ខេត្តកំពង់ចាម ៖ រថយន្តកូរ៉េពណ៌ខៀវចំណុះ១តោនកន្លះ មិនមានពាក់ស្លាកលេខផ្ទុកលាមកគោពេញទ្រុងផ្នែកខាងក្រោយបានបើកកិនក្មេងប្រុសម្នាក់អាយុ៥ឆ្នាំ បែកលលាដ៏ក្បាលស្លាប់ភ្លាមៗយ៉ាងអណោចអធម៌កាលពីវេលាម៉ោង៩ និង៣០នាទីព្រឹក ថ្ងៃទី២០ ឧសភា ២០១៥ ស្ថិតនៅភូមិថ្មី ឃុំរំចេក ស្រុកកំពង់សៀម ។
លោកវរសេនីយ៍ទោប៉ាក ជាតិ អធិការនគរបាលស្រុកកំពង់សៀម ប្រាប់ឲ្យដឹងថា ក្មេងប្រុសដែលត្រូវរថយន្តកិនស្លាប់នោះឈ្មោះ វីរៈ មុនី រស់នៅភូមិ-ឃុំកើតហេតុ ហើយក៏មិនមានសាក្សីណាម្នាក់បានបំភ្លឺពីករណីទាក់ទិនទៅនឹងគ្រោះថ្នាក់ចរាចរណ៍នេះទេ ។
តាមការសន្និដ្ឋាន ក្មេងប្រុសតូចនោះទំនងជារត់ឆ្លងផ្លូវក៏ត្រូវបានរថយន្តដឹកលាមកគោកិនក្បាលចំកង់ផ្នែកខាងក្រោយបណ្តាលឱ្យបែកធ្លាយខួរស្លាប់។ លោកវរសេនីយ៍ទោប៉ាក ជាតិ អធិការនគរបាលស្រុកកំពង់សៀម ប្រាប់បន្តថា ក្រោយពីបានកិនក្មេងស្លាប់ហើយ រថយន្តនោះមិនបានឈប់ឡើយ គឺបានបន្ថែមល្បឿនបើករត់គេចរហូតមកដល់ត្រង់ភូមិចុងថ្នល់ សង្កាត់បឹងកុក ក្រុងកំពង់ចាម អ្នកបើកបរបានបើកទ្វាររថយន្តចុះរត់គេចខ្លួនបាត់ ។
បន្ទាប់មកទើបកម្លាំងសមត្ថកិច្ចបានទៅដល់ឃើញតែរថយន្តមិនមានពាក់ស្លាកលេខឡើយ និងបាននាំមករក្សាទុកនៅអធិការដ្ឋាននគរបាលស្រុកកំពង់សៀមដើម្បីដោះស្រាយតាមច្បាប់ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