រាជធានីភ្នំពេញ ៖ យុវជនម្នាក់ ទាស់សម្តីគ្នាជាមួយសង្សារ សម្រេចចិត្តទៅលោតទឹកសម្លាប់ខ្លួន លើស្ពានមិត្តភាពកម្ពុជា-ចិន ហើយ ត្រូវបានបងប្អូនប្រជានេសាទរាវរកឃើញស.ពក្បែរច្រាំងទន្លេ នៅខាងក្រោមស្ពាន ។…
រាជធានីភ្នំពេញ ៖ យុវជនម្នាក់ ទាស់សម្តីគ្នាជាមួយសង្សារ សម្រេចចិត្តទៅលោតទឹកសម្លាប់ខ្លួន លើស្ពានមិត្តភាពកម្ពុជា-ចិន ហើយ ត្រូវបានបងប្អូនប្រជានេសាទរាវរកឃើញស.ពក្បែរច្រាំងទន្លេ នៅខាងក្រោមស្ពាន ។
ហេតុការណ៍នេះបានកើតឡើងនៅវេលាម៉ោង០៤និង២០នាទីល្ងាច ថ្ងៃទី២៨ ខែមិថុនា ឆ្នាំ២០២៥នេះ ដែលស្ថិតនៅចំណុចក្រោមស្ពានជ្រោយចង្វារ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
ស.ពយុវជនរងគ្រោះមានឈ្មោះ ជា អេងគ័ង អាយុ២២ឆ្នាំ មុខរបរជាបកប្រែចិន ស្រុកកំណើតនៅភូមិអូឡេង ឃុំព្រែករំដេង ស្រុកស្រីសន្ធរ ខេត្តកំពង់ចាម អាសយដ្ឋានបច្ចុប្បន្នស្នាក់នៅក្រុមហ៊ុន ភីអិនអិន សង្កាត់ព្រែកតាសេក ខណ្ឌជ្រោយចង្វារ ។
ប្រភពព័ត៍មានពីនារីជាសង្សារ បានប្រាប់ថា ជនរងគ្រោះបានចេញចូលផ្ទះ និងមានទាស់ពាក្យសម្តីគ្នា០២-០៣ថ្ងៃហើយ ខណៈនៅយប់ថ្ងៃកើតហេតុ ជនរងគ្រោះបានមកផ្ទះ រួចបានប្រាប់ថា «ចាំអោយគេទៅយកស.ពរបស់គាត់ផង នៅស្ពានជ្រោយចង្វារ» រួចជនរងគ្រោះ ក៏ចេញទៅបាត់ស្រមោលតែម្តង។ ភ្លាមៗ នារីជាសង្សារ បានខលទៅប្រាប់សាច់ញាតិ ថាជនរងគ្រោះបានចេញពីផ្ទះ ទៅលោតទឹកនៅស្ពានជ្រោយចង្វារហើយ។ រហូតមកដល់ព្រឹកឡើងថ្ងៃខែឆ្នាំដដែល ក្រុមគ្រួសារ បានជួលអោយបងប្អូនប្រជានេសាទជួយចុះរាវរកស.ព។ លុះមកដល់វេលាម៉ោង៤ល្ងាច ក្រុមដែលចុះរុករកបានរាវរកឃើញ និងបានអូសស.ពឡើងមកលើគោក ដើម្បីប្រគល់ជូនសមត្ថកិច្ចជំនាញធ្វើការត្រួតពិនិត្យ ។
កម្លាំងសមត្ថកិច្ចជំនាញមូលដ្ឋាន បានចុះមកដល់ទីតាំងកើតហេតុ និងរាយការណ៍ទៅកាន់សមត្ថកិច្ចជំនាញផ្នែកបច្ចេកទេស និងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ដើម្បីធ្វើកោសលវិច័យស.ព៕
ចែករំលែកព័តមាននេះ