រាជធានីភ្នំពេញ ៖ ស្ថិតក្នុងកាលៈទេសៈប្រទេសកម្ពុជា និងពិភពលោកជួបនឹងវិបត្តិជំងឺឆ្លងកូវីដ-១៩នេះ បើតាមមន្ត្រីជាន់ខ្ពស់នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានឱ្យដឹងថា រោងចក្រប្រភេទធុនធំ ចំនួន៩៥រោងចក្រក្នុងចំណោមរោងចក្រប្រភេទធុនធំ នៅកម្ពុជាមានជាង១៨០០រោងចក្របានបិទទ្វារ និងមានរោងចក្រកើតថ្មីដល់ជាង១៩០រោងចក្រ គិតមកដល់ចុងខែតុលា ឆ្នាំ២០២០នេះ ។
ឯកឧត្ដម ហេង សុខគង់ អ្នកនាំពាក្យ និងជារដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានឱ្យដឹងថា ជារួមនៅកម្ពុជាបានបែងចែកប្រភេទរោងចក្រជាពីរ ។ ទីមួយជាប្រភេទរោងចក្រធុនតូច មធ្យម និងទីពីររោងចក្រធុនធំ ។
ឯកឧត្តម ហេង សុខគង់ មានប្រសាសន៍ថា «ដោយឡែករោងចក្រធុនធំរបស់យើងរហូតមកដល់ឆ្នាំ២០២០នេះ យើងមានជារួម ១.៨៣១រោងចក្រ ហើយនៅក្នុងនោះមានគិតមកដល់ថ្ងៃទី២៨ តុលា ២០២០នេះ មានរោងចក្រកាមន្តសាល ៣៩០ដែលបានភ្ជួរ ហើយទន្ទឹម និងនេះមានរោងចក្រ៩៥ដែលបានបិទទ្វារ និងមានរោចក្រកើតថ្មីមានចំនួន១៩៦»។ ចំនួនទិន្ន័យនៃការបិទទ្វារ និងរោងចក្រកើតថ្មីឡើងវិញនេះ បើតាមឯកឧត្តមអ្នកនាំពាក្យវាជាទិន្នន័យសំខាន់សម្រាប់វាយតម្លៃអំពីកំណើនសេដ្ឋកិច្ចជាតិដែលពឹងផ្អែកលើវិស័យឧស្សាហកម្ម ។
ឯកឧត្តម លើកឡើងថា « យើងមានរោចក្រជាង៣០០បានភ្ជួរ តែនៅក្នុងនោះយើងតែជាង៩០ទេ ដែលបានបិទ តែរោចក្របង្កើតថ្មីជាង១០០មកវិញ អីចឹងចំណុចទាំងអស់នេះជាទិន្ន័យមួយដ៏សំខាន់ដែលយកមកធ្វើជាសុចាករវាស់វែង ឬវាយតម្លៃអំពីកំណើនសេដ្ឋកិច្ចរបស់យើង ដោយពឹងផ្អែកលើវិស័យឧស្សាហកម្ម ។ ចាប់ពីឆ្នាំ២០១៥ មកក្រោមគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥ដល់២០២៥នេះ វិស័យឧស្សាហកម្មរបស់យើងមិនពឹងផ្អែកទាំងស្រុងតែលើឧស្សាហកម្មកាត់ដេរទេ អីចឹងបានយើងឃើញថា ការធ្វើពិពិធកម្មឧស្សាហកម្ម ក្រៅពីវិស័យកាត់ដេរមានកំណើនជាបន្តបន្ទាប់ ។ ទាំងនេះជាចំណែកមួយដ៏សំខាន់ដោយមិនពឹងផ្អែកតែលើវិស័យឧស្សាហកម្មកាតដេរ ជាពិសេសឧស្សាហកម្មពឹងផ្អែកទៅលើជំនាញ ឧស្សាហកម្មដែលមានបច្ចេកវិទ្យានេះគឺមានកំណើនពីមួយឆ្នាំទៅមួយឆ្នាំចាប់តែពីឆ្នាំ២០១៥មក»។
បើតាមឯកឧត្តម ហេងសុខគង់ មកដល់បច្ចុប្បន្ននេះ កម្ពុជាមិនពឹងផ្អែកទាំងស្រុងតែទៅលើវិស័យឧស្សាហកម្មកាត់មួយមុខនោះទេ ពោលគឺកម្ពុជាកំពុងធ្វើពិធិធកម្មទៅលើវិស័យឧស្សាហកម្មជាច្រើនផ្សេងទៀត ពិសេសឧស្សាហកម្មដែលពឹងផ្អែកទៅលើបច្ចេកវិទ្យា។ ឯកឧត្តម លើកឡើងថា ស្ថិតក្នុងដំណាក់កាលកូវីដ១៩នេះយើងឃើញបណ្តារោងចក្រមួយចំនួនគាត់បានពង្រីកខ្សែច្រវ៉ាក់ផលិតកម្មរបស់គាត់ ដែលក្រៅអំពីកាត់ដេរទៅជាឧស្សាហកម្មទៅជាឧស្សាហកម្មបម្រើដល់វិស័យវិជ្ជសាស្ត្រ(រោងចក្រដេរម៉ាស់ ដេរសម្លៀកបំពាក់វិជ្ជសាស្ត្រ)។ ទាំងអស់នេះ គឺជាការចូលរួមចំណែកមួយក្នុងការទប់ស្កាត់កុំឱ្យពួគាត់បិទទ្វារោងចក្រ និងបង្កើននូវសេដ្ឋកិច្ចជាតិ រួមនិងជួយរក្សាបាននៅការងារសម្រាប់កម្មករ កម្មការិនី ។
ឯកឧត្តមសង្កត់ធ្ងន់ថា«អីចឹងយើងឃើញថា ក្រោយកូវីដ១៩ផុតទៅ បណ្តារោចក្រសហគ្រាសរបស់យើងនឹងនៅតែមានកាលានុវត្តភាព ពិសេសនៅក្នុងការប្រកួតប្រជែងមួយដ៏សំខាន់ ដោយសាររោងចក្រយើងភាគច្រើនមិនបានបិទទ្វា និងប្រទេសរបស់យើងមិនបានឡកដោន ដែលជាកត្តាមួយសំខាន់ហើយមានសក្តានុពលបើប្រៀបធៀបជាមួយនិងបណ្តាប្រទេសមួយចំនួន រោងចក្របានបិទទ្វារ និងប្រទេសបានឡកដោន។
នៅកម្ពុជាយើងបានប្រព្រឹត្តទៅដោយរលូន ដោយនៅតាមរោងចក្រការបញ្ជាទិញនៅតែមាន ពិសេសក្រោយកូវីដ១៩ការបញ្ជាទិញនឹងមានកាន់តែច្រើនថែមទៀត»៕
ចែករំលែកព័តមាននេះ