កងយន្តហោះរបស់ក្រុមចម្រុះនាំមុខដោយអារ៉ាប៊ីសាអ៊ូឌីតកាលពីថ្ងៃទី២៣ ឧសភាបានធ្វើការវាយឆ្មក់ថ្មីៗប្រឆាំងបណ្តាទីតាំងរបស់ពួកឧទ្ទាមស៊ីអុីត ហ៊ូធីនៅប្រទេសយេម៉ែនខណៈនៅភាគខាងត្បូងប្រទេសនេះនៅតែមានការប្រយុទ្ធគ្នាខ្លាំងក្លា ។
ប្រជាជនរាយការណ៍ថា បណ្តាឃ្លាំងអាវុធរបស់ពួកហ៊ូធីរងការទម្លាក់គ្រាប់បែកនៅមូលដ្ឋាន GHOULA ខេត្តអាមរ៉ាន ស្ថិតនៅភាគខាងជើងរដ្ឋធានីសាណា ។ នាល្ងាចថ្ងៃនោះមានការវាយឆ្មក់ជាច្រើនលើកលើឃ្លាំងអាវុធមួយនៅជំរំ DHABWA ត្រួតត្រាដោយពួកហ៊ូធីនៅភាគនិរតីរដ្ឋធានី ។ នៅខេត្ត HODEIDA ភាគខាងលិចប្រទេសព្រលានយន្តហោះយោធាមួយរងការទម្លាក់គ្រាប់បែក២លើកដោយកងយន្តហោះក្រុមចម្រុះអារ៉ាប់ ។ ការទម្លាក់គ្រាប់បែកទាំងនោះកើតមានបន្ទាប់ពីការទម្លាក់គ្រាប់បែកយ៉ាងខ្លាំងក្លាលើបណ្តាឃ្លាំងអាវុធរបស់ពួកឧទ្ទាមនៅជុំវិញរដ្ឋធានីសាណា ។
យុទ្ធនាការវាយប្រហារតាមអាកាសធ្វើឡើងចាប់តាំងពីជិត២ខែមកហើយ ។
សាក្សីទាំងឡាយនិយាយថា នៅក្រុង HAJJA ភាគខាងជើងយេម៉ែន ការប្រមូលផ្តុំកម្លាំងមួយរបស់ពួកហ៊ូធីរងការទម្លាក់គ្រាប់បែកបណ្តាលឱ្យពួកយុទ្ធជនស៊ីអុីតស្លាប់១២នាក់ ។ ការវាយប្រហារតាមអាកាសឯទៀតៗសំដៅលើបណ្តាទីតាំងពួកឧទ្ទាមក្នុងតំបន់ DHAMAR ភាគកណ្តាលយេម៉ែន ។ តំបន់ទាំងឡាយនៃខេត្តនោះកាលពីល្ងាចថ្ងៃទី២៣ ឧសភាជា ទីលាននៃការប្រយុទ្ធគ្នាដោយកាំភ្លើងត្បាល់និងកាណុងបាញ់រថក្រោះយ៉ាងសាហាវរវាងពួកឧទ្ទាមនិងកងកម្លាំងដែលប្រឆាំងពួកនោះ ។
នៅភាគខាងត្បូងប្រទេសកងយន្តហោះរបស់ក្រុមចម្រុះវាយប្រហារលើពួកឧទ្ទាមដែលចូលរួមក្នុងការប្រយុទ្ធប្រឆាំងពួកយុទ្ធជនកុលសម្ព័ន្ធនៅជិតក្រុង ATAQ ទីប្រជុំជនខេត្ត CHABWA ។ ការប្រយុទ្ធគ្នាទាំងនោះបណ្តាលឱ្យមនុស្សស្លាប់២៨នាក់ក្នុងនោះមានយុទ្ធជនកុលសម្ព័ន្ធ១១នាក់ ។
នៅក្រុងអាដេនជាទីក្រុងធំទី២របស់ប្រទេសនៅភាគខាងត្បូងយេម៉ែនការប្រយុទ្ធគ្នាកើតមានត្រង់ច្រកចូលខាងជើងនិងខាងលិចក្រុងរវាងពួកឧទ្ទាមនិងងពួកយុទ្ធជនដែលស្មោះត្រង់នឹងប្រធានាធិបតីលោកអាបដ៍រ៉ាបូម៉ាន់សួរហាឌី ។ សាក្សីទាំងឡាយនិយាយថា បណ្តាយន្តហោះរបស់ក្រុមចម្រុះនាល្ងាចថ្ងៃទី២៣ ឧសភា ធ្វើការវាយប្រហារ២លើកប្រឆាំងបណ្តាទីតាំងរបស់ពួកឧទ្ទាមនៅ KHAR MAKSAR ជាសង្កាត់មួយនៃក្រុងអាដេន ៕
ចែករំលែកព័តមាននេះ