ខេត្តកណ្តាល ៖ ជនសង្ស័យ៣នាក់ បានខ្ចីម៉ូតូអ្នកស្គាល់គ្នា យកទៅលួចដែកក្នុងរោងចក្រ ចាំពេលម៉ូតូអស់សាំង ក៏បានទៅលួចសាំងម៉ូតូរ៉ឺម៉ក ដែលគេទុកចោលលើផ្លូវ ប៉ុន្តែត្រូវបានម្ចាស់គេទាន់ ស្រែកថាចោរៗ…
ខេត្តកណ្តាល ៖ ជនសង្ស័យ៣នាក់ បានខ្ចីម៉ូតូអ្នកស្គាល់គ្នា យកទៅលួចដែកក្នុងរោងចក្រ ចាំពេលម៉ូតូអស់សាំង ក៏បានទៅលួចសាំងម៉ូតូរ៉ឺម៉ក ដែលគេទុកចោលលើផ្លូវ ប៉ុន្តែត្រូវបានម្ចាស់គេទាន់ ស្រែកថាចោរៗ នាំគ្នាផ្តួលម៉ូតូចោលរត់គេចខ្លួន ចុងក្រោយត្រូវអាវុធហត្ថស្រាវជ្រាវ ចាប់បានទាំង៣នាក់ ។
បន្ទាប់ពីទទួលបានពាក្យបណ្ដឹងពីជនរងគ្រោះ កម្លាំងអាវុធហត្ថខេត្ត បានបើកការស្រាវជាវបង្ក្រាបបាននៅវេលាម៉ោង ១៥និង២៥នាទី ថ្ងៃទី២៦ មិថុនា ២០២៥ នៅចំណុចបន្ទប់ជួលគ្មានលេខ ស្ថិតនៅក្នុងភូមិត្រពាំងក្រសាំង ឃុំបែកចាន ស្រុកអង្គស្នួល ខេត្តកណ្តាល ។
ដោយឃាត់ខ្លួនជនសង្ស័យ៣នាក់រួមមាន ៖
១.ឈ្មោះ ហួច លាងហួរ ភេទប្រុស អាយុ២០ឆ្នាំ មុខរបរមិនពិតប្រាកដ (អ្នកខ្ចីម៉ូតូ) តេស្តទឹកមូត្ររកសាធាតុញៀន(វិជ្ជមាន+)ធ្លាប់ជាប់ពន្ធធនាគារ ០១លើក នៅខេត្តកណ្តាល ឆ្នាំ២០១៨ ពីបទហិង្សាដោយចេតនា។
២.ឈ្មោះ ប្រូ អាសាក់ ភេទប្រុស អាយុ២០ឆ្នាំ ជនជាតិខ្មែរអ៊ីស្លាម មុខរបរមិនពិត (អ្នកលួចសាំង) តេស្តទឹកមូត្ររកសាធាតុញៀន(វិជ្ជមាន+)។
៣.ឈ្មោះ វឿន សារឿន ភេទប្រុស អាយុ៣១ឆ្នាំ មុខរបរមិនពិត (អ្នកចូលលួចដែក) តេស្តទឹកមូត្ររកសាធាតុញៀន(វិជ្ជមាន+)
ធ្លាប់ជាប់ពន្ធធនាគារ០១លើក នៅខេត្តត្បូងឃ្មុំឆ្នាំ២០១៩ ពីបទប្រើប្រាស់គ្រឿងញៀន ។
ជនសង្ស័យទាំង ០៣នាក់ មានទីលំនៅបច្ចុប្បន្នស្នាក់ផ្ទះជួលភូមិត្រពាំងក្រសាំង ឃុំបែកចាន ស្រុកអង្គស្នួល ខេត្តកណ្តាល ។
គួរបញ្ជាក់ថា នៅវេលាម៉ោង១៨ ថ្ងៃទី២៥ ខែមិថុនា ឆ្នាំ២០២៥ ជនរងគ្រាះចេញពីធ្វើការរោងចក្រ ក៏បានជួបជនសង្ស័យ ទាំង០៣នាក់ នៅការ៉ាសសាំងក្បែររោងចក្រ ជនសង្ស័យឈ្មោះ ហួច លាងហួរ ជាអ្នកខ្ចីម៉ូតូ ដោយប្រាប់ថា យកទៅដឹកអេតចាយ ទើបជនរងគ្រោះបានប្រគល់ម៉ូតូឲ្យ រួចហើយពួកគេបានជិះទៅបាត់ មិនឃើញយកម៉ូតូមកប្រគល់ឱ្យវិញ។ លុះព្រឹកឡើង ជនរងគ្រោះបានទៅសួររកម៉ូតូ ប៉ុន្តែត្រូវបានក្រុមជនសង្ស័យ ប្រាប់ថា បាត់ហើយ ទើបជនរងគ្រោះមកដាក់ពាក្យបណ្តឹងនៅមូលដ្ឋានកងរាជអាវុធហត្ថស្រុកអង្គស្នួល។ ក្រោយពីទទួលបណ្តឹងរួច កម្លាំងអាវុធហត្ថស្រុកអង្គស្នួល បានចុះទៅដល់កន្លែងកើតហេតុ ឃាត់ខ្លួនជនសង្ស័យបានចំនួន០៣នាក់ រួចនាំមកសាកសួរនៅ អាវុធហត្ថស្រុកអង្គស្នួល ។
នៅចំពោះមុខសមត្ថកិច្ច ជនសង្ស័យទាំង០៣នាក់ បានឆ្លើយសារភាពថា ពួកខ្លួនបានខ្ចីម៉ូតូពីជនរងគ្រោះពិតប្រាកដមែន គឺដើម្បីជិះនាំគ្នាទៅលួចដែកនៅក្នុងរោងចក្រ ស្ថិតនៅភូមិព្រៃរការ ឃុំឆក់ឈើនាង ស្រុកអង្គស្នួល ខេត្តកណ្តាល
ពេលទៅដល់គោលដៅ(លួច) ម៉ូតូអស់សាំង ជនសង្ស័យឈ្មោះ ប្រូ អាសាក់ បានទៅលួចសាំងម៉ូតូរ៉ឺម៉ក ដែលគេទុកចោលលើផ្លូវ ប៉ុន្តែត្រូវបានម្ចាស់គេទាន់ស្រែកថា ចោរៗ គេបានផ្តួលម៉ូតូចោល រត់គេចខ្លួន។ ចំណែកជនសង្ស័យឈ្មោះ ហួច លាងហួរ និងឈ្មោះ វឿន សារឿន ជាអ្នកដើរចូលទៅលួចដែក នៅក្នុងរោងចក្រ ដោយឮគេស្រែក ក៏នាំគ្នារត់គេចដែរទៅ ។ ចំពោះគ្រឿងញៀនពួកគេ ចេះប្រើប្រាស់ជាច្រើនឆ្នាំមកហើយ ទិញថ្នាំមកពីម្តុំក្តាន់ពី នៅរាជធានីភ្នំពេញ ។
បច្ចុប្បន្ន ជនសង្ស័យ បាននាំមកសាកសួរនៅមូលដ្ឋាន អាវុធហត្ថស្រុកអង្គស្នួល ដើម្បីកសាងសំណុំរឿងបញ្ជូនខ្លួនទៅកាន់តុលាការ ចាត់ការតាមនីតិវិធីផ្លូវច្បាប់ ៕
ចែករំលែកព័តមាននេះ