ខេត្តកំពង់ធំ ៖ កក្រើកបណ្តាញសង្គមទៀតហើយ ! កាលពីវេលាម៉ោង៥និង៤៥នាទីល្ងាច ថ្ងៃទី២ ខែវិច្ឆិកាកន្លងទៅថ្មីៗនេះព្រះគ្រូចៅអធិការស្តីទីបានប្រើអំពើហិង្សាវាយដំច្រំធាក់ ប្រើកណ្តាប់ដៃទះតប់ដាល់ទៅលើលោកនេនមួយអង្គបណ្តាលឱ្យបែកមាត់ បាក់ធ្មេញពីរ និងរង្គើថ្គាមមួយចំនួនព្រោះតែកូននេននោះមិនឡើងទៅសូត្រធម៌ថ្វាយបង្គំក្នុងព្រះវិហារមួយពេល…
ខេត្តកំពង់ធំ ៖ កក្រើកបណ្តាញសង្គមទៀតហើយ ! កាលពីវេលាម៉ោង៥និង៤៥នាទីល្ងាច ថ្ងៃទី២ ខែវិច្ឆិកាកន្លងទៅថ្មីៗនេះព្រះគ្រូចៅអធិការស្តីទីបានប្រើអំពើហិង្សាវាយដំច្រំធាក់ ប្រើកណ្តាប់ដៃទះតប់ដាល់ទៅលើលោកនេនមួយអង្គបណ្តាលឱ្យបែកមាត់ បាក់ធ្មេញពីរ និងរង្គើថ្គាមមួយចំនួនព្រោះតែកូននេននោះមិនឡើងទៅសូត្រធម៌ថ្វាយបង្គំក្នុងព្រះវិហារមួយពេល ដែលករណីនេះកើតឡើងនៅក្នុងព្រះវិហារមួយស្ថិតនៅក្នុងវត្តពណ្ណរាយ ឃុំចើងដើង ស្រុកបារាយណ៍ ខេត្តកំពង់ធំ ។
លោកវរសេនីយ៍ឯក សួង ថេន អធិការនគរបាលស្រុកបារាយណ៍បានប្រាប់កោះសន្តិភាពតាមទូរស័ព្ទនៅរសៀលថ្ងៃទី៤ ខែវិច្ឆិកាថា ព្រះចៅអធិការស្តីទីនោះឈ្មោះ ហ៊ុម ហឿន បានវាយលោកនេននៅក្នុងព្រះវិហារ ដោយសារលោកខឹងនឹងកូននេនអង្គនោះខានចូលព្រះវិហារសូត្រធម៌ថ្វាយមួយល្ងាច ។
លោកអធិការបានបន្តថា មុនដំបូងលោកបានហៅលោកនេនទៅសួរនាំ លុះពេលលោកនេនទៅដល់ហើយអង្គុយលុតជង្គង់នៅពីមុខព្រះគ្រូចៅអធិការស្ដីទីនោះ ហើយក៏សួរពីរបីម៉ាត់ ក៏វាយលោកនេនដោយប្រើកណ្ដាប់ដៃដាល់ទៅលើផ្ទៃមុខ បណ្តាលឲ្យកូននេនដួលទៅលើផ្ទៃឥដ្ឋការ៉ូព្រះវិហារ ហើយលោកគ្រូចៅអធិការស្តីទីបានយកជើងធាក់ទន្ទ្រាំសីសៈ(ក្បាល)លោកនេននោះ ហើយក៏យកដៃចាប់បោកសីសៈនេនទៅនឹងផ្ទៃឥដ្ឋការ៉ូ និងចាប់ជើងប្រុងលើកបោកទៅនឹងសសរព្រះវិហារ ប៉ុន្តែលើកមិនរួច ពេលនោះលោកនេនក៏រើរួចរត់ចេញពីព្រះវិហារទៅ ។ ចំណែកលោកនេនផ្សេងៗទៀតឃើញដូច្នោះក៏នាំគ្នារត់ចែកជើងគ្នាពេញព្រះវិហារគេចយកតែប្រាសអាយុរៀងៗខ្លួន ។
ពាក់ព័ន្ធអំពើហិង្សាខាងលើនេះព្រះតេជគុណ គ្រឹស្ត ប៊ុនធឿន ព្រះអនុគណស្រុកបារាយណ៍មានថេរដីកាថា ជំវិញករណីដែលព្រះចៅអធិការស្តីទីព្រះនាម ហ៊ុម ហឿន ប្រើហិង្សាទៅលើកូននេននោះខាងព្រះអង្គជាអនុគណស្រុកនិងអាជ្ញាធរធ្វើការដោះស្រាយដោយសន្តិវិធីរួចរាល់អស់ហើយ ដោយភាគីខាងលោកនេនរងគ្រោះនិងក្រុមគ្រួសារសុខចិត្តទទួលយកសំណងជំងឺចិត្ត និងការព្យាបាល ចំណែកផ្លូវច្បាប់យ៉ាងណាទៀតនោះ ស្រេចតែលើច្បាប់ចុះ ។
បើតាមលោក យិន ធី មន្ត្រីមន្ទីរធម្មការ និងសាសនាខេត្តកំពង់ធំបានបញ្ជូនសារជាសំឡេងពន្យល់យ៉ាងដូច្នេះថា
ចំពោះករណីព្រះចៅអធិការស្តីទីប្រើអំពើហិង្សាទៅលើលោកនេននោះមិនធ្ងន់ធ្ងរដូចក្នុងរូបភាពនៅលើបណ្តាញសង្គមនោះទេ គឺព្រះតេជគុណគ្រាន់តែទះមួយកំផ្លៀង ពីរកំផ្លៀងជាការប្រដៅតែប៉ុណ្ណោះ តែលោកនេនខ្លួនឯងទេតើ ដែលភ័យស្លន់ស្លោស្ទុះរត់ទាំងកម្រោលបណ្តាលឱ្យរអិលជើងនឹងកន្ទេលដួលផ្កាប់មុខផ្ទប់ទៅនឹងឥដ្ឋការ៉ូក៏បែកមាត់ បាក់ធ្មេញអស់ពីរ ព្រោះតែភ័យពេក ។
លោកថា ទោះជាយ៉ាងណារឿងរ៉ាវនេះមិនធ្ងន់ធ្ងរនោះទេ ហើយខាងមន្ត្រីជំនាញក៏បានដោះស្រាយរួចរាល់ ចប់សព្វគ្រប់ហើយដែរ ។
ចែករំលែកព័តមាននេះ