រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានប្រកាសឲ្យផ្អាកការរៀបអាពាហ៍ពិពាហ៍ និងពិធីជួបជុុំនានានៅរាជធានីភ្នំពេញ និងខេត្តសៀមរាប ។តាមសារសំឡេងសម្តេចតេជោនាយករដ្ឋមន្ត្រី ដែលត្រូវបានផ្សព្វផ្សាយនៅថ្ងៃទី៣០…
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានប្រកាសឲ្យផ្អាកការរៀបអាពាហ៍ពិពាហ៍ និងពិធីជួបជុុំនានានៅរាជធានីភ្នំពេញ និងខេត្តសៀមរាប ។តាមសារសំឡេងសម្តេចតេជោនាយករដ្ឋមន្ត្រី ដែលត្រូវបានផ្សព្វផ្សាយនៅថ្ងៃទី៣០ ខែវិច្ឆិកា ឆ្នាំ២០២០ សម្តេចមានប្រសាសន៍ថា តាមការស្នើសុំពីក្រសួងសុខាភិបាល ក៏ដូចអង្គការសុខភាពពិភពលោក តម្រូវឲ្យមានវិធានការបន្ថែមនៅក្រុងភ្នំពេញ និងខេត្តសៀមរាប គឺសុំផ្អាករាល់ការជួបជុំដែលមានមនុស្សច្រើន រាប់ទាំងការរៀបអាពាហ៍ពាហ៍ ក្នុងរយៈពេល១៥ថ្ងៃចាប់ពីថ្ងៃទី៣០ ខែវិច្ឆិកាតទៅ ។
សម្តេចតេជោបន្តថា ១៥ថ្ងៃ គឺហាមការជួបជុំតែម្តង បើមានការប្រជុំក៏ត្រូវផ្អាកសិន ហើយបើសិនមានរៀបអាពាហ៍ពិពាហ៍សុំស្នើមេត្តាខន្តីផ្អាកសិន១៥ថ្ងៃ បានសេចក្តីថា ចាប់ពីថ្ងៃទី១ ធ្នូដល់ថ្ងៃទី១៥ ឬ១៦ ធ្នូ ។ អីុចឹងទេ សូមឲ្យមានការផ្សព្វផ្សាយឲ្យទូលំទូលាយតាមបណ្តាញព័ត៌មាន ។ សម្តេចតេជោ បានស្នើសុំឲ្យមានយោគយល់ពីប្រជាពលរដ្ឋ គឺការជួបជុំណាក៏ដោយសុំផ្អាកជាបណ្តោះអាសន្ន១៥ថ្ងៃ ទាំងអាពាហ៍ពិពាហ៍ ទាំងការប្រជុំ ការជួបជុំជាលក្ខណៈមនុស្សលើសពី២០នាក់ទៅគឺមិនត្រូវជួបជុំទេ ។ ប៉ុន្តែបើមានការជួបជុំត្រឹម២០នាក់ ត្រូវមានគម្លាតឲ្យឆ្ងាយ ។
សម្តេចតេជោបានលើកឡើងថា មិនមានការហាមឃាត់ការធ្វើដំណើរទៅខាងក្រៅឬតាមផ្លូវនោះទេ តែសុំកុុំឲ្យមានការកកស្ទះតាមស្តុបនានា កាត់បន្ថយការធ្វើដំណើរចេញក្រៅផ្ទះ១៥ថ្ងៃចាប់ពីថ្ងៃនេះដល់ថ្ងៃទី១៥ឬ១៦ ខែធ្នូ ។ សម្តេចតេជោបន្តថា ក្រសួងអប់រំក៏ត្រូវធ្វើការជាបន្ទាន់ចំពោះការផ្អាកបិទសាលារៀន ហើយនៅរយៈពេលរៀនបន្តដែលត្រូវប្រកាសនោះ ក៏គួរផ្អាកសិនសម្រាប់សិស្សថ្នាក់ទី១២ ដែលត្រៀមប្រឡង ។ អីុចឹង គួរក្រសួងអប់រំយុវជន និងកីឡា ណែនាំទៅមន្ទីរអប់រំដែលទាក់ទងនឹងការគ្រប់គ្រងរបស់ខ្លួននៅរាជធានីភ្នំពេញ និងខេត្តសៀមរាប និងក្រសួងការងារនិងបណ្តុះបណ្តាលវិជ្ជាជីវៈ ដូច្នេះសូមអនុវត្តបន្ទាន់ ។
ជាមួយគ្នានឹងការប្រកាសឱ្យផ្អាករាល់សកម្មភាពជួបជុំបង្ការជំងឺកូវីដ-១៩ តាមការសុំច្បាប់ក្នុងរយៈពេលមួយខែវិច្ឆិកានេះ នៅរាជធានីភ្នំពេញ មានគូអាពាហ៍ពិពាហ៍ជិត១ពាន់គូដែលនឹងចូលរោងការក្នុងខែធ្នូខាងមុខ ។ យោងតាមរបាយការណ៍របស់រដ្ឋបាលរាជធានីភ្នំពេញ បានឲ្យដឹងថា ក្នុងរយៈពេលមួយខែវិច្ឆិកាកន្លងមកនេះ ពលរដ្ឋរស់នៅក្នុងរាជធានីភ្នំពេញ បានសុំច្បាប់រៀបអាពាហ៍ពិពាហ៍ចំនួន៨៨៦គូ ។
ចំណែកនៅខេត្តសៀមរាបវិញ តាមតួលេខប្រហាក់ប្រហែលបានបង្ហាញថា ក្រុងសៀមរាបមាន១៣សង្កាត់ ។ ការសាកសួរតាមសង្កាត់នីមួយៗបានឱ្យដឹងថា សង្កាត់ខ្លះ៧គូ ខ្លះ៩គូ និងខ្លះជាង១០គូ ។ ហេតុនេះជាមធ្យមភាគមានចំនួនប្រមាណជាង១០០គូ ដែលត្រូវបានផ្អាកសម្រាប់រយៈពេល១៥ថ្ងៃ ៕
ចែករំលែកព័តមាននេះ