ខេត្តកំពង់ឆ្នាំង ៖ មន្ត្រីខណ្ឌរដ្ឋបាលជលផល៣ខេត្ត មានខេត្តកំពង់ឆ្នាំង ខេត្តពោធិ៍សាត់ និងខេត្តកំពង់ធំ រួមនិងអធិការដ្ឋានរដ្ឋបាលជលផល ខាងត្បួងបឹងទន្លេសាប នៅថ្ងៃទី១៧ ខែវិច្ឆិកា…
ខេត្តកំពង់ឆ្នាំង ៖ មន្ត្រីខណ្ឌរដ្ឋបាលជលផល៣ខេត្ត មានខេត្តកំពង់ឆ្នាំង ខេត្តពោធិ៍សាត់ និងខេត្តកំពង់ធំ រួមនិងអធិការដ្ឋានរដ្ឋបាលជលផល ខាងត្បួងបឹងទន្លេសាប នៅថ្ងៃទី១៧ ខែវិច្ឆិកា ឆ្នាំ២០២០ បានសហការគ្នាបើកយុទ្ឋនាការបង្ក្រាបរួមគ្នា នូវបទល្មើសនេសាទ ដាក់របាំង ស្បៃមុង និងរបាំងសាច់អួន ក្នុងភូមិសាស្ត្រព្រុំប្រទល់ជាប់គ្នាទាំង៣ខេត្ត នៅចំណុច ក.ដប ។
លោក លី ឡា នាយខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានឱ្យដឹថា រយៈពេលពេញមួយថ្ងៃកាលពីម្សិលមិញនេះ មន្ត្រីរដ្ឋបាលជលផល ខាងត្បូងបឹងទន្លេសាប បានសហការជាមួយ នឹងមន្ត្រី រដ្ឋបាលជលផល ទាំង៣ ខេត្តមាន៖ ខេត្តកំពង់ឆ្នាំង ខេត្តពោធិសាត់ និងខេត្តកំពង់ធំ សរុបមានគ្នាចំនួន ៣០នាក់ មធ្យោបាយ កាណូតចំនួន ៦គ្រឿង បានប្រតិបត្តិការចុះបង្ក្រាបបទល្មើសនេសាទដាក់របាំងស្បៃមុង របាំងសាច់អួន នៅចំណុចព្រំប្រទល់ជាប់គ្នា៣ខេត្តនៅចំណុច ក.ដប។
លោកបានបញ្ជាក់ថា៖ នៅចំណុច ក ដប គឺជាចំណុចសំខាន់ ព្រោះវាជាច្រកផ្លូវរបស់ហ្វូងត្រី ចេញពីបឹងទន្លេសាប ចុះមកតាមដៃទន្លេ ដែលនឹងដល់ខែត្រីប្រហុកក្នុងពេលយ៉ាងខ្លីខាងមុខនេះ ។ ដោយសារតែចំណុចនេះជាចំណុចសំខាន់ របស់ត្រីបែបនេះហើយ ទើបរៀងរាល់ឆ្នាំ បទល្មើសនេសាទនៅចំណុចនេះ តែងកើតមានឡើងគ្មានឈប់ឈរ ។ ហើយការសហការគ្នាបង្ក្រាបបែបនេះ ក្នុងគោលបំណងបើកផ្លូវឱ្យត្រីបានចេញ ពីបឹងទន្លេសាប ចុះមកតាមដងទន្លេ សម្រាប់ឱ្យប្រជាពលរដ្ឋបាននេសាទ ក៍ដូចជាដល់រដូវធ្វើត្រីប្រហុកផងដែរ ។
លោក លី ឡាបានបញ្ជាក់ពីលទ្ឋផលនៃការបង្ក្រាបថា៖ គឺបំផ្លាញចោលនូវរបាំងស្បៃមុង ២៧ កន្លែងមានចំនួន១ ១០០ ម៉ែត្រ លបលូ ស្បៃម៉ុងចំនួន ២៩គ្រឿង បង្គោលចំនួន៦០០ ដើមនិង ចាក់លែងកូនត្រីចម្រុះជាង១០០គីឡូក្រាម។ បង្ក្រាបរបាំងសាច់អួនប្រវែង ៨០០ម៉ែត្រ មានចំនួន៤កន្លែង លបលូ សាច់អួនចំនួន៨ គ្រឿង បង្គោលចំនួន ៥០០ ដើម និងចាក់លែងកូនត្រីចម្រុះជាង២០គីឡូក្រាម ។
សូមបញ្ជាក់ថា៖ បទល្មើសនេសាទ ច្រើនប្រភេទមានដាក់របាំងស្បៃមុង របាំងសាច់អួន ដាក់សម្រាស់ នៅតែកើតមានឡើងនៅគ្រប់កន្លែង បើទោះ បីមានការប្រឹងបង្ក្រាប របស់មន្ត្រីជំនាញយ៉ាងណាក្តី៕ (កែសម្រួលដោយ ៖ ធីតា)
ចែករំលែកព័តមាននេះ