ខេត្តព្រះសីហនុ ៖ លោក នូ សុផល ប្រធានមន្ទីរទេសចរណ៍ខេត្ត បានមានប្រសាសន៍ឱ្យដឹងតាមទូរស័ព្ទកាលពីព្រឹកថ្ងៃទី១៥ ឧសភា ដែលជាថ្ងៃចុងបញ្ចប់នៃ
ព្រះរាជពិធីបុណ្យចម្រើនព្រះជន្មគម្រប់៦២យាងចូល៦៣ព្រះវស្សារបស់ព្រះករុណាព្រះបាទសម្តេច
ខេត្តព្រះសីហនុ ៖ លោក នូ សុផល ប្រធានមន្ទីរទេសចរណ៍ខេត្ត បានមានប្រសាសន៍ឱ្យដឹងតាមទូរស័ព្ទកាលពីព្រឹកថ្ងៃទី១៥ ឧសភា ដែលជាថ្ងៃចុងបញ្ចប់នៃ
ព្រះរាជពិធីបុណ្យចម្រើនព្រះជន្មគម្រប់៦២ យាងចូល៦៣ព្រះវស្សា របស់ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាថា ភ្ញៀវទេសចរជាតិ-អន្តរជាតិ ធ្វើដំណើរមកកម្សាន្តនៅខេត្តព្រះសីហនុ ក្នុងរយៈពេល៣ថ្ងៃ មានចំនួនសរុប៨៤.៩៦០នាក់ កើនឡើង២៥,៥២% បើប្រៀបធៀបទៅនឹងឆ្នាំ២០១៤។
លោកប្រធានមន្ទីរបានបន្តថា ក្នុងនោះភ្ញៀវទេសចរជាតិមានចំនួន៨១.២៤៩នាក់ កើនឡើងជាងឆ្នាំ២០១៤ ចំនួន២៣,២៧% ចំណែកភ្ញៀវអន្តរជាតិ មានចំនួន៣.៧១១នាក់ ថយចុះជាងឆ្នាំ២០១៤ ចំនួន១៩%។ ដោយឡែកតម្លៃសេវាស្នាក់នៅតាមសណ្ឋាគារ ផ្ទះសំណាក់ សេវាម្ហូបអាហារ នៅតាមភោជនីយដ្ឋាន អាហារដ្ឋាន មិនមានការដំឡើងថ្លៃខ្ពស់ ដែលអាចធ្វើឱ្យប៉ះពាល់ដល់អារម្មណ៍ភ្ញៀវទេសចរជាតិ-អន្តរជាតិទេ ។ អាជ្ញាធរក្រុង-ខេត្ត ក៏ដូចជាមន្ទីរជំនាញពាក់ព័ន្ធបានប្រជុំផ្សព្វផ្សាយដល់បងប្អូនជាអាជីវករ ពាណិជ្ជករ មុនថ្ងៃបុណ្យឈានចូលមកដល់ដោយបានសង្កត់ធ្ងន់តាមពាក្យស្លោក «ទីក្រុងស្អាត រមណីយដ្ឋានស្អាត សេវាសមរម្យ» ដែលអាចទាក់ទងទៅនឹងអារម្មណ៍របស់ភ្ញៀវទេសចរដែលគេបានមកកម្សាន្តម្តងហើយចង់មកកម្សាន្តម្តងទៀត ។
យ៉ាងណាក៏ដោយ ភ្ញៀវទេសចរជាតិ-អន្តរជាតិ ដែលទៅកម្សាន្តនៅតំបន់ឆ្នេរអូរឈើទាល បានរិះគន់ទៅលើអាជ្ញាធរក្រុង-ខេត្ត និងមន្ទីរជំនាញពាក់ព័ន្ធថា បណ្តែតបណ្តោយឱ្យតូបអាជីវករលក់ដូរ តាមឆ្នេរមួយចំនួនរាប់បញ្ចូលទាំងសណ្ឋាគារ ផ្ទះសំណាក់ មួយចំនួនផងដែរ បង្ហូរទឹកស្អុយចូលទៅក្នុងសមុទ្រ បណ្តាលឱ្យទឹកសមុទ្រប្រែពណ៌ជាល្អក់ និងមានក្លិនស្អុយថែមទៀតផង ដែលធ្វើឱ្យប៉ះពាល់យ៉ាងធ្ងន់ធ្ងរ ដល់ភ្ញៀវទេសចរជាតិ-អន្តរជាតិដែលនាំគ្នាចុះមុជទឹកនៅឆ្នេរអូរឈើទាលនាឱកាសបុណ្យខាងលើនេះ ។
