ចាប់ពីឆ្នាំ២០២១ ទៅអាយុចូលនិវត្តន៍របស់កម្មករ និងកម្មការិនីនឹងពន្យារវែងជាងមុន
ហាណូយ ៖ ចាប់ផ្តើមនៅឆ្នាំក្រោយ អាយុចូលនិវត្តន៍នឹងត្រូវបានតំឡើងដល់ ៦០ឆ្នាំ និង ៣ខែ សម្រាប់បុរស និង៥៥ឆ្នាំ និង៤ខែសម្រាប់ស្ត្រី…
ហាណូយ ៖ ចាប់ផ្តើមនៅឆ្នាំក្រោយ អាយុចូលនិវត្តន៍នឹងត្រូវបានតំឡើងដល់ ៦០ឆ្នាំ និង ៣ខែ សម្រាប់បុរស និង៥៥ឆ្នាំ និង៤ខែសម្រាប់ស្ត្រី ។ ដែលការសម្រេចបង្កើនអាយុចូលនិវត្តន៍របស់កម្មករ និងកម្មការិនីនេះ គឺជាផ្នែកមួយនៃក្រឹត្យរបស់រដ្ឋាភិបាលលេខ ១៣៥ ហើយនឹងចាប់អនុវត្តចាប់ពីថ្ងៃទី១ ខែមករា ឆ្នាំ២០២១ បន្ទាប់ពីមានការអនុម័តលើច្បាប់ការងារដែលត្រូវបានកែសម្រួលដោយរដ្ឋសភា កាលពីឆ្នាំមុន បន្ទាប់ពីមានការជជែកវែកញែកជាច្រើនដង ។
បច្ចុប្បន្នអាយុចូលនិវត្តន៍របស់កម្មករធម្មតា គឺ៦០ឆ្នាំសម្រាប់បុរស និង៥៥ ឆ្នាំសម្រាប់ស្ត្រី ។ អ្នកដែលធ្វើការធ្ងន់ធ្ងរ ឬការងារប្រភេទគ្រោះថ្នាក់ខ្ពស់ ឬនិយោជិកដែលធ្វើការនៅកន្លែងដែលមានជីវភាពរស់នៅលំបាកអាចចូលនិវត្តន៍នៅអាយុ ៥៥ ឆ្នាំ សម្រាប់បុរស និង ៥០ សម្រាប់ស្ត្រី ។ កម្មករដែលមានជំនាញខ្ពស់ធ្វើការរហូតដល់អាយុ ៦៥ ឆ្នាំ សម្រាប់បុរសនិង ៦០ ឆ្នាំសម្រាប់ស្ត្រី ។ ការបង្កើន ឬពន្យារនៃអាយុចូលនិវត្តន៍ គឺជាផ្នែកសំខាន់មួយនៃក្រមការងារដែលត្រូវបានកែសម្រួល ។
យោងតាមក្រឹត្យខាងលើនេះ បន្ទាប់ពីឆ្នាំ២០២១ អាយុចូលនិវត្តន៍នឹងកើនឡើង៣ខែក្នុងមួយឆ្នាំ សម្រាប់បុរស និង៤ខែសម្រាប់ស្ត្រី ។ អាយុចូលនិវត្តន៍របស់បុរសនឹងត្រូវបានកើនឡើងជាលំដាប់ពី ៦០ ដល់ ៦២ នៅឆ្នាំ២០២៨ ខណៈពេលដែលស្ត្រីចូលនិវត្តន៍នឹងកើនឡើងពី៥៥ ដល់ ៦០ ឆ្នាំនៅឆ្នាំ២០៣៥ ។ កម្មករដែលធ្វើការក្នុងបរិស្ថានគ្រោះថ្នាក់ ឬប្រភេទការងារធ្ងន់ធ្ងរ អាចចូលនិវត្តន៍ឆាប់ៗ រីឯអ្នកដែលធ្វើការក្នុងវិស័យឯកជន ឬការងារដែលមានជំនាញខ្ពស់អាចចូលនិវត្តន៍នៅពេលក្រោយដោយមានរយៈពេលអតិបរមា ៥ ឆ្នាំ ។
យ៉ាងណាមិញ បើទោះបីជាកម្មករឈានដល់អាយុចូលនិវត្តន៍ក្តី តែបើប្រជាជនអាចបន្តធ្វើការបានទៀតប្រសិនបើពួកគេឈានដល់កិច្ចព្រមព្រៀងជាមួយនិយោជករបស់ពួកគេ។ កាលពីឆ្នាំមុន ស្ថិតិប្រជាជននៅវៀតណាមមានចំនួន ៩៦,២ លាននាក់ហើយអាចកើនឡើងដល់ ៩៧,៣ លាននាក់នៅឆ្នាំនេះ ។ នេះបើយោងតាមការិយាល័យស្ថិតិទូទៅ។ ការពន្យាអាយុចូលនិវត្តន៍ ត្រូវបានគេរំពឹងថានឹងមិនរំខានដល់ទីផ្សារការងារនិងរក្សាស្ថេរភាពនយោបាយនិងសង្គម ។ វាក៏ស្របទៅនឹងអាយុកាលរបស់កម្មករវៀតណាមដែរ ។
អាយុកាលជាមធ្យមរបស់ប្រជាជនវៀតណាមបានកើនឡើងពី ៥៩ ក្នុងឆ្នាំ ១៩៦០ ដល់ ៧៣ ក្នុងឆ្នាំ ២០១៤ និងជាង ៧៥ ឆ្នាំនៅឆ្នាំ ២០១៨ ។ បច្ចុប្បន្នប្រទេសនេះមានអ្នកចូលនិវត្តន៍ប្រហែល ៣,២ លាននាក់ ៕
ចែករំលែកព័តមាននេះ