ខេត្តបាត់ដំបង៖ តម្លៃស្វាយកែវរមៀត នាបច្ចុប្បន្នបានធ្លាក់ចុះពាក់កណ្ដាល បើប្រៀបធៀបក្នុងរដូវកាលដូចគ្នាកាលពីឆ្នាំទៅមិញ ហើយការប្រមូលផលរបស់កសិករ ក៏មានការថយចុះស្ទើរពាក់កណ្ដាលដែរ ដែលធ្វើឲ្យកសិករមួយចំនួនប្រឈមនឹងការខាត
បង់ ។ នេះបើតាមការអះអាងរបស់ឈ្មួញកណ្ដាល និងកសិករមួយចំនួន ដែលបានប្រាប់កោះសន្តិភាព នៅព្រឹកថ្ងៃទី០១ ធ្នូ ឆ្នាំ២០២០។
នៅក្នុងកិច្ចសម្ភាសន៍ជាមួយកោះសន្តិភាព ឈ្មួញកណ្ដាលម្នាក់នៅភូមិបាយដំរាំ ឃុំឈើទាល ស្រុកបាណន់ លោក ពុច វាច្ចា បាននិយាយថា ឆ្នាំនេះស្វាយកែវរមៀតប្រភេទលេខ២ ឬហៅថា «ស្វាយឡាយ» ដែលសម្រាប់នាំចូលរោងចក្រ គឺមានតំលៃទាបជាងឆ្នាំមុនស្ទើរពាក់កណ្ដាល បើប្រៀបធៀបក្នុងរដូវកាល នៃការប្រមូលផលដូចគ្នា។ ឈ្មួញស្វាយរមៀតរូបនេះ បានប្រាប់ថា «នេះជារដូវប្រមូលផ្លែស្វាយដែលកសិករប្រើថ្នាំបញ្ជា» តែឆ្នាំនេះ ស្វាយមានតំលៃទាបហើយ កសិករក៏មិនសូវទទូលបានផលទៀត ព្រោះបញ្ជាមិនផ្លែ ដោយសារខ្វះទឹកភ្លៀងពីដើមដៃ។
បើតាមឈ្មួញកណ្ដាលរូបនេះបានប្រាប់ថា កាលពីឆ្នាំមុន ក្នុងខែនេះតំលៃស្វាយរមៀតប្រភេ ទ«លេខ២ ឬឡាយ»នេះ ទិញចូលក្នុងតំលៃចន្លោះពី៨០០រៀល ទៅ១,២០០រៀល ក្នុង១គីឡូក្រាម ខណៈឆ្នាំនេះគាត់ទិញចូលត្រិមតម្លៃ៤៥០រៀលប៉ុណ្ណោះ ក្នុង១គីឡូក្រាម។ ដោយឡែក ការប្រមូលទិញចូលវិញ កាលពីឆ្នាំមុនក្នុងមួយថ្ងៃ លោកទិញចូលយ៉ាងតិចចន្លោះពី២០ ទៅ៣០តោន តែឆ្នាំនេះលោកទិញបានត្រិមចន្លោះពី១៥ទៅ២០តោនប៉ុណ្ណោះក្នុង១ថ្ងៃ។ ដូច្នេះ ទាំងតម្លៃទាំងការប្រមូលទិញ គឺខុសគ្នាស្ទើរពាក់កណ្ដាលឯណោះ។
លោក ពុច វាច្ចា បានបញ្ជាក់ពីមូលហេតុ ដែលឆ្នាំនេះស្វាយគ្មានតំលៃយ៉ាងដូច្នេះថា «ជារៀងរាល់ឆ្នាំ ខ្ញុំតែងប្រមូលទិញស្វាយរមៀតនេះ ដឹកចេញយកទៅប្រទេសថៃ ហើយបើទីផ្សារនៅថៃធ្លាក់ហើយ ខ្ញុំក៏ទិញទម្លាក់តាមហ្នឹងដែរ ព្រោះខ្ញុំចំណេញក្បាលកាត់តិចទូចទេ»។ ប៉ុន្តែអ្វីដែលជាបញ្ហានោះ គឺ ឆ្នាំនេះកសិករមួយចំនួនដែលមានដំណាំស្វាយនេះ កំពុងប្រឈមនឹងការខាតបង់ដែរ ព្រោះឆ្នាំនេះការបញ្ជាផ្លែមិនបានផល គឺខូចស្ទើរពាក់កណ្ដាល។
