ខេត្តបាត់ដំបង ៖ យ៉ាងហោចណាស់ កម្មករបេះស្វាយចំនួន២១នាក់ បានរងរបួសធ្ងន់ ស្រាល ខណ:មានម្នាក់បានស្លាប់ នៅក្នុងឧប្បតិហេតុគ្រោះថ្នាក់ចរាចរណ៍រវាងរថយន្តនិងរថយន្ត កាលពីវេលាម៉ោង៧ព្រឹកថ្ងៃទី១២ ឧសភា…
ខេត្តបាត់ដំបង ៖ យ៉ាងហោចណាស់ កម្មករបេះស្វាយចំនួន២១នាក់ បានរងរបួសធ្ងន់ ស្រាល ខណ:មានម្នាក់បានស្លាប់ នៅក្នុងឧប្បតិហេតុគ្រោះថ្នាក់ចរាចរណ៍រវាងរថយន្តនិងរថយន្ត កាលពីវេលាម៉ោង៧ព្រឹកថ្ងៃទី១២ ឧសភា លើផ្លូវជាតិលេខ៥៧ ត្រង់ចំណុចភូមិស្វាយស ឃុំត្រែង ស្រុករតនមណ្ឌល ។
ព័ត៌មានបឋមបានឲ្យដឹងថា ក្រុមកម្មករប្រុស-ស្រីប្រមាណ២២នាក់ ជិះរថយន្តច្នៃចេញពីខេត្តប៉ៃលិន ក្នុងគោលដៅទៅស្វាយនៅស្រុកបាណន់ ខេត្តបាត់ដំបង ប៉ុន្តែពេលទៅដល់ចំណុចកើតហេតុ រថយន្តដឹកកម្មករនេះ បានបើកគេចរថយន្តធុនធ្ងន់មួយគ្រឿងដែលធ្វើដំណើរផ្ទុយគ្នា ខណ:ដែលរថយន្តនេះហាក់បើកលឿនបន្តិចផង ក៏ក្រឡាប់តែម្ដង ។
តាមប្រភពព័ត៌មានដដែលបានបញ្ជាក់បន្ថែមថា រថយន្តធុនធ្ងន់នោះ បានបើកឆ្លងគំនូសលឿងជ្រុលចូលទៅខាងឆ្វេង ខណ:រថយន្តដឹកកម្មករបើកក្នុងល្បឿនលឿនដែរ បួងចង្កូតគេចទើបបណ្ដាលឲ្យក្រឡាប់ជះកម្មករចោលរដូករណែលពេញលើចិញ្ចើមផ្លូវ ។
កម្លាំងសមត្ថកិច្ចមូលដ្ឋានក៏បានចុះទៅកាន់ចំណុចកើតហេតុភ្លាមៗដែរ ដើម្បីជួយសង្គ្រោះដល់អ្នករបួស។ ភ្លាម ៗគេមិនទាន់ស្គាល់អត្តសញ្ញាណជនរងគ្រោះទាំងនោះទេ តែគេគ្រាន់តែដឹងថា ក្រុមកម្មករទាំងនោះមកពីខេត្តប៉ៃលិន ធ្វើដំណើរទៅបេះស្វាយនៅស្រុកបាណន់ ៕
ចែករំលែកព័តមាននេះ