ខេត្តកំពង់ឆ្នាំង ៖ គ្រាន់តែរដូវប្រាំងចូលមកដល់ភ្លាម បទល្មើសនេសាទដាក់សម្រាស់បានចាប់ផ្តើមកក្រើកឡើងវិញគួរឱ្យព្រួយបារម្ភ ។ ជាការគួរឲ្យកត់សម្គាល់ បទល្មើសទាំងនោះបានកើត
ឡើងនៅក្នុងភូមិសាស្ត្រឃុំប្រឡាយមាស ស្រុកកំពង់លែង ដែលត្រូវបានគេមើលឃើញមានដើមរាំងធំៗជាច្រើន ត្រូវបានក្រុមជនល្មើសកាប់មែកទម្លាក់ទឹក សល់តែដើមកំបុតចុង និងខ្លះទៀតសល់តែគល់ត្រឹមផ្ទៃទឹករាប់សិបដើម ។ ចំណែកមែកធ្លាក់ក្នុងទឹក គេត្រៀមលើកដាក់ទូកយកទៅដាក់តាមគោលដៅ ដែលពួកគេត្រូវដាក់ជាសម្រាស់ដើម្បីចាប់ត្រី ។ ចំណកកន្លែងខ្លះទៀត មានដាក់សម្រាស់ក្នុងទន្លេលេចចេញតែចុងមែកឈើផុតទឹកនៅស្រស់ៗនៅឡើយ ។
នៅព្រឹកថ្ងៃទី១៦ ខែវិច្ឆិកា ឆ្នាំ២០២០ នៅចំណុចកាម៉ាល់ ក្នុងឃុំប្រឡាយមាស គេបានប្រទះឃើញទូកធំ១គ្រឿងដឹកសម្រាស់ពេញសំពោងពីលើ ដោយមានកាណូតបាឡាស្មាច់១គ្រឿងកំពុងអូស ក្នុងគោលបំណងយកទៅដាក់ក្នុងទន្លេនៅកន្លែងណាមួយ ដែលខុសនឹងច្បាប់ស្តីពីជលផល ។ ពេលនោះដែរ គ្រាន់តែឃើញអ្នករាយការណ៍ព័ត៌មានដែលប្រទះឃើញដោយចៃដន្យ ក្រុមអ្នកបើកកាណូតអូសសម្រាស់ទាំងនោះ បាននាំគ្នាផ្តាច់ខ្យែអូសទូកដឹកសម្រាស់នោះចេញ រួចបើកកាណូតបាឡាស្មាច់គេចខ្លួនបាត់ ។ ក្រោយពីឃើញបែបនេះ ក្រុមអ្នកសារព័ត៌មានបានរាយការណ៍ទៅមន្ត្រីជំនាញ ដើម្បីចុះមកចាត់ការតាមផ្លូវច្បាប់ ។
លោក តាត សីហាក់ នាយរងខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្ត បានបញ្ជាក់ថា មន្ត្រីជំនាញពិតជាបានទៅទទួលយកទូកជាមធ្យោបាយដឹកសម្រាស់ និងសម្រាស់ជាបទល្មើសនោះហើយ និងបានកសាងសំណុំរឿងបញ្ជូនទៅសាលាដំបូងរួចហើយដែរ តែចំពោះជនល្មើសចាប់ពុំបានទេ ព្រោះពួកគេរត់បាត់អស់ ។
ទោះជាយ៉ាងនេះក្តី ក្រុមប្រជាពលរដ្ឋដែលកំពុងដាក់មងចាប់ត្រីនិយាយថា ពួកគាត់បានឃើញក្រុមល្មើសកាប់ដើមឈើធ្វើជាសម្រាស់រាល់ថ្ងៃ ។ ពេលថ្ងៃពួកគេកាប់ដើមរាំង ដើមសង្កែង និងដើមឈើព្រៃលិចទឹកជាច្រើនប្រភេទទៀតទម្លាក់ទឹក លុះដល់ព្រលប់ទើបយកទូកកាណូតមកដឹកចេញ ។ ក្រុមល្មើសធ្វើសកម្មភាពបែបនេះរាល់ថ្ងៃ ហាក់គ្មានខ្លាចមន្ត្រីជំនាញណាឡើយ ហើយពួកគាត់ជាប្រជាពលរដ្ឋមិនហ៊ានធ្វើអ្វីគេទេ ព្រោះពួកគេទាំងនោះ(ក្រុមល្មើស)ប្រាប់ថា បានបង់លុយឱ្យសមត្ថកិច្ចអស់ហើយ ។
ចំណែកពួកគាត់ជាប្រជាពលរដ្ឋស្លូតត្រង់ បានត្រឹមតែដាក់មង ចងសន្ទូច មិនហ៊ានធ្វើអ្វីខុសនឹងច្បាប់ទេ ហើយដោយសារតែមានបទល្មើសកើតឡើងបែបនេះហើយ ទើបពួកគាត់ធ្វើនេសាទដោយឧបករណ៍ស្របច្បាប់ រកលែងបានស្ទើរដាច់បាយហើយ ៕
ចែករំលែកព័តមាននេះ