ខេត្តកំពង់ឆ្នាំង ៖ សមត្ថកិច្ចចម្រុះដឹកនាំដោយសហមន្ទីរជំនាញ មានមន្ទីរវប្បធម៌និងវិចិត្រសិល្បៈខេត្ត មន្ទីរទេសចរណ៍ខេត្តកំពង់ឆ្នាំង នៅរសៀលថ្ងៃទី៩ ខែវិច្ឆិកា បានចុះបិទសេចក្តីជូនដំណឹង និងធ្វើកិច្ចសន្យាដល់ម្ចាស់ខារ៉ាអូខេ និងរង្គសាលនានាក្នុងក្រុងកំពង់ឆ្នាំង ដើម្បីទប់ស្កាត់ជំងឺកូវីដ១៩ ដែលកំពុងផ្ទុះឡើងជាថ្មី ។
លោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានឲ្យដឹងថា សមត្ថកិច្ចចម្រុះ ដឹកនាំដោយមន្ទីរទេសចរណ៍ និងមន្ទីរវប្បធម៌ខេត្ត បានចុះមកបិទសេចក្តីជូនដំណឹង ស្ដីពីការបិទទាំងស្រុងនូវអាជីវកម្ម មានខារ៉ាអូខេ រង្កសាល រោងភាពយន្ត រោងមហោស្រព និងទីកម្សាន្តនានា ដែលមានមនុស្សជួបជុំច្រើន ។
លោកបានបញ្ជាក់ថា ក្រោយពីណែនាំឲ្យម្ចាស់ខារ៉ាអូខេ និងរង្កសាលទាំងនោះបិទការលក់ដូររបស់ខ្លួន ម្ចាស់ខារ៉ាអូខេក៏ដូចជារង្កសាលទាំងនោះ ក៏បានធ្វើកិច្ចសន្យាជាមួយនឹងមន្ទីរជំនាញផងដែរ ។ លោកបានបន្ថែមថា ការបិទអាជីវកម្មតាមហាងទាំងនេះ គឺធ្វើឡើងបន្ទាប់ពីទទួលការណែនាំពីក្រសួង ក៏ដូចជាគណៈបញ្ជាការឯកភាពខេត្ត ស្ដីពីការទប់ស្កាត់ជំងឺឆ្លងកូវីដ១៩ ដែលផ្ទុះឡើងជាថ្មីនេះ ។
ដោយឡែកអាហារដ្ឋានដែលហូបធម្មតា គឺអាចបើកឱ្យលក់ដូរបាន ។ ប៉ុន្តែត្រូវធ្វើតាមការណែនាំរបស់ក្រសួងសុខាភិបាល ដោយត្រូវមានគម្លាតពីគ្នា មានសាប៊ូលាងដៃ អាល់កុលនិងជែល ជូនភ្ញៀវជាប្រចាំ ជាងនេះទៅទៀត អ្នកបម្រើក៏ដូចជាភ្ញៀវ ត្រូវតែពាក់ម៉ាសជាដាច់ខាត ។
សូមបញ្ជាក់ដែរថា នៅរសៀលថ្ងៃទី៩ វិច្ឆិកា រហូតដល់ម៉ោង៨យប់ ក្រុមមន្ត្រីទាំងនោះធ្វើ បានតែហាង៧កន្លែងតែប៉ុណ្ណោះ និងនៅល្ងាចថ្ងៃទី១០ ខែវិច្ឆិកា ក្រុមមន្ទីរជំនាញខាងលើនឹងធ្វើការរបស់ខ្លួនជាបន្តទៀត ៕
ចែករំលែកព័តមាននេះ