ខេត្តកំពង់ឆ្នាំង ៖ យ៉ាងហោចណាស់មនុស្សប្រុស-ស្រី និងក្មេងចំនួន៥នាក់ត្រូវរងរបួសធ្ងន់ និងស្រាល ក្នុងហេតុការណ៍គ្រោះអគ្គិភ័យមួយបានកើតឡើងកាលពីព្រឹកថ្ងៃទី០២ ខែវិច្ឆិកា ឆ្នាំ២០២០ ស្ថិតនៅភូមិកោះធំ ឃុំព្រៃគ្រី ស្រុកជលគិរី ខេត្តកំពង់ឆ្នាំង ។
ជនរងគ្រោះទាំង៥នាក់ខាងលើ មាន ១-ឈ្មោះ ស្រ៊ី សុភ័ក្រ ភេទស្រី អាយុ៣១ឆ្នាំ រងរបួសធ្ងន់, ២-ឈ្មោះ ស្រេង ធូ ភេទប្រុស អាយុ៥២ឆ្នាំ (រងរបួសស្រាល), ៣-ឈ្មោះ ធូ ចាន់ធឿន ភេទប្រុស អាយុ៣០ឆ្នាំ (រងរបួសស្រាល), ៤-ឈ្មោះ ធឿន សុម៉ាលី ភេទស្រី អាយុ២ឆ្នាំ(រងរបួសស្រាល) និង៥- ឈ្មោះ ធូ ស្រីលីន ភេទស្រី អាយុ១០ឆ្នាំ (រងរបួសស្រាល) ។ ជនរងគ្រោះអស់ទាំង៥នាក់ត្រូវបានដឹកទៅសង្គ្រោះនៅមណ្ឌលសុខភាពស្រុកជលគីរីផងដែរ ។
តាមប្រភពពីកន្លែងកើតហេតុបានឱ្យដឹងថា មុនពេលកើតហេតុ មានបុរសម្នាក់ឈ្មោះ ស្រេង ធូ អាយុ៥៧ឆ្នាំ រស់នៅភូមិកោះធំ ឃុំព្រៃគ្រី ស្រុកជលគិរី បានយកក្រណាត់ទៅ ជ្រលក់ជាមួយនឹងសាំង រួចក៏ទៅយកភ្លើង ក្នុងគោលបំណងដើម្បីយកទៅដុតស្រមោច ក៏ប៉ុន្តែក្លិនឈួលចេញក្រណាត់ជ្រលក់សាំងនោះ ក៏ក្លាយទៅជាអណ្តាតភ្លើងឆាបឆេះឡើងយ៉ាងសន្ធោសន្ធៅ បណ្តាលឱ្យបុរសរូបនោះក្រវែងក្រណាត់ដែលកំពុងឆេះនោះចោល ក៏ទៅត្រូវមនុស្សដែលនៅក្បែរនោះ បណ្តាលឱ្យរងរបួសធ្ងន់ និងស្រាលចំនួន៤នាក់ ។
ប្រភពដដែលបានបន្តថា បុរសឈ្មោះ ស្រេង ធូ ដែលជាជនបង្កក៏រងរបួសដែរ ។ ហើយក្នុងករណីខាងលើនេះ បើគិតរហូតមកដល់រសៀលថ្ងៃទី៣ ខែវិច្ឆិកា គេនៅមិនទាន់ដឹងថា តើជនបង្ក និងត្រូវទទួលទោសដោយអចេតនា ឬយ៉ាងណានោះទេ?
ប៉ុន្តែតាមការបញ្ជាក់របស់លោក ហ៊ឹម យ៉ុង អធិការនគរបាលស្រុកជលគីរី បានឱ្យដឹងថា មិនទាន់ដឹងថា យ៉ាងណានោះទេ? ព្រោះថា ជនបង្កក៏កំពុងតែដេកនៅមន្ទីរពេទ្យផងដែរ ៕
ចែករំលែកព័តមាននេះ