ខេត្តព្រៃវែង ៖ ខណ្ឌរដ្ឋបាលព្រៃឈើខេត្តព្រៃវែង បានចាប់គោយន្តកន្ត្រៃចំនួន៦គ្រឿង ដែលដឹកឈើសសរផ្ទះទំហំ១៥គុណនឹង១៥ ក្នុងមួយគ្រឿងដឹកបាន១៥សសរ មានជើងរៀង១២ និងសសរកន្លោង៣ដើម ដើរលក់តាមភូមិ ដែលត្រូវការទិញសាងសង់ផ្ទះ
ខេត្តព្រៃវែង ៖ ខណ្ឌរដ្ឋបាលព្រៃឈើខេត្តព្រៃវែង បានចាប់គោយន្តកន្ត្រៃចំនួន៦គ្រឿង ដែលដឹកឈើសសរផ្ទះទំហំ១៥គុណនឹង១៥ ក្នុងមួយគ្រឿងដឹកបាន១៥សសរ មានជើងរៀង១២ និងសសរកន្លោង៣ដើម ដើរលក់តាមភូមិ ដែលត្រូវការទិញសាងសង់ផ្ទះ ។ គោយន្តកន្ត្រៃដឹកឈើសសរនេះ ខណ្ឌរដ្ឋបាលព្រៃឈើ ចាប់នៅចំណុចស្រុកស្វាយអន្ទរ ហើយនាំយកមករក្សាទុក ។
ការចាប់មុខរបរតូចតាចនេះ ត្រូវបានមជ្ឈដ្ឋានពលរដ្ឋចំអកឡកឡឺយថា គេចាប់អ្នកត្រង់ ដើម្បីតម្រង់អ្នកវៀច ។ ឈ្មួញរកស៊ីធំៗដឹកឈើយ៉ាងគគ្រឹកគគ្រេងដាក់ពេញៗរថយន្តយីឌុប ដឹកទាំាងថ្ងៃទាំងយប់ ដាក់តាមដេប៉ូឈើ មើលអត់ឃើញ ។
ពួកគេចំអកថា ប្រការដែលមន្ត្រីរដ្ឋបាលព្រៃឈើមិនដែលឃើញចាប់រថយន្តធំៗដឹកឈើ ព្រោះមានលុយចូលក្នុងហោប៉ៅ មានអ្នករត់ការ ធ្វើម្តេចមើលឃើញទៅ ។ ដូច្នេះហើយ ឈើទាំងនេោះ គេតែងដឹកទៅស្រុកយួនបាត់ មិនដូចអ្នករកស៊ីតិចតួច ដឹកចុះដឹកឡើងវិលវល់ក្នុងភូមិស្រុក ក៏ត្រូវសមត្ថកិច្ចមើលឃើញចាប់តែម្តង ហើយប្រកាន់ជំហរថាខ្លួនជាអ្នកអនុវត្តច្បាប់ ដោយមិនមានការលើកលែង ។
នៅព្រឹកថ្ងៃទី៨ មិថុនា ប្រជាពលរដ្ឋជាច្រើននាក់ ដែលត្រូវជាម្តាយឪពុក ជាប្តី ជាបង ជាប្អូន របស់ក្រុមអ្នករកស៊ីដឹកឈើសសរផ្ទះ៦គោយន្តកន្ត្រៃដែលមានគ្នា៦នាក់ បានលើកគ្នាទាំងគ្រួសារដ៏រហេមរហាម មកស្រែកឡាំប៉ា យំសស្រាក់នៅមុខខណ្ឌរដ្ឋបាលព្រៃឈើព្រៃវែង ។ ពួកគាត់ទាំងនោះបានបញ្ជាក់ថា ពួកគាត់ខ្លះមានទីលំនៅឃុំនិព្វាន ខ្លះទៀតនៅឃុំពោធិ៍ចំរើន ក្នុងស្រុកបរសេដ្ឋ ខេត្តកំពង់ស្ពឺ ។
