ខេត្តកំពង់ឆ្នាំង ៖ ប្រជាពលរដ្ឋនៅសហគមន៍ទឹកធ្លាក់ស្រែអំពិល ក៏ដូចជាអាជ្ញាធរឃុំក្តុលសែនជ័យ មានក្តីរីករាយសប្បាយចិត្ត និងថ្លែងអំណរគុណរដ្ឋមន្ត្រីក្រសួងបរិស្ថាន ដែលបានឧបត្ថម្ភគោ មាន់ រួមនឹងផ្ទាំងសូឡា ទុកសម្រាប់បម្រើឱ្យវិស័យទេសចរណ៍…
ខេត្តកំពង់ឆ្នាំង ៖ ប្រជាពលរដ្ឋនៅសហគមន៍ទឹកធ្លាក់ស្រែអំពិល ក៏ដូចជាអាជ្ញាធរឃុំក្តុលសែនជ័យ មានក្តីរីករាយសប្បាយចិត្ត និងថ្លែងអំណរគុណរដ្ឋមន្ត្រីក្រសួងបរិស្ថាន ដែលបានឧបត្ថម្ភគោ មាន់ រួមនឹងផ្ទាំងសូឡា ទុកសម្រាប់បម្រើឱ្យវិស័យទេសចរណ៍ ក៏ដូចជាជីវភាពរស់នៅរបស់
ប្រជាពលរដ្ឋក្នុងសហគមន៍ ។
លោក ម៉ឹង វិសាលសុខ មេឃុំក្តុលសែនជ័យស្រុកទឹកផុស បានបញ្ជាក់កាលពីរសៀលថ្ងៃទី២ ខែវិច្ឆិកា ឆ្នាំ២០២០ថា សហគមន៍ទឹកធ្លាក់ស្រែអំពិល ស្ថិតនៅក្នុងភូមិក្តុល ឃុំក្តុលសែនជ័យ ស្រុកទឹកផុស បានទទួលអំណោយពីឯកឧត្តម ស្វាយ សំអាល់ រដ្ឋមន្ត្រីក្រសួងបរិស្ថាន នូវគោចំនួន៣៩ក្បាល និងមាន់រស់៤៨០គីឡូក្រាម សម្រាប់ឲ្យសហគមន៍ទឹកធ្លាក់ស្រែអំពិលចិញ្ចឹម ដើម្បីពង្រីកជីវភាពរបស់សមាជិកសហគមន៍របស់ខ្លួន ។
បន្ថែមពីលើនេះ សហគមន៍ក៏បានទទួលផ្ទាំងសូឡាចំនួន៩០ផងដែរ សម្រាប់បំភ្លឺឱ្យតំបន់
ទឹកធ្លាក់ស្រែអំពិលមានភ្លើងបំភ្លឺនៅពេលយប់ ។
លោកមេឃុំក្តុលសែនជ័យបញ្ជាក់ថា ដំបូងឡើយ សមាជិកសហគមន៍ទឹកធ្លាក់ស្រែអំពិលចំនួនតែ១៣គ្រួសារទេ ត្រូវទទួលបានគោពីក្រសួងបរិស្ថាន ដោយក្នុងមួយគ្រួសារៗចំនួន៣ក្បាល សរុបទាំង១៣គ្រួសារស្មើនឹង៣៩ក្បាល។
ក្រោមការផ្ដួចផ្ដើមរបស់អាជ្ញាធរមូលដ្ឋាន និងទទួលបានការឯកភាពគ្នាពីប្រជាពលរដ្ឋ និងសហគមន៍ ក៏បានឯកភាពគ្នាយកគោទាំងនោះមកដាក់រួម ដោយយកទីតាំងចម្ងាយប្រមាណ១គីឡូម៉ែត្រពីទឹកធ្លាក់ស្រែអំពិល ព្រោះជាទីតាំងសម្បូរស្មៅផងដែរ ដែលពេលនេះកំពុងធ្វើក្រោលឱ្យវារស់នៅ និងធ្វើរបងព័ទ្ធជុំវិញដោយមិនលែងវាផ្តេសផ្តាសនោះទេ ។ ជាមួយគ្នានេះ ក៏បានដាក់អ្នកយាមការពារផងដែរ ។
ចំពោះការដាក់គោទាំងនោះជារួមបែបនេះ គឺធ្វើឲ្យប្រជាពលរដ្ឋមានការឯកភាព និងសាមគ្គីគ្នាជាធ្លុងមួយ ហើយនៅពេលដែលរីកចម្រើននឹងចែកផលស្មើៗគ្នា ។ ជាចុងក្រោយ ក្នុងនាមលោកជាមេឃុំក្តុលសែនជ័យ ជួសមុខឱ្យប្រជាពលរដ្ឋ និងសហគមន៍ទឹកធ្លាក់ស្រែអំពិល សូមថ្លែងអំណរគុណយ៉ាងជ្រាលជ្រៅឯកឧត្តម ស្វាយ សំអាល់ រដ្ឋមន្ត្រីក្រសួងបរិស្ថាន ក៏ដូចជាក្រុមការងារដែលបានគិតគូរដល់បងប្អូនប្រជាពលរដ្ឋ និងសហគមន៍ ក្នុងការពង្រឹងជីវភាព និងសមត្ថភាពរបស់ខ្លួន ។
សូមរំឭកថា ទឹកធ្លាក់ស្រែអំពិលគឺជារមណីយដ្ឋានមួយដែលរៀបចំឡើងដោយសហគមន៍ និងអាជ្ញាធរភូមិ ឃុំ ធ្វើឱ្យក្លាយជារមណីយដ្ឋានដែលស្រស់ស្អាត និងជាប់ចំណាត់ថ្នាក់ក្នុងការប្រឡងពានរង្វាន់ថ្នាក់ជាតិកាលពីពេលកន្លងទៅ ។ ដោយសារតែបែបនេះហើយ ទើបសហគមន៍ទទួលបានការឧបត្ថម្ភជាបន្តបន្ទាប់ ទាំងស្បៀង និងសម្ភារ ក៏ដូចជាសត្វពាហនៈជារឿយៗផងដែរ ៕
ចែករំលែកព័តមាននេះ