ខេត្តកំពត ៖ មានករណីគ្រោះថ្នាក់ចរាចរណ៍ដ៏រន្ធត់មួយ បង្កឡើងដោយរថយន្តម៉ាកព្រូស បើកបរដោយជនជាតិចិន រេចង្កូតធ្លាក់ពីផ្លូវជាតិរុលចូលមុខផ្ទះបុកស្ត្រីមានផ្ទៃពោះជិតគ្រប់ខែម្នាក់ ដែលកំពុងអង្គុយហូបបបរនៅមុខផ្ទះ និងម៉ូតូមួយគ្រឿង បណ្តាលឲ្យខូចខ្ទេចខ្ទីរ និងស្ត្រីដែលកំពុងអង្គុយហូបបបររងរបួសធ្ងន់…
ខេត្តកំពត ៖ មានករណីគ្រោះថ្នាក់ចរាចរណ៍ដ៏រន្ធត់មួយ បង្កឡើងដោយរថយន្តម៉ាកព្រូស បើកបរដោយជនជាតិចិន រេចង្កូតធ្លាក់ពីផ្លូវជាតិរុលចូលមុខផ្ទះបុកស្ត្រីមានផ្ទៃពោះជិតគ្រប់ខែម្នាក់ ដែលកំពុងអង្គុយហូបបបរនៅមុខផ្ទះ និងម៉ូតូមួយគ្រឿង បណ្តាលឲ្យខូចខ្ទេចខ្ទីរ និងស្ត្រីដែលកំពុងអង្គុយហូបបបររងរបួសធ្ងន់ រួចហើយជ្រុលចូលបុកជញ្ជាំងផ្ទះផង ។ រីឯស្ត្រីម្ចាស់ផ្ទះរងរបួសធ្ងន់ពេលបញ្ជូនដល់មន្ទីរបានស្លាប់យ៉ាងអណោចអាធ័ម ។
ហេតុការណ៍គ្រោះថ្នាក់នេះបានកើតឡើង កាលពីវេលាម៉ោង១៥ និង០៦នសទីរសៀលថ្ងៃទី១៥ ខែឧសភា ឆ្នាំ២០២៦ លើផ្លូវជាតិលេខ៣ ចន្លោះគីឡូម៉ែត្រលេខ ១៤៣-១៤៤ ស្ថិតក្នុងភូមិព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត ។
ប្រភពពីកន្លែងកើតហេតុឲ្យដឹងថា នៅមុនពេលកើតហេតុ គេឃើញមានរថយន្តម៉ាកព្រូសមួយគ្រឿង បើកបរដោយជនជាតិចិន ក្នុងទិសដៅពីជើងទៅត្បូង លុះមកដល់ចំណុចកើតហេតុក៏ស្រាប់តែរថយន្តនោះរេចង្កូតធ្លាក់ចេញពីផ្លូវជាតិហើយបានបុករះស្ត្រីម្នាក់ដែលកំពុងអង្គុយហូបបបរនៅមុខផ្ទះ និងម៉ូតូមួយគ្រឿងចតនៅមុខផ្ទះបណ្ដាលឲ្យខ្ទេចម៉ូតូ និងមនុស្សរងរបួសធ្ងន់ត្រូវបានដឹកទៅសង្គ្រោះនៅមន្ទីរពេទ្យ ហើយបានស្លាប់បាត់បង់ជីវិតពេលបញ្ជូនដល់មន្ទីរពេទ្យ។
ក្រោយពេលកើតហេតុ កម្លាំងសមត្ថកិច្ចចរាចរណ៍ស្រុកទឹកឈូ បានចុះទៅដល់កន្លែងកើតហេតុដើម្បីពិនិត្យនិងធ្វើការវាស់វែង។
សមត្ថកិច្ចចរាចរណ៍បានឲ្យដឹងថា អ្នកបើកបររថយន្តមានឈ្មោះ GAO GAUNJIN ភេទប្រុស ជាជនជាតិចិន កម្មលិខិតឆ្លងដែនលេខ EF4667935 និងកាន់បណ្ណបើកបរលេខ B.00337235 ស្នាក់នៅភូមិវាល ឃុំរលាំងចក ស្រុកសំរោងទង ខេត្តកំពង់ស្ពឺ ។ បើកបររថយន្តម៉ាក TOYOTA PRIUS ពណ៌ស ពាក់ផ្លាកលេខ ភ្នំពេញ 2CC-8965 មានទិសដៅពីជើងទៅត្បូង ខ្វះការប្រុងប្រយ័ត្ន ធ្វេសប្រហែស ។
ស្ត្រីរងគ្រោះឈ្មោះ ព្រំ វិជ្ជនី ភេទស្រី អាយុ៣៣ឆ្នាំ មានទីលំនៅភូមិព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត រងរបួសធ្ងន់ បញ្ជូនដល់មន្ទីរពេទ្យបានស្លាប់ ។ វត្ថុតាងរួមមាន រថយន្ត និងម៉ូតូចំនួន០២គ្រឿង ត្រូវបានយកទៅរក្សាទុកនៅអធិការដ្ឋាននគរបាលស្រុកទឹកឈូ រង់ចាំដោះស្រាយតាមផ្លូវច្បាប់ ។
សពស្ត្រីជនរងគ្រោះ ក្រោយពីសមត្ថកិច្ចពិនិត្យរួចរាល់ បានប្រគល់ជូនក្រុមគ្រួសាររៀបចំធ្វើបុណ្យតាមប្រពៃណី។ រីឯជនបង្កអ្នកបើកបរត្រូវបានសមត្ថកិច្ចឃាត់ខ្លួនកសាងសំណុំរឿងទៅតុលាការដើម្បីដោះស្រាយតាមផ្លូវច្បាប់ ៕
ចែករំលែកព័តមាននេះ