រាជធានីភ្នំពេញ៖ ករណីវិជ្ជមានកូវីដ ១៩ លោកអគ្គនាយកពន្ធនាគារនៃក្រសួងមហាផ្ទៃ ភរិយារបស់លោក និងក្រុមគ្រួសាររបស់លោកគឺជាករណីធ្ងន់ធ្ងរជាថ្មីម្តងទៀតសម្រាប់កម្ពុជាជុំវិញការរកឃើញនូវករណីវិជ្ជមានជំងឺឆ្លងមួយនេះ ដែលករណីនេះត្រូវបានប្រមុខដឹកនាំរាជរដ្ឋាភិបាលចាត់ទុកថាជាការឆ្លងក្នុងសហគមន៍ជាលើកដំបូងរបស់កម្ពុជា ។
រហូតត្រូវបិទទីតាំងអាជីវកម្ម ៣ ប្រភេទនៅទីតាំងផ្សេងៗគ្នា រាប់ចាប់ពីផ្សារទំនើបអ៊ីអន១ សណ្ឋាគារភ្នំពេញ និងអាជីវកម្មអប់រំ គឺសាលារៀនអន្តរទ្វីបអាមេរិកាំង សាខាចាក់អង្រែ ជាបណ្ដោះអាសន្ន ។
ជុំវិញការបិទសណ្ឋាគារដ៏ធំមួយនេះ ប្រធានសមាគមសណ្ឋាគារថា ការបិទសណ្ឋាគារភ្នំពេញ ឬក៏ទីតាំងសណ្ឋគារ ពីរ ឬបី នៅរាជធានីភ្នំពេញ គឺមិនបណ្តាលឲ្យខ្វះបន្ទប់សម្រាប់ភ្ញៀវមកស្នាក់នៅនោះទេ តែប្រាកដណាស់គឺវាពិតជាប៉ះការងារបុគ្គលិកនៅទីតាំងអាជីវកម្មទាំងនោះ ។
ប្រធានសមាគមសណ្ឋាគារកម្ពុជា អ្នកស្រី ក្លេខៃ ចិន្តា បានលើកឡើងថា ការបិទសណ្ឋាគារដ៏ធំនៅភ្នំពេញក្រោយពេលមានករណីវិជ្ជមានកូវីដ១៩ លើស្ត្រីខ្មែរម្នាក់និងបានដើរទៅទីតាំងជាច្រើនទៀតនោះ មិនបានប៉ះពាល់ដល់ការខ្វះខាតបន្ទប់សម្រាប់ភ្ញៀវទេសចរនោះទេ ព្រោះថាសណ្ឋាគារបច្ចុប្បន្ននេះ ភាគច្រើនគឺសម្រាប់បម្រើឱ្យតែភ្ញៀវក្នុងស្រុកប៉ុណ្ណោះ ខណៈភ្ញៀវបរទេសចូលមកក្នុងប្រទេសកម្ពុជាស្ទើរតែគ្មានទៅហើយ ។
អ្នកស្រីបានបន្តថា សណ្ឋាគារនៅភ្នំពេញមានច្រើនណាស់ដែលនៅទំនេរ ហើយការបិទសណ្ឋាគារពីរ ឬបីនៅភ្នំពេញក៏នៅតែមានបន្ទប់សម្រាប់ភ្ញៀវស្នាក់នៅដែរ ព្រោះថាសណ្ឋាគារខ្លះមិនទាំងមានភ្ញៀវ ស្នាក់នៅផង ដូច្នេះការបិទពីរ ឬបីសណ្ឋាគារដោយប្រការណាមួយនោះ គឺនៅមានបន្ទប់សម្រាប់បម្រើសេវាកម្មនេះមានច្រើនទៀត ប៉ុន្តែបើសិនការបិទសណ្ឋាគារកាន់តែមានចំនួនច្រើនឡើងថែមទៀតនោះ វាអាចនឹងខ្វះខាតការផ្គត់ផ្គង់បន្ទប់មែន ។
អ្នកស្រី ក្លេខៃ ចិន្តា បាននិយាយថា «ការបិទសណ្ឋាគារមិនប៉ះពាល់ដល់ការខ្វះខាតបន្ទប់ទេ តែអ្វីដែលប៉ះពាល់នោះគឺការងាររបស់បុគ្គលិកនៃសណ្ឋាគារនោះ បើសិនជាសណ្ឋាគារដែលពួកគាត់ធ្វើការបិទហើយមិនមានប្រាក់បៀវត្សរ៍ផ្ដល់ជូន តែបើគេផ្ដល់ជូនអំឡុងពេលបិទ គឺគាត់អាចដោះស្រាយបញ្ហាជីវភាពគ្រួសារបាន» ។
