រាជធានីភ្នំពេញ ៖ ខណៈដែលពិធីបុណ្យអ៊ុំទូកអកអំបុកសំពះព្រះខែកាន់តែជិតមកដល់នៅពេលខាងមុខនេះ រដ្ឋមន្ដ្រីក្រសួងមហាផ្ទៃបានធ្វើការអំពាវនាវឲ្យក្រសួងពាក់ព័ន្ធ អាជ្ញាធរថ្នាក់ក្រោមជាតិ និងប្រជាពលរដ្ឋបន្តចូលរួមទប់ស្កាត់ការចម្លងជំងឺកូវីដ-១៩ នៅក្នុងសហគមន៍នាឱកាសពិធីបុណ្យអុំទូកបណ្ដែតប្រទីបសំពះព្រះខែ និងអកអំបុកនៅតាម ភូមិ-ឃុំ និងនៅទីវត្តអារ៉ាម ។
ទោះបីជារាជរដ្ឋាភិបាលប្រកាសមិនមានពិធីអ៊ុំទូក នៅរាជធានីភ្នំពេញក្តី យោងតាមសេចក្ដីណែនាំរបស់ក្រសួងសុខាភិបាល កាលពីពេលថ្មីៗនេះ ឯកឧត្តម ម៉ម ប៊ុនហេង រដ្ឋមន្ត្រី ក្រសួងសុខាភិបាលបានឲ្យដឹងថា ក្រសួងសុខាភិបាល សូមរំលឹកជូនថា ស្ថានភាព នៃការចម្លងនៃវីរុសកូវីដ-១៩ នៅបណ្ដាប្រទេសលើសកលលោក និងនៅក្នុងតំបន់មិនទាន់មានការធូរស្បើយនៅឡើយទេ ឯកំណើននៃការចម្លងវីរុសកូវីដ-១៩ និងការស្លាប់ដោយសារជំងឺនេះក៏នៅតែបន្តមាននៅឡើយដែរ បើទោះបីជាប្រទេសកម្ពុជាមិនទាន់មានការចម្លងជំងឺកូវីដ-១៩ នៅក្នុងសហគមន៍ក៏ដោយ ក៏ហានិភ័យនៃការចម្លងវីរុសដ៏កាចសាហាវនេះ នៅតែមាន ហើយការចម្លងអាចកើតមានឡើងគ្រប់ពេលវេលាគ្រប់កាលទេសៈ និងគ្រប់ទីកន្លែង ។
ឯកឧត្តមរដ្ឋមន្ត្រីបានបញ្ជាក់ថា «ដូច្នេះក្រសួងសុខាភិបាល សូមធ្វើការក្រើនរំលឹក និងអំពាវនាវសាជាថ្មីជូនដល់សាធារណជន ក្រសួងពាក់ព័ន្ធ អាជ្ញាធរ ថ្នាក់ក្រោមជាតិ និងបងប្អូនប្រជាពលរដ្ឋទាំងអស់ បន្តចូលរួមទប់ស្កាត់ការចម្លងវីរុសកូវីដ-១៩ នៅក្នុងសហគមន៍យើងដោយទាំងអស់គ្នា ត្រូវតែបន្តអនុវត្តតាមការណែនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងការណែនាំរបស់ក្រសួងសុខាភិបាល ដែលបានធ្វើជារឿយៗ» ។
ឯកឧត្តមបន្តថាដូច្នេះ ហើយនៅក្នុងឱកាសនេះ ប្រសិនបើបងប្អូនប្រជាពលរដ្ឋ នៅតាមភូមិ-ឃុំ មានរៀបចំពិធីអបអរសាទរព្រះរាជពិធីអុំទូក បណ្ដែតប្រទីប សំពះព្រះខែ និង អកអំបុក ដែលនឹងប្រព្រឹត្តទៅចាប់ពីថ្ងៃទី៣០ ខែតុលា ឆ្នាំ២០២០ ដល់ថ្ងៃទី១ ខែវិច្ឆិកា ឆ្នាំ២ ០២០ ខាងមុខនេះ ក្រសួងសូមណែនាំដល់បងប្អូនប្រជាពលរដ្ឋ មិនត្រូវមានការជួបជុំគ្នាក្នុ ងទ្រង់ទ្រាយធំឡើយ ហើយត្រូវចាត់ចែងរៀបចំការប្រណាំងទូក បណ្ដែតប្រទីប សំពះព្រះខែ និងអកអំបុក ទៅតាមភូមិ-ឃុំ វត្តអារ៉ាម (មិនត្រូវធ្វើនៅថ្នាក់ខេត្តឡើយ ដែលបង្កឱ្យមានការប្រមូលផ្តុំគ្នាច្រើនពេក)»។
ជាមួយគ្នានោះដែរឯកឧត្តមរដ្ឋមន្ត្រីក៏បានណែនាំថាទៅតាមស្ថានភាពជាក់ស្តែង និងទីតាំងដែលអាចធ្វើបានតែប៉ុណ្ណោះ ដោយចាំបាច់ត្រូវធ្វើក្នុងទ្រង់ទ្រាយតូចៗ ដែលចំណុះ ទូកនីមួយៗ មិនឱ្យលើសពី១០នាក់ និងមិនឱ្យលើសពី៦ទូក ក្នុងមួយពិធីហើយមិ នឱ្យលើសពី៦០នាក់ សម្រាប់អ្នកចូលទស្សនា ព្រមទាំងត្រូវឱ្យមានគម្លាត សុវត្ថិភាពបុគ្គលយ៉ាងតិច ១ម៉ែត្រកន្លះ។
សូមជម្រាបថា ថ្វីត្បិតតែឆ្នាំ២០២០នេះ កម្ពុជាមិនមានប្រារព្ធ ព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នៅរាជធានីភ្នំពេញក៏ដោយ ក៏ប៉ុន្តែតាមការសង្កេតឃើញថា អាចមានក្រុមប្រជាពលរដ្ឋខ្លះ មានរៀបចំការប្រណាំងទូក បណ្ដែតប្រទីប អកអំបុក និងសំពះព្រះខែ ដោយក្រុមតូចៗរបស់គាត់នៅតាមភូមិ-ឃុំ និងនៅតាមទីវត្តអារ៉ាម ឬនៅតាម ផ្ទះសម្បែង ដែលតម្រូវឲ្យមានការយកចិត្តទុកដាក់យ៉ាងហ្មត់ចត់ ពីអាជ្ញាធរមូលដ្ឋាន និងក្រុមអ្នករៀបចំពិធីនេះ ក្នុងការធានាមិនឱ្យមានការចម្លងវីរុសកូវីដ-១៩ ចូលក្នុងសហគមន៍៕
ចែករំលែកព័តមាននេះ