ខេត្តកណ្តាល ៖ សមត្ថកិច្ចអះអាងថា នារីម្នាក់ជិះម៉ូតូឆ្លងផ្លូវខ្វះការប្រុងប្រយ័ត្នត្រូវបានឡានមួយគ្រឿងបុកស្លាប់ភ្លាម ៗ ប៉ុន្តែយ៉ាងណាម្ចាស់ឡានត្រូវបានសមត្ថកិច្ចឃាត់ខ្លួន ដើម្បីបន្តនីតិវិធី ។
គ្រោះថ្នាក់ចរាចរណ៍នេះកើតឡើង កាលពីវេលាម៉ោងជាង១២ រំលងអធ្រាត្រឈាន ចូលថ្ងៃទី១៨ ខែវិច្ឆិកា ឆ្នាំ២០២០ នៅចំណុចភ្លើងស្តុបផ្លូវ១១០ កែងផ្លូវជាតិលេខ២១ ស្ថិតនៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្ដាល ។
លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅបានប្រាប់អោយដឹងថា ម្ចាស់ឡានមាន ឈ្មោះតាំង ស៊ីគុយ ភេទប្រុស អាយុ៣១ឆ្នាំ មានទីលំនៅភូមិកណ្ដាល សង្កាត់រលួស ខណ្ឌដង្កោ រាជធានីភ្នំពេញ ។
លោកអធិការបន្តថា មុនពេលកើតហេតុ មានម៉ូតូមួយគ្រឿងម៉ាក HONDA ZOOMER-X ពណ៌ស ពាក់ស្លាកលេខភ្នំពេញ 1FZ-4991 មិនពាក់មួកសុវត្ថិភាព តែមានកញ្ចក់មើលក្រោយ អ្នកបើកម៉ូតូឈ្មោះ នី ភេទស្រី អាយុប្រហែល២៧ឆ្នាំ ស្នាក់នៅផ្ទះជួល ក្រុងតាខ្មៅបានស្លាប់ ត្រូវបានយកសពទៅតម្កល់ទុកនៅវត្តព្រែកសំរោង រង់ចាំសាច់ញាតិយកទៅធ្វើបុណ្យតាមប្រពៃណី ។
ម៉ូតូបើកឆ្លងផ្លូវក្នុងទិសដៅពីកើតទៅលិចក៏បានបុកជាមួយរថយន្តមួយគ្រឿងម៉ាក TOYOTA HIGHLANDER ពណ៌ក្រហម ពាក់ស្លាកលេខភ្នំពេញ 2AR-9582 អ្នកបើកបររថយន្តឈ្មោះតាំង ស៊ីគុយ ដោយរថយន្តបើកបរក្នុងទិសដៅពីជើងទៅត្បូង ។ ចំពោះមូលហេតុនៃគ្រោះថ្នាក់ចរាចរណ៍នេះត្រូវបានសមត្ថកិច្ចអះអាងថា បណ្តាលមកពីអ្នកបើកម៉ូតូ និងអ្នកបើកឡានបើកបរខ្វះការប្រុងប្រយ័ត្នដូចគ្នា ៕
ចែករំលែកព័តមាននេះ