រាជធានីភ្នំពេញ ៖ ករណីអគ្គិភ័យមួយបានឆាបឆេះឡើងនៅក្នុងភោជនីយដ្ឋានយីហោ«យ៉ាឃួន កាយ៉ា ថូស» ក្បែរភ្លើងស្តុបផ្សារកាប់គោ ខណៈដែលមានក្រុមបុគ្គលិកប្រុសស្រីចំនួន៧នាក់ កំពុងតែនាំគ្នាធ្វើការងារខាងក្នុងសុខៗក៏ស្រាប់តែឭសំឡេងផ្ទុះ «ខ្ឌាំងៗ» ផ្ទួនៗគ្នាដោយស្មានតែផ្ទុះធុងហ្គាស ។
ធ្វើអោយគ្រប់ៗគ្នាភ័យស្លន់ស្លោស្រវ៉េស្រវ៉ាស្ទុះរត់ជាន់ជើងគ្នាចេញមកខាងក្រៅ ទើបឃើញមានផ្សែងខ្មៅងងឹតហុយទ្រលោមឃ្មួញខ្មាញ់ឡើងលើ និងមានអណ្តាតភ្លើងឆេះនៅផ្នែកខាងក្រោយ ហាងទើបបង្កឱ្យមានការភ្ញាក់ផ្អើលកើតឡើងទៅដល់កម្លាំងមានសមត្ថកិច្ចមូលដ្ឋាន និងរថយន្តពន្លត់អគ្គិភ័យដែលមកពីតាមបណ្តារអង្គភាព ស្ថាប័នពាក់ព័ន្ធ និងក្រុមហ៊ុនឯនជនចំនួន៨គ្រឿងចុះមកជួយធ្វើអន្តរាគមន៍បាញ់ទឹកពន្លត់ភ្លើងទៅបាន និងមិនឆេះរីករាលដាលធំដំនោះ ។
ករណីអគ្គីភ័យនេះដែរ បានកើតឡើង កាលពីវេលាម៉ោង១០និង ៣០នាទីព្រឹកថ្ងៃទី០៨ ខែធ្នូ ឆ្នាំ២០២០ នៅចំណុចភោជនីយដ្ឋានយីហោ «យ៉ាឃួន កាយ៉ា ថូស» ទីតាំងផ្ទះលេខ២៩ ផ្លូវលេខ ២៩៤ (ខាងកើតភ្លើងស្តុបផ្សារកាប់គោ) ក្នុងសង្កាត់ទន្លេបាសាក់ ខណ្ឌចំការមន ។
នារីជាបុគ្គលិកម្នាក់បានប្រាប់ឱ្យដឹងថា មុនពេលកើតហេតុ ខណៈដែលរូបនាង និងក្រុមបុគ្គលិកមានប្រុស មានស្រី សរុបមានគ្នាចំនួន៧នាក់ កំពុងតែធ្វើការនៅភោជនីយដ្ឋានខាងលើសុខៗទាំងអស់គ្នានោះក៏ស្រាប់តែឭសំឡេងផ្ទុះ «ខ្ឌាំងៗ» ផ្ទួនៗគ្នាជាច្រើនលើក និងធំក្លិនឈ្ងៀមផងដែរ ដោយស្មានតែជាសំឡេងផ្ទុះធុងហ្គាស ។ ដោយធ្វើអោយពួកនាងមានការភិតភ័យយ៉ាងខ្លាំងក៏ស្រវ៉េស្រវ៉ានាំគ្នារត់ចេញមកខាងក្រៅហាង មើលទៅឃើញមានផ្សែងខ្មៅហុយទ្រលោមឃ្មួញខ្មាញ់ឡើងលើ និងមានទាំងអណ្តាតភ្លើងកំពុងតែឆាបឆេះចេញពីខាងក្រោយហាងផងដែរ ដោយមិនបានដឹងថា វាឆេះមកពីមូលហេតុអ្វីឡើយ ?
តាមប្រពភព័ត៌មានពីនគរបាលមូលដ្ឋានម្នាក់បានប្រាប់ឱ្យដឹងថា ពេលដែលមានការភ្ញាក់ផ្អើលថា មានករណីអគ្គិភ័យកើតឡើងដោយសារតែការផ្ទុះហ្គាស កំពុងឆាបឆេះភោជនីយដ្ឋាននេះភ្លាម កម្លាំងរបស់ពួកលោកក៏បានចុះមកដល់កន្លែងកើតហេតុភ្លាមៗ ។ ដោយបានឃើញមានអណ្តាតភ្លើងកំពុងតែឆាបឆេះ និងមានផ្សែងខ្មៅហុយទ្រលោមយ៉ាងខ្លាំងឡើងលើ នៅលើដំបូលនោះក៏បានហៅរថយន្តពន្លត់អគ្គិភ័យរបស់ការិយាល័យនៃស្នងការនគរបាលរាជ ធានីភ្នំពេញចំនួន៣គ្រឿង រថយន្តពន្លត់អគ្គិភ័យរបស់ក្រសួងមហាផ្ទៃចំនួន ១គ្រឿង និងរថយន្តពន្លត់អគ្គិភ័យរបស់ទីក្រុងកោះពេជ្រចំនួន ៤គ្រឿង សរុបទាំងអស់៨គ្រឿង ជួយធ្វើអន្តរាគមន៍បាញ់ទឹកធ្វើអោយភ្លើងរលត់ភ្លាមៗ និងមិនអោយមានការឆេះរីករាលដាលកាន់តែធំដុំតទៅទៀតបានដែរ ។
តាមប្រភពដដែលបានប្រាប់បន្តទៀតថា ពាក់ព័ន្ធទៅនឹងករណីអគ្គិភ័យឆេះហាងនេះដែរ វាមិនមែនកើតឡើងដោយសារតែផ្ទុះហ្គាសនោះទេ គឺកើតឡើង ដោយសារតែទុស្សេកន្ទុយខ្សែរភ្លើងម៉ាស៊ីនត្រជាក់ នៅកន្លែងបន្តុំម៉ាស៊ីនត្រជាក់ធំៗជាច្រើនគ្រឿង នៅលើដំបូលនៅខាងក្រោយហាង និងបង្កអោយម៉ាស៊ីនត្រជាក់ធំៗ ដែលមានកម្លាំង៥សេះ ជាច្រើនគ្រឿងរងការខូចខាតផងដែរ តែមិនបានបង្កអោយមានមនុស្សណាម្នាក់រងគ្រោះថ្នាក់ឡើយ ។
ក្នុងករណីអគ្គិភ័យកើតឡើងដោយសារតែការទុស្សេរខ្សែរភ្លើងកន្ទុយម៉ាស៊ីនត្រជាក់នៅភោជនីយដ្ឋានខាងលើនេះដែរ បានឆេះបំផ្លាញអស់ម៉ាស៊ីនត្រជាក់ដែលមានកម្លាំង ៥សេះអស់ចំនួន ៥គ្រឿង ៕
ចែករំលែកព័តមាននេះ