អ្វីទៅដែលហៅថា ទារកកើតមិនគ្រប់ខែ
រាជធានីភ្នំពេញ ៖ អ្វីទៅដែលហៅថា”ទារកកើតមិនគ្រប់ខែ ? ទារកកើតមិនគ្រប់ខែគឺទារកទាំងឡាយដែលសម្រាលមុនអាយុ៣៧សប្ដាហ៍ ឬអាយុតិចជាង២៥៩ថ្ងៃនេះជាប្រសាសន៍របស់លោកវេជ្ជបណ្ឌិត
រាជធានីភ្នំពេញ ៖ អ្វីទៅដែលហៅថា”ទារកកើតមិនគ្រប់ខែ ? ទារកកើតមិនគ្រប់ខែគឺទារកទាំងឡាយដែលសម្រាលមុនអាយុ៣៧សប្ដាហ៍ ឬអាយុតិចជាង២៥៩ថ្ងៃនេះជាប្រសាសន៍របស់លោកវេជ្ជបណ្ឌិតលឹម វណ្ណនិត ឯកទេសកុមារទារកគ្រូពេទ្យផ្នែកប្រពោធនកម្មទារកនៅមន្ទីរពេទ្យកាល់មែ៉តក្នុងកិច្ចសម្ភាសន៍ជាមួយអ្នកសារព័ត៌មាន ។
លោកវេជ្ជបណ្ឌិត លឹម វណ្ណនិត បានថ្លែងថា មូលហេតុសំខាន់ដែលបណ្តាលឲ្យទារកកើតមិនគ្រប់ខែមកពីទី១-អាចមកពីស្ត្រីហ្នឹងមានផ្ទៃពោះច្រើនដង(គាត់កូនច្រើន)អាចប្រឈមមុខនឹងកើតមិនគ្រប់ខែ ។ មានកត្តាផ្សេងទៀតដូចជា អាចមានមេរោគបង្ករលាកតម្រងនោម ឧស្សាហ៍ផ្តាសាយ រលាកស្រោមទឹកភ្លោះ នេះសុទ្ធតែជាមូលហេតុធ្វើឲ្យទារកកើតមិនគ្រប់ខែ។ បែកទឹកភ្លោះមុនកំណត់ ជួនកាលមានបញ្ហាទាក់ទងទៅនឹងសុក គឺសុកនៅពាំងមាត់ស្បូន ដល់រយៈពេលអាយុត្រឹម៣៧សប្តាហ៍ក៏មានឈាមដូច្នេះយើងត្រូវសម្រចចិត្តឲ្យសម្រាលមុន៣៧សប្តាហ៍ ។ មានហេតុផលផ្សេងទៀតដែលបណ្តាលឲ្យទារកកើតមិនគ្រប់ខែ ឧទាហណ៍ ម្តាយឡើងសម្ពាធឈាមខ្ពស់នូវត្រីមាសចុងក្រោយ មានជំងឺទឹកនោមផ្អែម មានជំងឺធ្ងន់ៗរួមផ្សំអាចជំងឺមហារីក ជំងឺបេះដូង ជំងឺសួតនិងករណីខ្លះបណ្ដាលមកពីគ្រោះថ្នាក់ចរាចរណ៍អីុចឹងបង្ខំចិត្តឲ្យកើតមុនអាយុ៣៧សប្តាហ៍ ។ ការធ្វើរោគវិនិច្ឆ័យទៅលើទារកមិនគ្រប់ខែយើងពឹងផ្អែកទៅលើអ្នកជំងឺបើគាត់ចាំច្បាស់យើងអាចវាយតម្លៃថាកូនហ្នឹងកើតមានអាយុប៉ុន្មានសប្តាហ៍ហើយ និងពឹងផ្អែកទៅលើកត្តាមួយទៀតគឺគាត់ពិនិត្យអេកូផ្ទៃពោះនៅត្រីមាសទី១គឺអាចកំណត់រយៈពេលកើតនិងកំណត់អាយុនៃគភ៌បាន ។ កត្តាចុងក្រោយគឺយើងជាគ្រូពេទ្យពិនិត្យផ្ទាល់ទៅលើទារកតែម្តង ។
ជាទូទៅទារកកើតមិនគ្រប់ខែមានផលវិបាកច្រើនហើយសំខាន់វាទាក់ទងទៅនឹងសួត(សួតទារកមានលក្ខណៈមិនពេញលេញ) ធ្វើឲ្យកុមារហត់ដង្ហក់ បបូរមាត់ស្វាយដែលទាមទារឲ្យមានការសង្គ្រោះបន្ទាន់ ។
