រាជធានីភ្នំពេញ ៖ រថយន្តជនជាតិចិន១គ្រឿងម៉ាកម៉ែកសឺដេស កំពុងតែបើកបរសុខៗស្រាប់តែឆ្លងចរន្តខ្សែភ្លើងឆេះតែម្តង បណ្ដាលឲ្យម្ចាស់រថយន្តបើកទ្វារចុះ រួចរត់ទៅហៅឱ្យគេឯងឱ្យជួយ ផ្អើលអស់ប្រជាពលរដ្ឋ និងសមត្ថកិច្ច នាំគ្នាយកបំពង់ពន្លត់អគ្គិភ័យមកបាញ់ពន្លត់រលត់ភ្លាមៗ បង្កឱ្យមានការភ្ញាក់ផ្អើលកាលពីម៉ោង៦និង៣០នាទីយប់ ថ្ងៃទី២៣ ខែតុលា ឆ្នាំ២០២០ នៅតាមបណ្ដោយផ្លូវសហព័ន្ធរុស្ស៊ីទល់មុខផ្សារសែនជូរី ស្ថិតក្នុងសង្កាត់កាកាបទី១ ខណ្ឌពោធិ៍សែន ។
រថយន្តរងគ្រោះខាងលើម៉ាក ម៉ែកសឺដែស ពណ៌ទឹកសមុទ្រ ពាក់ស្លាកលេខភ្នំពេញ 2G-4023 បើកបរក្នុងទិសដៅពីកើតទៅលិច ក្នុងល្បឿនមធ្យម។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញរថយន្តរងគ្រោះខាងលើបើកបរដោយជនជាតិចិន ចេញពីកន្លែងធ្វើការនៅម្តុំអេដវូត ក្នុងគោលបំណងទៅផ្ទះវិញនៅខណ្ឌកំបូល ក្នុងទិសដៅពីកើតទៅលិច លុះមកដល់ចំណុចកើតហេតុ ទល់មុខនឹងផ្សារស៊ិនជូរី ក៏ស្រាប់តែឆ្លងចរន្តខ្សែភ្លើង បណ្ដាលឲ្យឆាបឆេះហុយផ្សែងទ្រលោមតែម្តង ។
ប្រភពដដែលបន្តថា ភ្លាមៗនោះ អ្នកបើករថយន្តបានបើកទ្វារចុះ រួចរត់ទៅហៅឱ្យគេឯងឱ្យជួយ ទើបបង្កឱ្យមានការភ្ញាក់ផ្អើលដល់ប្រជាពលរដ្ឋ ព្រមទាំងសមត្ថកិច្ចបានទាក់ទងហៅរថយន្តពន្លត់អគ្គិភ័យឱ្យមកជួយអន្តរាគមន៍។
ប្រភពដដែលបន្តទៀតថា ប៉ុន្តែរថយន្តពន្លត់អគ្គិភ័យមិនទាន់មកដល់ផង ក៏ត្រូវបានប្រជាពលរដ្ឋដែលនៅជិតកន្លែងកើតហេតុនោះ ឃើញហេតុការណ៍ក៏បាននាំគ្នាយកបំពង់ពន្លត់អគ្គិភ័យមកបាញ់រលត់ទៅវិញ ចំណែករថយន្តពន្លត់អគ្គិភ័យក៏ត្រឡប់ទៅគោលដៅវិញផងដែរ។ រីឯរថយន្តរងគ្រោះវិញ ក្រោយពេលកើតហេតុ បើកមិនឆេះ ទៅមុខមិនកើតដែរ បន្ទាប់មកម្ចាស់រថយន្តក៏បានទាក់ទងហៅរថយន្ត១គ្រឿងទៀត មកសណ្តោងយកទៅជួសជុល ។
ក្រោយពេលកើតហេតុ ម្ចាស់រថយន្តរងគ្រោះបានហៅរថយន្តមួយគ្រឿងទៀតមកអូសចេញពីកន្លែងកើតហេតុយកទៅជួសជុលខ្លួនឯង ៕
ចែករំលែកព័តមាននេះ