានស្ថិតស្ថេរសម្រាប់ពេលអនាគត»។
សូមជម្រាបជូនថា គម្រោងអច្ឆរិយភាពនៃទន្លេមេគង្គ គឺជាគម្រោងមួយ ដែលមានគោលបំណងបង្កើនការយល់ដឹង ការកោតសរសើរ និងសមត្ថភាព ក្នុងការគ្រប់គ្រងមុខងារផ្សេងៗនិងសុខមាលភាពនៃទន្លេមេគង្គ សម្រាប់ត្រីសត្វព្រៃ និងមនុស្ស។
គម្រោងនេះក៏ព្យាយាមបញ្ជាក់ពីតម្លៃអភិរក្ស សេវាកម្មអេកូឡូស៊ី ជម្រកមរតកវប្បធម៌ និងជីវចម្រុះរបស់ទន្លេមេគង្គផងដែរ។ គោលដៅទាំងនេះនឹងត្រូវបានសម្រេចតាមរយៈការស្រាវជ្រាវ ការកសាងសមត្ថភាព និងទំនាក់ទំនង។ គម្រោងនេះ ក៏មានដៃគូរសហការ អង្គការមួយចំនួនផងដែរ បូករួមទាំង វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាបដោយគម្រោងនេះបានដឹកនាំដោយ សាកលវិទ្យាល័ Nevada Global Water Center ដោយមានការគាំទ្រពី USAID ៕
ចែករំលែកព័តមាននេះ