ផលវិបាកទី២-វាទាក់ទងទៅនឹងជំងឺបេះដូងគឺទារកអាចមានជំងឺបេះដូងគឺសរសៃឈាមបេះដូងបិទមិនជិតជាធម្មតាត្រូវបិទជិតយ៉ាងយូរត្រឹម៧២ម៉ោងតែទារកមិនគ្រប់ខែគឺសរសៃឈាមនៅចំហរហូតដែលមានផលវិបាកទៅដល់ការរំលាយអាហារនិងប្រព័ន្ធដកដង្ហើម ។
ផលវិបាកទី៣-ប្រព័ន្ធរំលាយអាហារដោយសារទារកមានអាយុមិនគ្រប់ខែគឺពោះវៀនធំ ក្រពះមិនទាន់ពេញលេញពិបាករំលាយអាហារបានល្អ ពេលខ្លះមិនអាចរលាយទឹកគោទឹកដោះម្តាយទៅរំលាយដើម្បីទទួលការលូតលាស់បានផង ។ ផលវិបាកទាក់ទងនឹងខួរក្បាលគឺទារកអាចមានបញ្ហាឈាមនៅក្នុងខួរក្បាល អាចមិនដកដង្ហើម តែគេធ្វើរោគវិនិច្ឆ័យបានដោយវាស់អេកូខួរក្បាលអាចរកឃើញថាតើទារកមានហូរឈាមក្នុងខួរក្បាលឬអត់ ។ បន្ទាប់គឺផលវិបាកដោយសារប្រព័ន្ធធាតុផ្សំរបស់ទារកមិនមានពេញលេញ ទារកងាយទទួលរងការបង្ករោគនិយាយសាមញ្ញទារកងាយនឹងទទួលជំងឺជាងក្មេងដែលកើតធម្មតា ។ ផលវិបាកមួយទៀតគឺច្រើនតែទារកមានខាន់លឿងដែលទាមទារឲ្យមានការព្យាបាល ។
ផលវិបាកទាក់ទងនឹងមួយទៀតគឺទារកមិនគ្រប់ខែអាចមានសភាពស្លេកស្លាំងជាងទារកធម្មតាពេលខ្លះទាមទារឲ្យបញ្ចូលគ្រាប់ឈាមដើម្បីជួយសង្គ្រោះទារក ។ នេះគឺជាផលវិបាកសំខាន់ៗបណ្តាលមកពីការកើតមិនគ្រប់ខែដែលទាមទារឲ្យគ្រូពេទ្យត្រូវសង្គ្រោះបន្ទាន់ជាពិសេសគឺផ្នែកសួត ពោះវៀន និងបេះដូង ។ ការព្យាបាលនៅមន្ទីរពេទ្យមានផ្នែកប្រពោធនកម្មនៅជិតផ្នែកសម្ភព១ហើយងាយស្រួលក្នុងការទំនាក់ទំនងរវាងគ្រូពេទ្យសម្ភព គ្រូពេទ្យកុមារ គ្រូពេទ្យទារក ជាមួយក្រុមគ្រួសារ ។ ការធ្វើការជាក្រុមបែបនេះមានសារសំខាន់សម្រាប់ការធ្វើរោគវិនិច្ឆ័យ ការព្យាបាលទារកបានទាន់ពេល ។ មានការសហការល្អរវាងឆ្មបផ្នែកសម្ភពនិងគ្រូពេទ្យឆ្មបនៅផ្នែកប្រពោធនកម្មទារកដែលផ្តល់ព័ត៌មានឱ្យគ្នាបានទាន់ពេលវេលា ។
លោកវេជ្ជបណ្ឌិតលឹម វណ្ណនិត បានបញ្ជាក់ថា កន្លងមកមន្ទីរពេទ្យបានជួបការងាយស្រួលក៏ប៉ុន្តែក៏ជួបការលំបាកផងដែរដូចជា ស្ត្រីជាម្តាយមិនបានមកពិនិត្យពោះឲ្យបានទៀងទាត់គឺមិនបានមកពិនិត្យផ្ទៃពោះទាល់តែសោះពេលសម្រាលគាត់មកសម្រាលតែម្តង ហើយស្ត្រីទាំងនោះមិនមានព័ត៌មានអំពីការពិនិត្យផ្ទៃពោះជួនកាលបញ្ជូនទារកដែលមានបញ្ហាមិនគ្រប់ខែមានការយឺតយ៉ាវ ហើយការបញ្ជូនមានលក្ខណៈមិនសមស្រប ។ មានគ្រួសារខ្លះគាត់មិនបានផ្តល់ព័ត៌មានច្បាស់លាស់ដល់បុគ្គលិកផ្នែកប្រពោធនកម្មទារក គេមិនសហការ គាត់មិនដឹងហើយគាត់នៅខេត្តឆ្ងាយមិនអាចមកញឹកញាប់មើល