លោក ប៉ុន សុភក្តិ ដែលជាអ្នកបើកគោយន្តដឹកឈើសសរដើរលក់ តាំងពីខេត្តកំពង់ស្ពឺ មកដល់ខេត្តព្រៃវែងគេអត់ចាប់ទេ និងជាតំណាងឱ្យ៥នាក់ទៀត បានបញ្ជាក់ប្រាប់កោះសន្តិភាពថា ក្រុមគាត់ទាំង៦នាក់ ដែលរកស៊ីដឹកឈើសសរដើរលក់នេះ ពុំមានច្បាប់ពីខណ្ឌរដ្ឋបាលព្រៃឈើទេ តែមានច្បាប់ចេញពីភូមិ-ឃុំ-ស្រុក អនុញ្ញាតឱ្យចេញដើររកស៊ី ដោយសារនៅភូមិ-ឃុំ ពុំមានទឹកធ្វើស្រែ ។ ឥឡូវត្រូវខណ្ឌរដ្ឋបាលព្រៃឈើព្រៃវែង ចាប់ឃាត់នៅចំណុចស្រុកស្វាយអន្ទរ ទាំង៦គោយន្ត មកដាក់នៅដេប៉ូឈើ ក្នុងក្រុងព្រៃវែង ដោយមិនឱ្យពួកគាត់មកជាមួយទេ ។ ពួកគាត់និយាយថា ខំរត់តាមគោយន្តដែលដឹកឈើសសរដែលគេចាប់ តាំងពីស្វាយអន្ទរ មកដល់ក្រុងព្រៃវែង ចម្ងាយ១៥គីឡូម៉ែត្រ ។ ពួកគាត់ពិតជាមិនចង់ចោទមន្ត្រីរដ្ឋបាលព្រៃឈើដែលចាប់នេះថា ជាចោរទេ តែបើចាប់យករបស់គាត់ហើយ ម៉េចមិនឱ្យគាត់ជិះមកជាមួយផង ទុកឱ្យគាត់រត់តាម ?
តំណាងរូបនេះបន្តថា ពេលចាប់នោះ គេមិនយកទៅដាក់នៅកន្លែងខណ្ឌទេ បែរជាយកទៅដាក់នៅដេប៉ូលក់ឈើនៅក្រុងព្រៃវែងទៅវិញ ប៉ុន្តែដោយម្ចាស់ដេប៉ូទាំងអស់ គេមិនព្រមទទួលទិញ ទើបមន្ត្រីរដ្ឋបាលព្រៃឈើទាំងនោះដឹកទៅរក្សាទុកនៅខណ្ឌរដ្ឋបាលព្រៃឈើព្រៃវែង តាំងពីថ្ងៃទី៤ មិថុនា រហូតមក ពុំព្រមដោះស្រាយទេ គេថា «ចាំជួបមេ» ។ ពួកគាត់ដេកចាំជួបមេខណ្ឌ នៅក្រៅរបងខណ្ឌរដ្ឋបាលព្រៃឈើអស់រយៈពេល៤ថ្ងៃមកហើយ ។ ដោយសារចាំយូរពេក ទើបពួកគាត់លើកគ្នាតវ៉ានៅមុខខណ្ឌរដ្ឋបាលព្រៃឈើព្រៃវែង ដើម្បីសុំឱ្យមេខណ្ឌជួយដោះស្រាយឱ្យ ។
អ្នកតំណាងរូបនេះបន្តទៀតថា នៅព្រឹកថ្ងៃទី៨ មិថុនា ខាងរដ្ឋបាលព្រៃឈើព្រៃវែង បង្ខំឱ្យពួកគាត់ទាំង៦នាក់ផ្តិតមេដៃយល់ព្រមប្រគល់ឈើឱ្យរដ្ឋបាលព្រៃឈើទាំងអស់ ហើយត្រូវបង់ប្រាក់ក្នុង១ម៉ែត្រគូប ស្មើ៨៤មុឺនរៀល គុណនឹង៣ដង ទើបគេប្រគល់គោយន្តឱ្យវិញ តែបើមិនព្រមទេ នឹងបញ្ជូនសំណុំរឿងទៅសាលាដំបូងខេត្តដោះស្រាយ ។ នៅព្រឹកថ្ងៃដដែល វេលាម៉ោងជាង៩ព្រឹក លោក ជិត តារា