យន្តហោះប្រើថាមពលពន្លឺព្រះអាទិត្យហោះឆ្លងកាត់មហាសមុទ្រប៉ាស៊ីហ្វិក
យន្តហោះប្រើថាមពលព្រះអាទិត្យ SOLAR IMPULSE-2 បានហោះចេញពីប្រទេសចិន កាលពីយប់ថ្ងៃទី៣០ មក ៣១ ឧសភា ហើយហោះឆ្ពោះទៅកាន់កោះហាវ៉ៃ ដែលនេះជាដំណាក់កាលសំខាន់
យន្តហោះប្រើថាមពលព្រះអាទិត្យ SOLAR IMPULSE-2 បានហោះចេញពីប្រទេសចិន កាលពីយប់ថ្ងៃទី៣០ មក ៣១ ឧសភា ហើយហោះឆ្ពោះទៅកាន់កោះហាវ៉ៃ ដែលនេះជាដំណាក់កាលសំខាន់នៃការហោះហើរជុំវិញពិភពលោករបស់យន្តហោះនោះ ។
ប្រើថាមពលព្រះអាទិត្យសុទ្ធ យន្តហោះនេះបានហោះចេញនាវេលាម៉ោង២និង៤០នាទី ម៉ោងក្នុងស្រុក ចេញពីទីក្រុងណានគីនភាគខាងកើតចិន ។ ការហោះចេញពីទីនោះត្រូវបានពន្យារពេលជាច្រើនលើកដោយសារបញ្ហាឧតុនិយមមិនអំណោយផល ។
យន្តហោះ SOLAR IMPULSE-2 ពុំធ្លាប់ដែលហោះកាត់ពីលើមហាសមុទ្រ ហើយស្ថិតនៅលើអាកាសហួសពី២៤ម៉ោងឡើយ ។ លើកនេះអ្នកបើកជនជាតិស្វ៊ីស លោក ANDRE BORSCHBERG ត្រូវស្ថិតលើយន្តហោះនេះ៦ថ្ងៃ និង៦យប់ដើម្បីអាចហោះហើរក្នុងចម្ងាយផ្លូវ៨.៥០០គីឡូម៉ែត្រ ។ អ្នកបើកយន្តហោះរូបនេះអាចដេកបានក្នុងមួយថ្ងៃត្រឹម២០នាទី ។ បន្ទប់យន្តហោះនេះដែលមានកៅអីតែមួយមានដាក់ប្រព័ន្ធបន្ទប់ទឹកមួយ ។ ក្នុងករណីដែលយន្តហោះជួបប្រទះការខូចធ្ងន់ធ្ងរពេលកំពុងហោះហើរ អ្នកបើករូបនេះអាចលោតចេញតាមឆត្រយោងមកក្នុងទឹកសមុទ្រ ។ ពុំមាននាវាណាមួយអាចបើកតាមដានយន្តហោះនេះដែលហោះហើរក្នុងល្បឿនលឿនបំផុតត្រឹម៩០គីឡូម៉ែត្រក្នុង១ម៉ោងក្នុងកម្ពស់ទាប និង១៤០គីឡូម៉ែត្រក្នុង១ម៉ោងពេលហោះខ្ពស់ឡើយ ។
យន្តហោះ SOLAR IMPULSE-2 ដែលមានស្លាបយ៉ាងវែងបានចាកចេញពីទីក្រុងអាប៊ូ ដាប៊ី កាលពីថ្ងៃទី៩ មីនា ដើម្បីបំពេញការហោះហើរជុំវិញពិភពលោកសម្រាប់ជំរុញការប្រើប្រាស់ថាមពលព្រះអាទិត្យ ។ បន្ទាប់មកយន្តហោះនេះបានឈប់សំចតនៅប្រទេសអូម៉ង់ ឥណ្ឌា ភូមា និងចិន ៕
ចែករំលែកព័តមាននេះ