ខេត្តស្វាយរៀង ៖ កម្មករ-កម្មការិនីចំនួន៤២នាក់ភ័យស្ទើរលស់ព្រលឹង ខណៈដែលអ្នកបើករថយន្ដបើកជែងគ្នាក្នុងស្ថានភាពគ្រោះថ្នាក់ ហើយគេចពីម៉ូតូដែលបើកបញ្ច្រាសគ្នាក៏ជ្រុលទៅធ្លាក់ក្នុងស្រែ សំណាងល្អមិនក្រឡាប់ និងមិនបង្កឲ្យមានអ្នករងរបួស។ ហេតុការណ៍ខាងលើនេះបានកើតឡើងកាលពីវេលាម៉ោង៦និង៣០នាទីព្រឹកថ្ងៃទី១៩ ខែវិច្ឆិកា ឆ្នាំ២០២០…
ខេត្តស្វាយរៀង ៖ កម្មករ-កម្មការិនីចំនួន៤២នាក់ភ័យស្ទើរលស់ព្រលឹង ខណៈដែលអ្នកបើករថយន្ដបើកជែងគ្នាក្នុងស្ថានភាពគ្រោះថ្នាក់ ហើយគេចពីម៉ូតូដែលបើកបញ្ច្រាសគ្នាក៏ជ្រុលទៅធ្លាក់ក្នុងស្រែ សំណាងល្អមិនក្រឡាប់ និងមិនបង្កឲ្យមានអ្នករងរបួស។
ហេតុការណ៍ខាងលើនេះបានកើតឡើងកាលពីវេលាម៉ោង៦និង៣០នាទីព្រឹកថ្ងៃទី១៩ ខែវិច្ឆិកា ឆ្នាំ២០២០ នៅលើផ្លូវជាតិលេខ១ ត្រង់ចន្លោះគីឡូម៉ែត្រលេខ១២៦និង១២៧ ស្ថិតក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀង ខេត្តស្វាយរៀង ។
តាមសមត្ថកិច្ចនគរបាលក្រុងបានឱ្យដឹងថា អ្នកបើករថយន្តឈ្មោះខាត់ សារ៉ាន អាយុ៣៦ឆ្នាំ មុខរបរបើកបររថយន្ត រស់នៅភូមិព្រៃដំឡូង ឃុំពោធិរាជ ស្រុកស្វាយជ្រំ ខេត្តស្វាយរៀង ត្រូវបានសមត្ថកិច្ចឃាត់ខ្លួនមកសាកសួរ ។ ចំណែកកម្មករ-កម្មការិនីចំនួន៤២នាក់ក្នុងនោះមានបុរសចំនួន៤នាក់ មិនមិននរណាម្នាក់រងគ្រោះថ្នាក់អ្វីនោះទេ គ្រាន់តែភ័យព្រលឹងចុងសក់។
តាមប្រភពព័ត៌មានបានបន្តថា អ្នកបើកបរម៉ូតូឈ្មោះមុំ សុភត្ត្រា ភេទប្រុស អាយុ៣៥ឆ្នាំ មុខរបរលក់ដូរ និងកូនប្រុសឈ្មោះភិន ពៅសំបូរ អាយុ៧ឆ្នាំ មុខរបរសិស្ស រស់នៅភូមិកណ្ដៀងរាយ ឃុំកណ្ដៀងរាយ ស្រុកស្វាយទាប ខេត្តស្វាយរៀង។
បើតាមសាក្សីបានឱ្យដឹងថា មុនពេលកើតហេតុ មានរថយន្តដឹកកម្មករមួយគ្រឿងម៉ាកហ៊ីយ៉ាន់ដាយ ពណ៌ទឹកដោះគោ ពាក់ស្លាកលេខ ភ្នំពេញ 3A-6478 បើកបរក្នុងទិសដៅពីលិចទៅកើត ដោយមានដឹកកម្មកររោងចក្រពេញរថយន្ត ហើយក៏បើកបររថយន្ដវ៉ាជែងក្នុងស្ថានភាពគ្រោះថ្នាក់ ខណៈនោះមានម៉ូតូមួយគ្រឿងជិះគ្នា២នាក់ម៉ាកហុងដា ធុនសេ១២៥ ពណ៌ខ្មៅ ពាក់ស្លាកលេខស្វាយរៀង 1J-1332 ក្នុងទិសដៅបញ្ច្រាសគ្នា រួចក៏បើកគេចចេញពីម៉ូតូធ្លាក់ចូលស្រែ ប៉ុន្តែសំណាងល្អ ដោយមិនក្រឡាប់ ចំណែកអ្នកបើកម៉ូតូក៏មិនមានរងរបួសអ្វីដែរ។
ក្រោយពេលកើតហេតុ សមត្ថកិច្ចបានមកដល់ធ្វើការវាស់វែងនិងអូសយកទាំងម៉ូតូ និងរថយន្ត ទៅរក្សាទុកនៅការិយាល័យចរាចរណ៍ខេត្តដើម្បីធ្វើការដោះស្រាយនៅពេលក្រោយ៕ (កែសម្រួលដោយ ៖ ធីតា)
ចែករំលែកព័តមាននេះ