ទីក្រុងរ៉ូសារីអូ ៖ បន្ទាប់ពីបាត់បង់ឪពុកជាទីស្រឡាញ់ នៅក្នុងទីក្រុងរ៉ូសារីអូ (Rosario) ប្រទេសអាហ្សង់ទីន រហូតមកទល់ពេលនេះ គឺនៅមិនទាន់មានកាលបរិច្ឆេទច្បាស់លាស់ណាមួយសម្រាប់ការត្រឡប់របស់កីឡាករ Lionel Messi ទៅកាន់សហរដ្ឋអាមេរិកវិញនៅឡើយនោះទេ ហើយរឹតតែមិនទាន់មានការគ្រោងទុកណាមួយដូចគ្នា សម្រាប់ការត្រឡប់ទៅកាន់សកម្មភាពលើទីលានជាមួយក្រុម Inter Miami វិញផងដែរ។ នេះបើតាមប្រភពពីកាសែត Marca បានចេញផ្សាយកាលពីថ្ងៃទី១០ ខែសីហា ឆ្នាំ២០២៦។
មរណភាពរបស់លោក Jorge Messi កាលពីថ្ងៃទី៨ ខែសីហា កន្លងទៅថ្មីៗនេះ នៅក្នុងទីក្រុងរ៉ូសារីអូបានធ្វើឱ្យខ្សែប្រយុទ្ធឆ្នើម Lionel Messi ខូចចិត្តជាទីបំផុត ខណៈពេលដែលប្រធានក្រុមអាហ្សង់ទីនវ័យ៣៩ឆ្នាំរូបនេះ កំពុងស្ថិតនៅក្នុងទីក្រុងម៉ៃអាមី (Miami) សហរដ្ឋអាមេរិក ដើម្បីត្រៀមខ្លួនសម្រាប់ការប្រកួតជាមួយមួយក្រុម Monterrey ក្នុងការប្រកួតសប្តាហ៍ទី ២ នៃពានរង្វាន់ Leagues Cup ដោយបានបង្ខំឱ្យកីឡាកររូបនេះត្រូវធ្វើដំណើរជាបន្ទាន់តាមជើងហោះហើរឯកជន ដើម្បីទៅកំដរក្រុមគ្រួសារ ក្នុងអំឡុងពេលទុក្ខក្រៀមក្រំនេះ។
បន្ទាប់ពីលាគ្នាជាលើកចុងក្រោយនៅទីបញ្ចុះសពឯកជនមួយក្នុងទីក្រុងរ៉ូសារីអូ មកទល់ពេលនេះ គេនៅមិនទាន់ដឹងថា Messi នឹងបន្តស្នាក់នៅជាមួយមនុស្សជាទីស្រលាញ់របស់ខ្លួនរយៈពេលប៉ុន្មានថ្ងៃទៀតនោះទេ។ ប៉ុន្តែទោះយ៉ាងណាក៏ដោយ កីឡាកររូបនេះទទួលបានការគាំទ្រយ៉ាងពេញទំហឹងពីក្លិប Inter Miami អនុញ្ញាតឱ្យរូបគេស្នាក់នៅក្នុងប្រទេសកំណើតប៉ុន្មានថ្ងៃក៏បានតាមត្រូវការ មុនពេលត្រឡប់មកចូលរួមជាមួយក្លិបវិញ។
ប្រភពមួយចំនួនបានរាយការណ៍ថា ក្រោយចប់ភារកិច្ចនៅព្រឹត្តិការណ៍ World Cup ឆ្នាំ២០២៦ ភ្លាម Messi បានចំណាយពេលនៅក្នុងប្រទេសអាហ្សង់ទីនជាមួយឪពុក មុនពេលត្រឡប់មកសហរដ្ឋអាមេរិក កាលពីប្រហែល១សប្តាហ៍មុន។ កន្លងមក ក្រុមគ្រួសារ Messi បានស្នើសុំឱ្យប្រព័ន្ធផ្សព្វផ្សាយគោរពឯកជនភាពពួកគេ ទាក់ទងនឹងបញ្ហាសុខភាពរបស់លោក Jorge ផងដែរ។
យ៉ាងណាមិញ នៅថ្ងៃទី៨ ខែសីហា ឆ្នាំ២០២៦ លោក Jorge Messi ដែលត្រូវជាឪពុក និងជាភ្នាក់ងារ ឬអ្នកតំណាង (Agent) Lionel Messi ផងនោះ បានទទួលអនិច្ចកម្មនៅក្នុងអាយុ៦៨ឆ្នាំ ដោយរោគាពាធ នេះបើយោងតាមការប្រកាសពីមជ្ឈមណ្ឌលវេជ្ជសាស្ត្រ Sanatorio នៅក្នុងទីក្រុងរ៉ូសារីអូ ដែលលោកកំពុងសម្រាកព្យាបាល និងដោយគ្មានព័ត៌មានលម្អិតបន្ថែមឡើយ ដើម្បីគោរពសិទ្ធិឯកជនភាពរបស់គ្រួសារសព៕
ចែករំលែកព័តមាននេះ