យើងងាកមិនជួបជាមួយនឹងកសិករដែលនិយមដាំស្វាយកែវរមៀតនេះវិញម្ដង ភាគច្រើនសុទ្ធតែបានអះអាងប្រហាក់ប្រហែលគ្នា ដែលនិយាយពីការខាតបង់ ដោយសារដាំមិនបានផលនៅក្នុងឆ្នាំនេះ។ នៅតាមចំការស្វាយនានា ដែលមានទំហំរាប់សិបហិចតា គេឃើញមានតែដើម តែគ្មានផ្លែ រីឯចំការខ្លះទៀតកំពុងផ្កា និង ខ្លះទៀតកំពុងចេញក្ដិបតូចៗនៅឡើយ តែនេះមិនមែនកសិករប្រើថ្នាំបញ្ជាទេ គឺ ជារដូវដំណាំស្វាយនេះត្រូវចេញផ្កា ផ្លែ តាមបែបធ្មជាតិ។
លោក លាង ដា រស់នៅឃុំកន្ទឺ១ ស្រុកបាណន់ បានថ្លែងប្រាប់កោះសន្តិភាពតាមទូរស័ព្ទនៅថ្ងៃដដែលនេះថា ដំណាំស្វាយកែវរមៀតរបស់លោកប្រមាណ០៥ហិចតា ឆ្នាំនេះប្រមូលផល ស្ទើរមិនបានពាក់កណ្ដាលផង បើប្រៀបធៀបទៅនឹងឆ្នាំទៅមិញ។ គាត់បានត្អូញត្អែរថា « ឆ្នាំនេះខ្ញុំខាតដើមច្រើនគួរសមដែរ ព្រោះបញ្ជាស្វាយមិនផ្លែ»។
ត្រង់បញ្ហានេះ លោក លាង ដា ក៏ដូចឈ្មួញកណ្ដាលខាងលើ ហើយក៏មិនខុសពីកសិករដាំស្វាយដទៃទៀតដែរ បានលើកឡើងប្រហាក់ប្រហែលគ្នាថា មូលហេតុ ដែលបញ្ជាស្វាយមិនផ្លែ ដោយសារឆ្នាំនេះខ្វះខាតទឹកភ្លៀងពីដើមដៃ លុះបានផលបន្តិចបន្ទូចលក់មិនបានថ្លៃទៀត។ ដូច្នេះហើយ ទើបកសិករភាគច្រើនប្រឈមនឹងការខាតបង់។ ប៉ុន្តែកសិករហាក់បានបង្ហាញពីក្ដីសង្ឃឹមខ្លះៗ នៅពេលពួកគេនិយាយពីការរងចាំប្រមូលផលស្វាយនាពេលប៉ុន្មានខែខាងមុននេះទៀត ដែលជារដូវកាលស្វាយត្រូវផ្លែតាមបែបធម្មជាតិ ដោយមិនបាច់ប្រើថ្នាំបញ្ជា។
លោក ពុច វាច្ចា ជាឈ្មួញទិញស្វាយ បាននិយាយថា ពេលនេះជិតផុតការប្រមូលផលស្វាយដែលប្រើថ្នាំបញ្ជាហើយ តែប្រហែលជាង១ខែទៀត កសិករនឹងត្រូវប្រមូលផលស្វាយ ដែលផ្លែតាមរដូវកាលវិញម្ដង។ លោកថា ពេលនេះដំណាំស្វាយស្ទើរគ្រប់ចំការ កំពុងផ្កានិងកំពុងចេញក្ដិបស្ទើរបាក់មេក។ ដូច្នេះលោករំពឹងថា កសិករនឹងទទូលបានផលច្រើនជាងពេលនេះ ហើយអាចស្រង់ដើមវិញបានខ្លះជាមិនខាន៕
ចែករំលែកព័តមាននេះ