នាយរងខណ្ឌរដ្ឋបាលព្រៃឈើព្រៃវែង បានលេចមុខ មកហៅម្ចាស់គោយន្តទាំង៦នាក់ ឱ្យចូលការិយាល័យខណ្ឌដើម្បីដោះស្រាយគ្នា ។ ពួកគាត់ទាំង៦នាក់នោះ ១-ឈ្មោះ ប៉ុន សុភក្តិ ២-ឈ្មោះ ភិន អឿន ៣-ឈ្មោះ សុខ ពីន ៤-ឈ្មោះ ណុប ឃីន ៥-ឈ្មោះ ភិន សុភាព និង៦-ឈ្មោះ តុប រឿន ។ អ្នកសារព័ត៌មានក៏ត្រូវបានគេអញ្ជើញឱ្យចូលរួមស្តាប់ដែរ តែការចរចានោះត្រូវបរាជ័យ ព្រោះខាងខណ្ឌប្រកាន់ជំហរដដែល គឺប្រគល់តែគោយន្តឱ្យទេ តែខាងម្ចាស់គោយន្តថា សុំយកតែគោយន្តវិញ ឯឈើយកចុះ និងសុំមិនបង់លុយពិន័យ ។ ជាចុងក្រោយ លោក ជិន តារា នាយរងខណ្ឌបានបញ្ជាក់ថា លោកសម្រេចចិត្តរុញសំណុំរឿងនេះទៅសាលាដំបូងខេត្តព្រៃវែង ដើម្បីដោះស្រាយតាមឆន្ទានុសិទ្ធិរបស់តុលាការទៅចុះ លោកធ្វើនេះគឺអនុវត្តតាមច្បាប់រដ្ឋបាលព្រៃឈើជំពូកទី១៥ មាត្រា៩៦ ។
លោក តារា បានអញ្ជើញភាគីខាងគោយន្តចំនួន២នាក់ គឺឈ្មោះ ប៉ុន សុភក្តិ និងឈ្មោះ តុប រឿន ឱ្យចូលទៅសាលាដំបូងដោះស្រាយរឿងនេះបន្ត ។ តែខាងសាលាដំបូង បានសុំពន្យារពេលដោះស្រាយទៅថ្ងៃក្រោយ ដោយមិនកំណត់ថាថ្ងៃណាឡើយ ឱ្យដេកចាំសិនទៅ ។
ក្រុមប្រជាពលរដ្ឋតូចតាចទាំងនេះ បានប្រាប់កោះសន្តិភាពទាំងទឹកភ្នែកថា ពួកគាត់នឹងដេករង់ចាំការសម្រេចរបស់តុលាការ ព្រោះគ្មានជម្រើសទេ ។ ការចាប់គោយន្តកន្ត្រៃដឹកឈើសសរផ្ទះដើរលក់នេះ មេព្រៃបានប្រកាន់ខ្ជាប់តាមច្បាប់ព្រៃឈើពិតមែន ដែលមិនខុសឆ្គងអ្វីនោះទេ តែមេព្រៃធ្វើនេះអត់មានបេះដូងប៉ុនអាចម៍ច្រមុះឡើយ ។ នៅចំពោះក្រសែភ្នែកមហាជន ពិតជាគួរឱ្យអាណិតដល់ពលរដ្ឋតូចតាចល្ហេមល្ហាមទាំងនោះដែលលើកគ្នាមកសុំទាំងគ្រួសារ តើខុសកម្រិតណាទៅ ខណៈដែលឈ្មួញដឹកឈើឡើងរូងផ្លូវអស់ទៅហើយកាត់តាមខេត្តព្រៃវែង ម៉េចមិនឃើញចាប់បាន ។ ទិដ្ឋភាពបែបនេះ មិនខុសពីពាក្យថា ខ្លាស៊ីគោ ស្ងាត់ឈឹង តែបើឆ្មាលួចស៊ីត្រីអាំងវិញ គឺចាប់ជាន់.ក បកស្បែក ៕
ចែករំលែកព័តមាននេះ