ខេត្តកំពត ៖ ករណីគ្រោះថ្នាក់ចរាចរណ៍បុករត់បន្សល់ទុកតែស្លាកលេខរថយន្ត ភ្នំពេញ 2BJ-2235 លោកស្នងការនគរបាលខេត្តកំពត បានប្រកាសរកយុត្តិធម៌ជូនអ្នករងគ្រោះ និងកោះហៅម្ចាស់រថយន្តបង្ក ត្រូវចូលខ្លួនដោះស្រាយតាមផ្លូវច្បាប់ ខណៈឮដំណឹងថា…
ខេត្តកំពត ៖ ករណីគ្រោះថ្នាក់ចរាចរណ៍បុករត់បន្សល់ទុកតែស្លាកលេខរថយន្ត ភ្នំពេញ 2BJ-2235 លោកស្នងការនគរបាលខេត្តកំពត បានប្រកាសរកយុត្តិធម៌ជូនអ្នករងគ្រោះ និងកោះហៅម្ចាស់រថយន្តបង្ក ត្រូវចូលខ្លួនដោះស្រាយតាមផ្លូវច្បាប់ ខណៈឮដំណឹងថា តំណាងរថយន្តបង្ក ទូរស័ព្ទទៅគំរាមជនរងគ្រោះ ថែមទៀត ។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត នៅព្រឹកថ្ងៃទី១៧ វិច្ឆិកា ២០២០នេះ បានកោះហៅម្ចាស់រថយន្តបង្កគ្រោះថ្នាក់ចរាចរណ៏ ឈ្មោះ ឆាយ សុខហៃ ភេទប្រុស អាយុ៣០ឆ្នាំ រស់នៅភូមិព្រៃឈើទាល ឃុំប្រភ្នំ ស្រុកអង្គរជ័យ ខេត្តកំពត ឲ្យចូលមកដោះស្រាយ នៅស្នងការដ្ឋានខេត្តកំពត អោយបានឆាប់ជាទីបំផុត ។
លោកឧត្តមសេនីយ៍ទោស្នងការ អោយដឹងថា “ករណីគ្រោះថ្នាក់ចរាចរណ៍បុករត់ នៅស្រុកអង្គរជ័យ ខ្ញុំត្រូវរកយុត្តិធម៌ ជូនអ្នករងគ្រោះឲ្យបាន ។ ម្ចាស់រថយន្តត្រូវចូលខ្លួនដោះស្រាយតាមផ្លូវច្បាប់ ជាមួយជនរងគ្រោះ ។ ឮដំណឹងថា ទូរស័ព្ទទៅគំរាមជនរងគ្រោះទៀត អាណិតជនរងគ្រោះទាំង២នាក់ខ្លាំងណាស់ ស្អែកនេះនឹងឲ្យតំណាងយកថវិកាបន្តិចបន្តួច ដើម្បីជូនគាត់ទាំង២ ដើម្បីព្យាបាលខ្លួន” ។
លោកស្នងការនគរបាលខេត្តកំពត ក៏បានបញ្ជាទៅអធិការស្រុកឲ្យរៀបចំបញ្ជូនសំណុំរឿងករណីគ្រោះថ្នាក់ចរាចរណ៍បុករត់បន្សល់ទុកតែស្លាកលេខ ភ្នំពេញ 2BJ-2235 បញ្ជូនទៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពត ដើម្បីដោះស្រាយ ហើយលោកឧត្ដមសេនីយ៍ទោស្នងការ នឹងតាមដានករណីនេះ ដោយយកចិត្តទុកដាក់បំផុត ។ លោកថា “សូមកុំបារម្ភករណីនេះ លោកខិតខំដោះស្រាយរកយុត្តិធម៌ជូនជនរងគ្រោះឲ្យបាន” ។
សូមរម្លឹកថា ហេតុការណ៍គ្រោះថ្នាក់ចរាចរណ៍មួយ រវាងរថយន្តបុកជាមួយម៉ូតូ បណ្តាលឲ្យដួល រងរបួស២នាក់(ប្តីនិងប្រពន្ធដែលមានផ្ទៃពោះជិតគ្រប់ខែ) រួចហើយរថយន្តបង្កបើកគេចបាត់ កាលពីវេលាម៉ោង១៧ និង២០នាទី ថ្ងៃទី៧ ខែវិច្ឆិកា ឆ្នាំ២០២០ នៅលើកំណាត់ផ្លូវជាតិលេខ៣១ ចន្លោះបង្គោលគីឡូម៉ែត្រលេខ៩ និងលេខ១០ ស្ថិតនៅភូមិត្រពាំងស្លា ឃុំសំឡាញ ស្រុកអង្គរជ័យ ខេត្តកំពត ។