ថែទាំកូនចៅរបស់គាត់បានទេធ្វើឲ្យគ្រូពេទ្យមានការលំបាក ។ ការសម្រាកនៅមន្ទីរពេទ្យរបស់ទារកកើតមកមិនគ្រប់ខែជាទូទៅមានរយៈពេលយូរយ៉ាងតិចមួយខែដូច្នេះធ្វើឲ្យក្រុមគ្រួសារមិនមានការសហការជាមួយគ្រូពេទ្យជាប់លាប់ ។
លោកវេជ្ជបណ្ឌិតក៏បានអំពាវនាវដល់ស្ត្រីមានផ្ទៃពោះទាំងឡាយត្រូវមកពិនិត្យផ្ទៃពោះឲ្យបានទៀងទាត់និងមកជួបគ្រូពេទ្យជំនាញផ្នែកសម្ភពដើម្បីពិនិត្យការលូតលាស់របស់ទារកក្នុងផ្ទៃដូចជាការតាមដានសម្ពាធឈាម មើលអេកូសាស្ត្រ ផ្តល់ជាតិដែកឲ្យបានគ្រប់គ្រាន់ដើម្បីការពារភាពស្លេកស្លាំងបើគ្រូពេទ្យពិនិត្យឃើញថា មានករណីគំរាមមុនពេលកើតមិនគ្រប់ខែគ្រូពេទ្យអាចឲ្យដំបូន្មានដើម្បីឲ្យសម្រាកបានច្រើន ញ៉ាំអាហារដែលមានជាតិកាល់ឡូរីខ្ពស់ កុំឲ្យឡើងគីឡូច្រើនពេកព្រោះវាអាចពិបាកក្នុងការឆ្លងទន្លេហើយស្ត្រីនោះត្រូវមកតាមការណាត់របស់គ្រូពេទ្យ ។ ទារកអាយុកាន់តែច្រើននិងមានលទ្ធផលរស់រៀនមានជីវិតល្អជាងទារកដែលមានអាយុតិច ។ ស្ត្រីជាម្តាយត្រូវចៀសវាងការទម្លាប់បន្តក់ទឹកដោះម្តាយទៅលើភ្នែកទារកនៅពេលដែលទារកឈឺភ្នែកការធ្វើបែបនេះមិនអាចជួយការព្យាបាលជំងឺរលាកកែវភ្នែករបស់ទារកបានឡើយ យើងត្រូវប្តូរពីការបន្តក់ទឹកដោះម្តាយទៅជួបគ្រូពេទ្យដែលមានថ្នាំភ្នែកអាចព្យាបាលភ្នែកវិញជាការប្រសើរ ហើយមានឱពុកម្តាយមួយចំនួនច្រើនតែលាបប្រេងកូឡា ប្រេងខ្យល់នៅលើពោះនៅលើបង្ហើយកូនដែលអ្នកម្តាយទាំងនោះយល់ថាអាចការពារជំងឺផ្តាសាយ តែតាមការពិតប្រេងកូឡាប្រេងខ្យល់ទាំងហ្នឹងមិនអាចជួយការពារទារកពីជំងឺបានទេនេះជាការមិនត្រឹមត្រូវ ។ មួយទៀតអ្នកម្តាយពេលដែលឃើញទារកក្តៅខ្លួនមានច្រាំងអណ្តាតគាត់យកទឹកឃ្មុំមកកៀរអណ្តាតព្រោះគាត់យល់ថា អាចជួយព្យាបាលវាបានតែតាមការពិតគាត់គួរតែត្រូវទៅជួបគ្រូពេទ្យផ្នែកកុមារនិងទារកដើម្បីមានថ្នាំព្យាបាលវាប្រសើរជាង ។
លោកវេជ្ជបណ្ឌិតលឹម វណ្ណនិត ឯកទេសកុមារ ទារក គ្រូពេទ្យផ្នែកប្រពោធនកម្មទារកនៅមន្ទីរពេទ្យកាល់ម៉ែត បានបញ្ជាក់ថា នៅមន្ទីរពេទ្យកាល់ម៉ែតបច្ចុប្បន្នផ្នែកប្រពោធនកម្មទារកមានសម្ភារទំនើបៗតាមស្តង់ដាសម្រាប់ជួយសង្គ្រោះទារកបានទាន់ពេលហើយមានប្រសិទ្ធភាពខ្ពស់ទៀតផង ៕
ចែករំលែកព័តមាននេះ