អាហ្សង់ទីន ៖ វាហាក់ដូចភ្លាមៗពេកហើយសម្រាប់ពិភពលោក ជាពិសេសប្រជាជននៃប្រទេសអាហ្សង់ទីន ក្រោយទទួលដំណឺងដ៏សោកស្តាយបំផុត ចំពោះមរណភាពរបស់ស្តេចបាល់ទាត់ Diego Maradona កាលពីថ្ងៃទី ២៥…
អាហ្សង់ទីន ៖ វាហាក់ដូចភ្លាមៗពេកហើយសម្រាប់ពិភពលោក ជាពិសេសប្រជាជននៃប្រទេសអាហ្សង់ទីន ក្រោយទទួលដំណឺងដ៏សោកស្តាយបំផុត ចំពោះមរណភាពរបស់ស្តេចបាល់ទាត់ Diego Maradona កាលពីថ្ងៃទី ២៥ វិច្ឆិកាកន្លងទៅ (ម៉ោងនៅប្រទេសអាហ្សង់ទីន) ដោយសារជំងឺគាំងបេះដូងនៅក្នុងអាយុ ៦០ឆ្នាំ នេះបើតាមសមាគមបាល់ទាត់អាហ្សង់ទីន (AFA) ធ្វើការប្រកាសពីដំណឹងដ៏ក្រៀមក្រំនេះ តាមរយៈការបង្ហោះសារនៅលើបណ្តាញសង្គមរបស់ខ្លួន។
រំលឹកជូនថា មុនពេលលាចាកលោកនេះ លោក Diego Maradona ទើបតែទទួលបានការវះកាត់យកឈាមកកក្នុងខួរក្បាលដោយជោគជ័យ និងកំពុងបន្តសម្រាកព្យាបាលនៅឯផ្ទះមួយកន្លែង ដែលស្ថិតនៅតំបន់ Nordelta ក្នុងទីក្រុងប៊ុយណូស៊ែ (Buenos Aires) ប្រទេសអាហ្សង់ទីន។
ដំណឹងមរណភាពរបស់អតីតខ្សែប្រយុទ្ធក្រុម Barcelona និង Napoli រូបនេះ បានធ្វើឱ្យកីឡាករបាល់ទាត់, អត្តពលិក រួមជាមួយបុគ្គលល្បីឈ្មោះគ្រប់វិស័យទាំងអស់នៅជុំវិញពិភពលោក បានបង្ហោះសារចូលរួមរំលែកទុក្ខ ចំពោះការបាត់បង់ស្តេចបាល់ទាត់រូបនេះ ។
គូសបញ្ជាក់ថា ពេញ១ជីវិតបាល់ទាត់របស់លោក Diego Maradona ដែលមានរយៈពេលជាង ២១ឆ្នាំ លោកបានរកគ្រាប់បាល់ចំនួន ៣៥៤គ្រាប់ពីការបង្ហាញខ្លួនសរុបចំនួន ៦៩៤ប្រកួត ទាំងក្លិបបាល់ទាត់អាជីព និងក្រុមជម្រើសជាតិអាហ្សង់ទីន។ ហើយសមិទ្ធផលដ៏ធំបំផុតក្នុងជីវិតរបស់លោក គឺ ការរួមចំណែកជួយអាហ្សង់ទីនឈ្នះជើងឯកបាល់ទាត់ពិភពលោក (World Cup) កាលពីឆ្នាំ ១៩៨៦៕
