រាជធានីភ្នំពេញ ៖ នៅពេលនិយាយដល់បញ្ហាលុយ គ្មាននរណាម្នាក់បដិសេធបានទេថាពួកគេមិនត្រូវការលុយនោះ ។
ជាក់ស្តែងកន្លងមក អ្នកជំនាញបានបង្ហាញនូវក្តីព្រួយបារម្ភខ្លាំង ដោយសារតែអ្នកខ្ចីប្រាក់កម្ចីពីគ្រឹះស្ថានធនាគារ និងហិរញ្ញវត្ថុមួយចំនួនរបស់ប្រជាពលរដ្ឋនាពេលកន្លងមកមិនបានប្រើប្រាស់លុយដែលខ្ចីនោះបានត្រឹមត្រូវនោះទេ ពោល គឺមិនបានយកប្រាក់ដែលបានខ្ចីទៅបង្កើតមុខរបរថ្មីសម្រាប់បង្កើនប្រាក់ចំណូលសម្រាប់គ្រួសារ ដែលពេលខ្លះធ្វើឲ្យកើនតែបំណុលនោះ ។
យ៉ាងណាមិញបងប្អូនមួយចំនួនដែលបានទទួលប្រាក់កម្ចីកន្លងមកយកមកប្រើប្រាស់ចំគោលដៅបានចែករំលែកនូវបទពិសោធន៍របស់ខ្លួនថាធ្វើយ៉ាងណាប្រើប្រាស់ប្រាក់កម្ចីឲ្យបានត្រឹមត្រូវនិងធ្វើយ៉ាងណាដើម្បីមានប្រាក់សងទៅស្ថាប័នធនាគារនិងហរិញ្ញវត្ថុបានទាន់ពេលវេលា ។
លោក ខេម សំអុល ជាបុគ្គលិកបម្រើការងារនៅស្ថាប័នមួយកន្លែង និង ភរិយា អ្នកស្រី ម៉េង លីម៉ាច ជាកសិករធ្វើចម្ការ ដែលពឹងផ្អែកលើដំណាំដំឡូង និងស្វាយចន្ទី ក្នុងខេត្តក្រចេះ ។ គ្រួសារលោកសំអុល បានស្គាល់ពីសេវាហិរញ្ញវត្ថុតាមរយៈការផ្សព្វផ្សាយពីបុគ្គលិកគ្រឹះស្ថានមីក្រូហិរញ្ញវត្ថុ ពេលចុះមកតាមភូមិ ដោយ គ្រួសាររបស់លោក បានចាប់ផ្ដើមប្រើប្រាស់ប្រាក់កម្ចីជាក្រុមលើកដំបូង ចំនួន៥០០,០០០រៀល ។ ដោយលោក និងភរិយាមានបំណងបង្កើតមុខរបរថ្មីផ្សេង ដើម្បីបង្កើនចំណូលលោកបានសម្រេចចិត្តស្នើរសុំប្រាក់កម្ចី ចំនួន៥. ០០០ ដុល្លារអាមេរិក ដើម្បីទិញឡានកែច្នៃ ក្នុងគោលបំណងយកមកស៊ីឈ្នួលដឹកដំឡូង ដោយទទួលបានកំរ៉ៃ ១៥.០០០រៀល ក្នុងមួយតោន ។
ដោយមុខរបរថ្មីជួយអោយលោករកប្រាក់ចំណូលបានច្រើនជាងមុន លោក សំអុល និងភរិយាបានពង្រីកផ្ទៃដីដាំដុះដំឡូង ស្វាយចន្ទី បន្ថែមដំណាំស្វាយកែវរមៀត តាមរយៈប្រាក់កម្ចីបន្តបន្ទាប់ពីគ្រឹះស្ថានមីក្រូហិរញ្ញវត្ថុដដែល ។ តាមរយៈការប្រើប្រាស់ប្រាក់កម្ចីទាំង ៥លើក លោក និងភរិយា បានចែករំលែកបទពិសោធន៍ពីការគ្រប់គ្រង និងប្រើប្រាស់ប្រាក់កម្ចីថា «ដើម្បីឲ្យមានប្រាក់សងទាន់ពេលវេលា អ្នកខ្ចីប្រាក់មិនគួរពឹងផ្អែកតែលើប្រាក់ចំណូលតែមួយប្រភពនោះទេ ហើយអ្នកខ្ចីគម្បីសន្សំប្រាក់ត្រៀមទុកអោយបានមុនថ្ងៃសង និងរៀបចំផែនការប្រមូលផលឲ្យបានមុនថ្ងៃសងប្រាក់» ។
លោកបានបន្តទៀតថា តាមរយៈប្រាក់កម្ចីដោយជោគជ័យទាំង៥វគ្គ ធ្វើឲ្យជីវភាពគ្រួសាររបស់លោកផ្លាស់ប្ដូរច្រើន មានប្រាក់សមរម្យអាចផ្គត់ផ្គង់ជីវភាពគ្រួសារ និងពង្រីកដីចម្ការ ថែមទាំងមានចំណូលទៀងទាត់ពីរបរស៊ីឈ្នួលដឹកដំឡូងរបស់លោក ។ លោកបញ្ជាក់ថា បើចាំសន្សំលុយខ្លួនឯង ត្រូវការពេលយូរ ហើយមិនដឹងជា សន្សំបានអត់ផង ដូចនេះប្រាក់កម្ចី ជួយអោយលោកឆាប់ពង្រីកមុខរបររបស់គាត់បានទាន់ចិត្ត ។
លោក និងភរិយាមិនមានគម្រោងស្នើរសុំកម្ចីប្រាក់ពីគ្រឹះស្ថានមីក្រូហិរញ្ញវត្ថុណាផ្សេងទៀតទេ លោកចង់ផ្អាកមួយរយៈ ដោយសារតែមានប្រាក់សមល្មមអាចផ្គត់ផ្គង់ជីវភាព និងធ្វើចំការបាន ម្យ៉ាងលោកមានបំណងរៀបចំផែនការសន្សំប្រាក់ ប៉ុន្តែបើសិនជាលោក និងភរិយាមានគម្រោងពង្រីក ឬបង្កើតមុខរបរថ្មី លោកនឹងធ្វើសំណើរសុំកម្ចីសារជាថ្មីពីគ្រឹះស្ថានមីក្រូហិរញ្ញវត្ថុ ៕
ចែករំលែកព័តមាននេះ