ប្រភពខាងលើបានបន្តទៀតថា កន្លងមកឆ្នេរសមុទ្រខេត្តព្រះសីហនុត្រូវបានដាក់បញ្ចូលជាសមាជិកក្លិបឆ្នេរដ៏ស្រស់ស្អាតជាងគេនៅលើពិភពលោក និងបានប្រសិទ្ធនាមថាជា «តារារះនាទិសនិរតី» ។ ប៉ុន្ដែនាឱកាសបុណ្យខាងលើនេះ ខណៈដែលពួកគាត់មកកម្សាន្តនៅខេត្តព្រះសីហនុ បានឃើញផ្ទាល់ភ្នែកពីទឹកសមុទ្របែរជាប្រែពណ៌ល្អក់ និងមានក្លិនស្អុយគួរឱ្យខ្ពើមទៅវិញ ដោយសារតែការបង្ហូរទឹកកខ្វក់ចូលពីតូបអាជីវករលក់ដូរ និងសណ្ឋាគារខ្លះដូចបានរៀបរាប់ខាងលើ ។
មន្ត្រីសាលាខេត្តមួយរូបសុំមិនបញ្ចេញឈ្មោះបានឱ្យដឹងថា គណៈកម្មការត្រួតពិនិត្យតំបន់ឆ្នេរខេត្តព្រះសីហនុនាពេលកន្លងមកនេះ បានរកឃើញសណ្ឋាគារ និង ភោជនីយដ្ឋានចំនួន៦កន្លែង ដែលបានលួចបង្ហូរទឹកស្អុយចូលទៅក្នុងសមុទ្រ ។ កាលពីថ្ងៃទី៨ ឧសភា គណៈកម្មការខាងលើបានចេញលិខិតជូនដំណឹងមួយជូនដល់ម្ចាស់សណ្ឋាគារនិង ភោជនីយដ្ឋានទាំង៦កន្លែងខាងលើ ដោយទុករយៈពេល១ខែ តម្រូវឱ្យរៀបចំប្រព័ន្ធអាងស្តុកចម្រោះទឹកស្អុយឱ្យបានត្រឹមត្រូវមុននឹងបង្ហូរចូលទៅសមុទ្រ ។ ម្ចាស់សណ្ឋាគារ ភោជនីយដ្ឋានទាំងនោះត្រូវតែយករថយន្តបូមស្តារអាងចៀសវាងការបង្ហូរទឹកស្អុយទម្លាក់ចូលទៅសមុទ្របន្តទៀត ។
លោក ឈិត សុខុន អភិបាលខេត្ត ដែលដឹកនាំគណៈកម្មការត្រួតពិនិត្យតំបន់ឆ្នេរ កាលពីព្រឹកថ្ងៃទី១៤ ឧសភា បានមានប្រសាសន៍ឱ្យដឹងថា មុនពេលទិវាបុណ្យជាតិធំៗឈានចូលមកដល់ អាជ្ញាធរតែងតែបង្កើតគណៈកម្មការ ចុះត្រួតពិនិត្យ និងបានយករថយន្តបូមស្តារអាងស្តុកទឹកកខ្វក់ដើម្បីការពារការកកស្ទះលូបណ្តាលឱ្យទឹកកខ្វក់ហូរធ្លាក់ចូលទៅក្នុងសមុទ្រ ។
លោកអភិបាលខេត្តបានបន្តទៀតថា បើទោះបីជាអាជ្ញាធរបានប្រឹងប្រែងយ៉ាងណាក្តី ក៏នៅតែមានការលួចបង្ហូរទឹកកខ្វក់ពីម្ចាស់តូបលក់ដូរទាំងនោះចូលទៅក្នុងសមុទ្រដែរ ។ លោកបន្ថែមទៀតថា នៅពេលណាសមត្ថកិច្ចជំនាញ ឬអាជ្ញាធររកឃើញម្ចាស់តូប ឬម្ចាស់សណ្ឋាគារណាមួយដែលលួចបង្ហូរទឹកស្អុយចូលទៅក្នុងសមុទ្រ សមត្ថកិច្ចជំនាញ នឹងត្រូវធ្វើកិច្ចសន្យា ឬផាកពិន័យ និងឈានដល់បិទអាជីវកម្មថែមទៀតផង ។ ដោយឡែក លោកប្រធានមន្ទីរបរិស្ថានខេត្ត មិនអាចស្វែងរកការបំភ្លឺជុំវិញការលើកឡើងរបស់ភ្ញៀវទេសចរខាងលើបានទេ នៅថ្ងៃទី១៥ ឧសភា ៕
ចែករំលែកព័តមាននេះ