ខេត្តកណ្ដាល ៖ ដោយសារឥទ្ធិពលសុរាលាយឡំជាមួយនឹងល្បែងស៊ីសង ធ្វើឲ្យកើតជា
អំពើហិង្សា ។ ជាក់ស្តែង បុរសម្នាក់ខឹងប្រពន្ធទៅលេងបៀនៅផ្ទះគេ លុះពេលផឹកស្រាស្រវឹងជោកជាំក៏ទៅស្រែកជេរប្រមាថ និងវាយម្ចាស់ផ្ទះទៀត តែត្រូវម្ចាស់ផ្ទះវាយតបតវិញបណ្តាលឲ្យរងរបួស ។ ការវាយតប់គ្នានេះ សមត្ថកិច្ចក៏បានឃាត់ខ្លួនម្ចាស់ផ្ទះផងដែរ។ហេតុការណ៍នេះ បានកើតឡើងកាលពីថ្ងៃទី២៥ ខែតុលា ឆ្នាំ២០២០ វេលាម៉ោងប្រមាណ៨និង៣០នាទីយប់ នៅភូមិត្រពាំងស្មាច់ ឃុំម្កាក់ ស្រុកអង្គស្នួល ។
បុរសដែលត្រូវម្ចាស់ផ្ទះវាយឲ្យរបួសនេះឈ្មោះ នួន វ៉ាន់ អាយុ៣៨ឆ្នាំ មុខរបរលក់ដូរ រស់នៅក្នុងភូមិ ឃុំ ខាងលើ ។ ចំណែកម្ចាស់ផ្ទះឈ្មោះ ឃុត ភារម្យ ភេទប្រុស អាយុ៤០ឆ្នាំ មុខរបរលក់ដូរដូចគ្នា ។
មន្ត្រីនគរបាលស្រុកអង្គស្នួលបានឱ្យដឹងថា នៅមុនពេលកើតហេតុ ប្រពន្ធរបស់បុរសខាងលើ ឈ្មោះ សុខ ធឿន បានទៅអង្គុយលេងបៀនៅផ្ទះរបស់ឈ្មោះ ឃុត ភារម្យ ។ លុះនៅម៉ោងជាង៨យប់ ម្ចាស់ផ្ទះឈ្មោះ ឃុត ភារម្យ ឃើញឈ្មោះ នួន វ៉ាន់ ស្ថិតក្នុងភាពស្រវឹងស្រា ហើយមកជេរប្រមាថនិងវាយលើប្រពន្ធឈ្មោះ សុខ ធឿន ដល់ផ្ទះរបស់ខ្លួន ក៏និយាយថា បើវាយគ្នាទៅវាយនៅផ្ទះទៅ កុំមកវាយនៅផ្ទះខ្ញុំ ។
ខណៈនោះ ឈ្មោះ នួន វ៉ាន់ ឆ្លើយថា ឯងកុំចេះដឹង ហើយបានយកកៅអីជ័រវាយឈ្មោះ ឃុត ភារម្យ ជាម្ចាស់ផ្ទះមុន តែម្ចាស់ផ្ទះគេចផុត ហើយទាញកៅអីជ័រវាយវិញបណ្ដាលឲ្យបែកក្បាលដេរជាច្រើនថ្នេរតែម្ដង ។ ចំពោះករណីនេះ សមត្ថកិច្ចបានចាត់ការតាមនីតិវិធី ៕
ចែករំលែកព័តមាននេះ