រាជធានីភ្នំពេញ ៖ បុរសមានកូនស្រីម្នាក់ ចំណែកប្រពន្ធបានរត់ចោលទៅហើយ ហើយបុរសរូបនេះមិនបានមើលថែទាំកូនក៏ទុកឱ្យជីតាជាអ្នកថែទាំជំនួសប្រមាណ៥ឆ្នាំមកហើយ លុះពេលបុរសរូបនេះទៅលេងកូននៅស្រុកក៏លួចនាំកូនមកភ្នំពេញ ធ្វើឱ្យជីតាភិតភ័យតាមរកចៅរហូតឮដំណឹងនៅភ្នំពេញក៏មកយកចៅវិញ ស្រាប់តែបុរសជាឪពុកចាក់ចោរជាប់ ធ្វើឱ្យជីតាភ័យយ៉ាងខ្លាំងព្រោះតែបុរសរូបនេះមានអាការបែកថ្នាំ ក៏ប្តឹងសមត្ថកិច្ចឱ្យឃាត់ខ្លួនតែម្តង បង្កឱ្យមានការភ្ញាក់ផ្អើលកាលពីម៉ោង៦និង៣០នាទីយប់ ថ្ងៃទី២៤ ខែវិច្ឆិកា ឆ្នាំ២០២០ ស្ថិតនៅភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។
បុរសខាងលើមានឈ្មោះ ប៉ូ ណូ អាយុ២៨ឆ្នាំ មុខរបរមិនពិតប្រាកដ ស្នាក់នៅមិនពិតប្រាកដ មានស្រុកកំណើតនៅភូមិចាស់ ឃុំចាស់ ស្រុកបសេធ ខេត្តកំពង់ស្ពឺ ។ បុរសរូបនេះ មានកូនស្រីម្នាក់អាយុ៥ឆ្នាំ និងមានឪពុកត្រូវជាជីតាកូនស្រីរបស់គាត់មានឈ្មោះ ពៅ នាង អាយុ៥០ឆ្នាំ មុខរបរសន្តិសុខ មានស្រុកកំណើតនៅភូមិចាស់ ឃុំបសេទ ស្រុកបសេទ ខេត្តកំពង់ស្ពឺ។ ចំណែកប្រពន្ធវិញបានរត់ចោលប្តីនិងកូនតាំងពីកូនទើបនឹងកើតម្ល៉េះ ។
តាមប្រភពពីបុរសវ័យចំណាស់ដែលត្រូវជាឪពុកបុរសខាងលើ បានឱ្យយដឹងថា ជាច្រើនឆ្នាំមកហើយ កូនប្រុសរបស់គាត់បានប្រើប្រាស់ថ្នាំញៀនរហូតដល់ប្រពន្ធរត់ចោលតាំងពីកូនបាតជើងក្រហម រួចក៏កូនទុកឱ្យគាត ដែលត្រូវជាជីតាក្មេងស្រីជាអ្នកមើលថែទាំអស់រយៈពេល៥ឆ្នាំមកហើយ ចំណែកកូនរបស់គាត់ដែលត្រូវជាឪពុកក្មេងស្រី បានដើរចោលផ្ទះមិនបានជួយថែទាំកូនស្រីនោះទេ ។
ប្រភពដដែលបន្តទៀតថា លុះនៅប៉ុន្មានសប្ដាហ៍ចុងក្រោយនេះ កូនប្រុសរបស់គាត់បានបែកថ្នាំ និយាយមិនដឹងត្រូវខុសឡើយ ហើយក៏បានលួចយកកូនស្រីរត់ចេញពីផ្ទះនៅទីរួមខេត្តកំពង់ស្ពឺ មកភ្នំពេញអស់រយៈពេល២ថ្ងៃ ធ្វើឲ្យគាត់បាត់ចៅស្រី និងមានការភិតភ័យយ៉ាងខ្លាំង ។ បន្ទាប់មក គាត់ក៏បានប្តឹងទៅសមត្ថកិច្ច និងអង្គការ ព្រមទាំងប្រព័ន្ធ Facebook ដើម្បីឱ្យជួយស្វែងរកចៅរបស់គាត់។ លុះនៅថ្ងៃទី២៤ វិច្ឆិកានេះ នៅវេលាម៉ោង២រសៀល ក៏លឺដំណឹងពីបងប្អូនបានទូរស័ព្ទប្រាប់ថា បុរសបែកថ្នាំត្រូវជាកូនរបស់គាត់ និងជាឪពុកក្មេងស្រីបានមករស់នៅបណ្តោះអាសន្ននៅផ្ទះបងប្អូនក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។
ប្រភពដដែលបន្តថា ខណៈពេលដែលរូបគាត់ជាជីតាបានមកយកចៅស្រីវិញ ស្រាប់តែឪពុកក្មេងស្រីបានចាក់សោនៅខាងក្នុងផ្ទះជួលទាំងខ្លួនមានអាការៈបែកថ្នាំ ធ្វើឲ្យរូបគាត់ដែលជាជីតាមានការភិតភ័យព្រោះតែចៅស្រីនៅក្នុងផ្ទះជាមួយបុរសបែកថ្នាំ រួចក៏បានប្តឹងទៅសមត្ថកិច្ច និងអាជ្ញាធរឃាត់ខ្លួនបានភ្លាមៗតែម្តង ។
ក្រោយពេលកើតហេតុ បុរសខាងលើត្រូវបានឪពុកប្តឹងឱ្យសមត្ថកិច្ចបញ្ជូនទៅមណ្ឌលកែប្រែ ចំណែកក្មេងស្រីតូចដែលត្រូវជាចៅរបស់គាត់ ក៏ត្រូវបានជីតាយកទៅមើលថែបន្តទៀត៕
ចែករំលែកព័តមាននេះ