គ្រោះថ្នាក់ចរាចរណ៍នេះ ក្នុងទិសដៅស្របគ្នា ពីជើងទៅត្បូង រថយន្តត្រឡប់ក្រោយដោយមិនបានឲ្យភ្លើងសញ្ញាគ្រប់គ្រាន់ បានបុកម៉ូតូរបស់ជនរងគ្រោះ ។ អ្នកបើកបរម៉ាក HONDA Dream C125 ពណ៌ខ្មី ពាក់ស្លាកលេខ 1O-5154 កំពត ឈ្មោះ ដេន ប៊ុនធឿន ភេទប្រុស អាយុ២៥ឆ្នាំ រស់នៅភូមិស្រែត្រែង ឃុំវត្តអង្គខាងជើង ស្រុកបន្ទាយមាស ខេត្ត កំពត រងរបួសស្រាល ពាក់មួកសុវត្តិភាព ម៉ូតូខូចខាតស្រាល និងមានអ្នករួមដំណើរចំនួន២នាក់១-ឈ្មោះ ម៉ន ស្រីអូន ភេទស្រី អាយុ២១ឆ្នាំ ត្រូវជាប្រពន្ធ រស់នៅភូមិឃុំជាមួយគ្នា រងរបួសធ្ងន់ បាក់ជើងស្តាំ បញ្ជូនមកសំរាកព្យាបាលនៅមន្ទីរពេទ្យបង្អែកស្រុកអង្គរជ័យតាមរថយន្តសង្គ្រោះ ២-ឈ្មោះ នេន វិសាល ភេទប្រុស អាយុ៤ឆ្នាំ ត្រូវជាកូនរងរបួសស្រាល ។ ចំណែកអ្នកបើកបររថយន្តបង្ក ក្រោយពេលកើតហេតុ បានបើករត់គេចបាត់ ដោយមិនស្គាល់អត្តសញ្ញាណអ្នកបើកបរ តែបានជ្រុះស្លាកលេខរថយន្ត នៅកន្លែងកើតហេតុ 2BJ-2235 ភ្នំពេញ (សមត្ថកិច្ចបានយកមករក្សាទុក ស្រាវជ្រាវស្វែងរកមកដោះស្រាយតាមផ្លូវច្បាប់) ។ សម្ភារវត្ថុតាង ដែលមានការពាក់ព័ន្ធ ក្នុងករណីខាងលើនេះ មានម៉ូតូចំនួន ១គ្រឿង បានប្រគល់អោយម្ចាស់ប្រើប្រាស់បណ្តោះអាសន្ន ។
ដោយឡែកនៅថ្ងៃទី១៦ វិច្ឆិកា ម្សិលមិញនេះ បើយោងតាមហ្វេសប៊ុករបស់លោក ផែង វណ្ណៈ បានឲ្យដឹងថា «ជូនម្ចាស់លេខទូរស័ព្ទ ០៧៨ ៤០៤០២៤ តំណាង ម្ចាស់រថយន្តបង្កមេត្តាជ្រាប ថ្ងៃនេះ ខ្ញុំបានទទួលទទួលព័ត៌មានពីជនរងគ្រោះមកថា មានលេខទូរស័ព្ទខាងលើនេះ បានទូរស័ព្ទមកគាត់ ដោយអះអាងថា ខ្លួនជាតំណាងម្ចាស់រថយន្ត Ford Pick Up ផ្លាកលេខភ្នំពេញ 2BJ-2235 ដោយបានប្រាប់គ្រួសារជនរងគ្រោះថា រឿងគ្រោះថ្នាក់ចរាចរណ៍នេះ មិនបាច់ទៅដោះស្រាយដល់ស្រុកទេ ដោះស្រាយត្រឹមឃុំ បានហើយ យកផ្លាកលេខរថយន្តមកឲ្យគេ គេបង់លុយ ១លានរៀល ឲ្យទៅមើលជំងឺ ដើម្បីបញ្ចប់រឿង ។ ម្ចាស់ទូរស័ព្ទនោះ បានព្រមានគ្រួសារជនរងគ្រោះថា បើមិនយកលុយ ១លាន ដើម្បីបញ្ចប់រឿងទេ គេសុខចិត្តយកលុយទៅតម្កល់នៅតុលាការចោល ហើយមិនសងទេ ចង់ប្ដឹងយ៉ាងម៉េច ក៏ប្ដឹងទៅ» ។
លោក ផែង វណ្ណៈ បញ្ជាក់ថា “ខ្ញុំគ្រាន់តែឮគ្រួសារជនរងគ្រោះផ្ដល់ព័ត៌មានបែបនេះមក ក្ដៅឆេវតែម្ដង ។ ខ្ញុំសូមប្រាប់ទៅម្ចាស់លេខទូរស័ព្ទ ដែលជាតំណាងម្ចាស់រថយន្តថា ខ្ញុំសុំបុកម៉ែលោកឯង និងប្រពន្ធលោកឯងកំពុងពោះធំជិតគ្រប់ខែ ហើយខ្ញុំសង ១០លានរៀល លោកឯងយកអត់ ? ម៉េចលោកឯងអាងមានលុយ ចង់មើលងាយអ្នកក្រឬ ? ខ្ញុំសូមផ្ដាំលោកថា លោកមិនអាចគេចផុតពីសំណាញ់ច្បាប់ទេ សូមកុំព្រហើន ។ បើលោកមិនដោះស្រាយ សំណងសងដល់ជនរងគ្រោះបានសមរម្យទេ ខ្ញុំនឹងស្នើសុំនគរបាលដកហូតយករថយន្ត ទៅរក្សាទុក នៅស្នងការដ្ឋាននគរបាលខេត្តកំពត ដើម្បីកសាងសំណុំរឿងបញ្ជូនទៅតុលាការ ។ ខ្ញុំមិនឲ្យលោកឯង មើលងាយប្រជាពលរដ្ឋក្រីក្របាជាដាច់ខាត ។ ទៅដល់ណា ក៏ខ្ញុំទៅដល់ដែរ ខ្ញុំនឹងតាមដានករណីនេះ រហូតដល់ជនរងគ្រោះ ទទួលបានយុត្តិធម៌ពិតប្រាកដ” ៕
ចែករំលែកព័តមាននេះ