រាជធានីភ្នំពេញ ៖ បន្ទាប់ពីបាត់មុខជាសាធារណៈមួយរយៈរួចមក អ្នកដែលធ្លាប់ធ្វើសកម្មភាពក្នុងរឿងនយោបាយ ធ្លាប់ប្តឹងនិងប្រឆាំងលោក កឹម សុខា អតីតប្រធានស្តីទីគណបក្សសង្គ្រោះជាតិ គឺលោក ស្រី ចំរើន ធ្លាប់អះអាងថាលោកតំណាងឲ្យនិស្សិតមួយចំនួនចេញមុខតតាំងកន្លងមកនោះ ធ្លាក់ខ្លួនដើរលក់ជ្រក់ជើងមាន់ ដឹកតាមអនឡាញ(Online) ផ្ទះក៏គ្មាននៅ ស្ថាប័ន និងក្រុមហ៊ុនក៏គេមិនហ៊ានទទួលឲ្យធ្វើការ ថែមទៀត ។
នៅលើបណ្ដាញសង្គមហ្វេសប៊ុករបស់លោក ស្រី ចំរើន បានធ្វើការបង្ហោះសារនៅល្ងាចថ្ងៃទី២៣ ខែវិច្ឆិកា ឆ្នាំ២០២០នេះ បានអោយដឹងថា “«នយោបាយ » គេថា ចំរើនឯង លូកជ្រៅពេកហើយ ចុងក្រោយវាអ៊ីចឹង ! ស្ថាប័ន និងក្រុមហ៊ុន គេអត់ទទួលធ្វើការទេ ! ហើយក្រុមអតីតបក្សប្រឆាំង សើចចំអក អោយថា ចុងក្រោយលទ្ធផល សូន្យ ផេះ (ពាក្យគេនិយាយចំអកអោយ)
ខ្ញុំនៅតែរក្សាជំហរ ភាពរឹងប៉ឹងដដែល ញញឹម និងគ្រោះ១នេះ ! កូនប្រុស ៥ឆ្នាំទៀតក៏មិនហួសពេលដែរ ខ្ញុំនៅតែជា ស្រី ចំរើន ! ពេលនេះ ខ្ញុំមានជម្រើសតែមួយគត់គឺ «ដឹកអីវ៉ាន់ អនឡាន អោយភ្ញៀវ» លក់កាបូប ខោអាវ អនឡាញ និងលក់ជ្រក់ជើងមាន់ ជ្រក់ស្លឹកត្រចៀកជ្រូក ។ ពេលនេះ បានគេជួយផ្តល់ផ្ទះ អោយស្នាក់នៅបណ្តោះអាសន្ន ម៉ូតូជិះបណ្តោះអាសន្នសិន ខំរកលុយ ចាប់ផ្តើមឡើងវិញ សូមបងប្អូនជួយគាំទ្រ ខ្ញុំបាទផងណា” ។
ជុំវិញការបង្ហោះសារខាងលើនេះ អ្នកសារព័ត៌មានកោះសន្តិភាពនៅមិនទាន់អាចសុំការបំភ្លឺបន្ថែមពីលោក ស្រី ចំរើន បាននៅឡើយ នៅល្ងាចថ្ងៃទី២៤ វិច្ឆិកា២០២០នេះ នៅពេលដែលហៅទូរស័ព្ទចូលទៅ មានមនុស្សស្រីលើកនិយាយ ហើយឆ្លើយប្រាប់ខ្លីថា «លោក ស្រី ចំរើន ចេញទៅដឹកឥវ៉ាន់ឲ្យភ្ញៀវបាត់ហើយ» ។
គេនៅចាំបានថា អំឡុងខែមិនា ឆ្នាំ២០១៦ លោក ស្រី ចំរើន បានដាក់ពាក្យបណ្តឹងទៅកាន់អង្គភាពប្រឆាំងអំពើពុករលួយ (ACU) ពាក់ព័ន្ឋនឹងអំពើពុករលួយរបស់អតីតប្រធានស្តីទីគណបក្សសង្គ្រោះជាតិលោក កឹម សុខា ទិញ ដី និងផ្ទះជាច្រើនកន្លែងឲ្យស្រីស្នេហ៍ និងទាមទារឲ្យលោក កឹម សុខា ឆ្លើយបំភ្លឺរឿងខ្សែអាត់សំឡេងឆ្លើយឆ្លងជាមួយនារីម្នាក់ ។
នៅពេលនោះដែរ លោក ស្រី ចំរើន ក៏បានដាក់ញតិ្តទៅរដ្ឋសភាជាតិ ដើម្បីឲ្យលោក កឹម សុខា អតីតប្រធានស្តីទីគណបក្សសង្គ្រោះជាតិចេញមុខបកស្រាយចំពោះខ្សែអាត់សំឡេង ដែលគេយល់ថា ជាសំឡេងសាសងស្នេហារវាងលោក កឹម សុខា និងនាង ខុម ចាន់ដារាទី ឬ ស្រីមុំ ៕
ចែករំលែកព័តមាននេះ