អ្នកស្រីបន្ថែមថា ពាក់ព័ន្ធនឹងការបិទផ្សារទំនើបមួយនៅភ្នំពេញ ក៏វាមិនអាចប៉ះពាល់ដល់ភ្ញៀវឬអតិថិជនដែលដើរទិញអីវ៉ាន់នោះដែរ ព្រោះនៅភ្នំពេញក៏មានផ្សារទំនើបច្រើន ភ្ញៀវក៏អាចដើរកម្សាន្តនៅទីតាំងច្រើនកន្លែងទៀតទាំងនៅភ្នំពេញ និងនៅជាយភ្នំពេញ ។តែអ្វីដែលប៉ះពាល់គឺសតិអារម្មណ៍ភ្ញៀវនិងប្រជាជនកម្ពុជាយើងតែម្ដង ។ នៅពេលមានផ្ទុះជំងឺនេះឡើង ប្រជាជនកម្ពុជានឹងភ័យខ្លាចហើយលែងចេញពីផ្ទះទៅផ្សារឬក៏ដើរលេងទៀត ដូច្នេះវាជាបញ្ហាដែលកង្វល់ ។
ប្រធានសមាគមសណ្ឋាគាររូបនេះ បានបញ្ជាក់ថា តាំងពីកម្ពុជាផ្ទុះជំងឺកូវីឌ១៩មក ឃើញថា វិស័យទេសចរណ៍ជួបវិបត្តិរហូតមក ដោយមិនទាន់ប្រសើរឡើងវិញនោះទេ ។ ប៉ុន្តែសកម្មភាពទេសចរណ៍ ហាក់ទទួលបានភាពប្រសើរបន្តិចនៅពេលរដ្ឋាភិបាលផ្ដល់ជូនថ្ងៃឈប់សម្រាកសង កាលពីអំឡុងខែសីហា ២០២០នេះ ធ្វើឱ្យភ្ញៀវក្នុងស្រុកចេញធ្វើដំណើរកម្សាន្តទៅតាមខេត្ត ហើយមានខេត្តខ្លះអត់ទាំងមានកន្លែងសម្រាប់ផ្ដល់ជូនភ្ញៀវសម្រាកផង ។ ក្រោយពីព្រឹត្តិការណ៍នោះបានបញ្ចប់វិញ សកម្មភាពទេសចរណ៍ក៏ស្ងប់ទៅវិញសណ្ឋាគារធំៗបន្តអត់មានភ្ញៀវ ព្រោះថាសណ្ឋាគារមួយចំនួន គឺផ្ដោតលើភ្ញៀវទេសចរបរទេស ហើយក្នុងឆ្នាំ ២០២០នេះ ភ្ញៀវទេសចរអន្តរជាតិចូលមកកម្ពុជាធ្លាក់ចុះធ្ងន់ធ្ងរគឺជាវិបត្តិនៃសណ្ឋាគារលំដាប់ផ្កាយធំៗមួយចំនួនផងដែរ ។
លោក វន់ ពៅ ប្រធានសមាគមសេដ្ឋកិច្ចឯករាជ្យក្រៅប្រព័ន្ធ បានលើកឡើងថា នៅពេលអាជីវកម្មអ្វីមួយត្រូវបានបិទ អ្នកដែលទទួលផលប្រយោជន៍ទាំងផ្ទាល់និងប្រយោលនឹងអាចប៉ះពាល់ដល់ ជៀសមិនរួចទេ ជាពិសេសអ្នកប្រកបរបរកក្រៅប្រព័ន្ធដែលធ្លាប់ទទួលប្រយោជន៍ពីអាជីវកម្មនោះ ។
ផ្សារទំនើបអ៊ីអន ១ ជាផ្សារទំនើបធំជាងគេមួយនៅភ្នំពេញ ហើយបើតាមអ្នកគ្រប់គ្រងផ្សារទំនើបមួយនេះថា ផ្សារនេះមានបុគ្គលិករាប់ពាន់នាក់បម្រើការ និងផ្ដល់ប្រាក់ចំណូលជាច្រើនដល់បុគ្គលិក ។ មិនតែប៉ុណ្ណោះ វាក៏ផ្ដល់អត្ថប្រយោជន៍ជាច្រើនដល់អ្នករត់កង់បី តាក់ស៊ី ម៉ូតូឌុប និងអ្នកលក់នៅក្រៅផ្សារមួយចំនួនផងដែរ ។
គួរជម្រាបថា កាលពីល្ងាចថ្ងៃទី២៨ ខែវិច្ឆិកា ២០២០ រាជរដ្ឋាភិបាលប្រកាសបិទភ្លាមៗនៃផ្សារទំនើបអ៊ីអនភ្នំពេញនៅតាមបណ្ដោយផ្លូវសុរធារស្ស ដោយសារតែរកឃើញស្ត្រីម្នាក់ជាភរិយាមន្ត្រីកម្ពុជា វិជ្ជមានកូវីដ១៩ ហើយបានចូលទៅក្នុងផ្សារទំនើបមួយនេះ ។ បន្ទាប់មករដ្ឋាភិបាលក៏បានប្រកាសបិទសណ្ឋាគារភ្នំពេញ ក្រោយស្ត្រីរូបនោះបានទៅហាត់ប្រាណនៅសណ្ឋាគារមួយនេះនិងបិទសាលារៀនឯកជនមួយដែរ ជាសាលាដែលកូនស្ត្រីរូបនោះកំពុងសិក្សា ។ យ៉ាងណាពេលនេះរដ្ឋាភិបាលក៏កំពុងរកអ្នកពាក់ព័ន្ធជាច្រើនទៀត ដើម្បីមកធ្វើតេស្ត្រ និងចត្តាឡីស័ក ចំពោះអ្នកពាក់ព័ន្ធនឹងស្ត្រីរូបវិជ្ជមានកូវីដនិងស្វាមី ៕
ចែករំលែកព័តមាននេះ