សារព័ត៌មានបរទេសកាលពីពេល ថ្មីៗកន្លងមកផ្សាយថា ប្រទេសឡាវបានសាងសង់ផ្លូវចូលទៅ«ភ្នំភូបៀ» និងសង់បន្តរហូតកំពូលភ្នំ គឺជាគម្រោងការអភិវឌ្ឍភ្នំខ្ពស់បំផុតនៅក្នុងប្រទេសនោះដែលពីមុនជាសមរភូមិប្រយុទ្ធយ៉ាងក្តៅគគុក ឱ្យក្លាយជាប្រភពទេសចរណ៍ដ៏សំខាន់។
«ភូបៀ» ជាភ្នំខ្ពស់បំផុតនៅក្នុងប្រទេសឡាវ មានកម្ពស់២៨២០ម៉ែត្រ ស្ថិតនៅស្រុកអានូវង់ ក្រុងសៃស៊ុមប៊ូន ។ បច្ចុប្បន្នរដ្ឋាភិបាលធ្វើផ្លូវចូលទៅដល់ជើងភ្នំ និងគ្រោងសាងសង់បន្តទៅដល់កំពូលភ្នំ ដើម្បីធ្វើជាតំបន់ទេសចរណ៍ធម្មជាតិ និងជាប្រភពស្រូបយកអាកាសធាតុដ៏វិសេសវិសាលរបស់ឡាវ ។
កាលពីមុនទីតាំងនោះ គឺជាមូលដ្ឋានគ្រឹះដ៏រឹងមាំរបស់ក្រុមប្រឆាំងឡាវ ហៅថា «ក្រុមអំបូរមុង» ដែលង្កើតឡើងដោយក្រុម CIA ក្នុងសម័យសង្គ្រាមវៀតណាម ដើម្បីតស៊ូជាមួយពួកកុម្មុយនីស្តឡាវ ។ ទោះបីជាពួកកុម្មុយនីស្តក្លាយជាគណបក្សរំដោះប្រជាជនឡាវ ក្នុងពេលបច្ចុប្បន្នដែលបានកាន់អំណាចតាំងពីខែធ្នូ ឆ្នាំ១៩៦៥ក៏ដោយ ប៉ុន្តែការតស៊ូជាមួយក្រុម«អំបូរ មុង» នៅតំបន់ភូបៀនៅតែបន្តអស់រយៈពេល១០ឆ្នាំ ។
ក្នុងយុគសម័យថ្មីក្រុងសៃស៊ុមប៊ូន នៅគ្រប់គ្រងតាមបែបអាជ្ញាសឹកក្នុងនាមជាតំបន់គ្រប់គ្រងពិសេស ក្នុងរយៈពេលជាច្រើនឆ្នាំមុន ក្រោយមកត្រូវលុបចោលនៅចុងឆ្នាំ២០១៣ ហើយប្រកាសបង្កើតជាខេត្តទី១៨ របស់ប្រទេស រួមទាំងប្តូរឈ្មោះក្រុង «សៃស៊ុមប៊ូន» ទៅជាក្រុង «អានូវង់» ដើម្បីរំឭកដល់ព្រះអង្គអានូវង់ ដែលបានដឹកនាំទ័ពតស៊ូដើម្បីឯករាជ្យពីអាណាចក្រសៀម ទោះបីជាមិនបានទទួលជោគជ័យពេញលេញក៏ដោយ ។ «ភ្នំ ភូបៀ» លាតសន្ធឹងនៅលើតំបន់ជាច្រើនទាំងសៃស៊ុមប៊ូន, ឆៀងខ្វាង និងវៀងចន្ទន៍ រួមទាំងជាប្រភពអណ្តូងរ៉ែដ៏ធំមួយរបស់ប្រទេស។ បច្ចុប្បន្នអណ្តូងរ៉ែ «ភូបៀ» បានផលិតមាស ប្រាក់ និងទង់ដែង នាំចេញទៅលើទីផ្សារពិភពលោក ។
ប្រទេសឡាវ បានប្រកាសកាលពីពេល ថ្មីៗនេះថា នឹងលើកស្ទួយ និងអភិវឌ្ឍអាកាសយានដ្ឋានចំណាស់នៅតំបន់នោះឱ្យក្លាយជាអាកាសយានដ្ឋានពាណិជ្ជកម្ម ដើម្បីទ្រទ្រង់លើផ្នែកទេសចរណ៍នៅក្រុងសៃស៊ុមប៊ូន ។ នៅលើភ្នំដ៏ខ្ពស់នោះ អ្នកទេចរអាចមើលឃើញទេសភាពធម្មជាតិដ៏ស្រស់ស្អាតទាំងនៅតំបន់ឆៀងខ្វាង នៅប៉ែកខាងជើង តំបន់វៀងចន្ទន៍ រួមទាំងក្រុងវៀងចន្ទន៍ នៅភាគខាងលិច ឆៀងខាងត្បូង ។
នៅថ្ងៃអនាគតភ្នំភូបៀនឹងក្លាយជាប្រភពទេសចរណ៍ដ៏សំខាន់មួយនៅលើពិភពលោក និងនៅខែធ្នូខាងមុខ អាជ្ញាធរនឹងរៀបចំពិធីទេសចរណ៍ជាផ្លូវការស្របគម្រប់២ឆ្នាំនៃការបង្កើតទីក្រុងនោះ ៕
ចែករំលែកព័តមាននេះ