គាត់លោតចេញស្ទើរមិនទាន់ ទឹកហូរនាំយកផ្ទះទៅបាត់ហើយ

ថ្ងៃទី ២៤ ខែ តុលា ឆ្នាំ ២០២០
ម៉ោង ១០:០៦
នីយ៉ា

ខេត្តប៉ៃលិន ៖ ម្តាយក្មេកនិងកូនប្រសាប្រុសអង្គុយជូតទឹកភ្នែកដែលកំពុងហូរទាំង២នាក់ ដោយមិនដឹងថា គិតយ៉ាងណានោះឡើយ ព្រោះនឹកស្តាយស្រណោះដល់ផ្ទះ សម្បែងរបស់ខ្លួនដែលធ្លាប់ស្នាក់នៅជាទ្រនំសុខសាន្តជួបជុំក្រុមគ្រួសារ ត្រូវជំនន់ទឹកភ្លៀងឆក់យក ដោយរសាត់អណ្តែតទាំងសម្ភារផ្សេងៗទៀតទៅតាមទឹកអស់រលីងគ្មានសេសសល់អ្វីឡើយ និងបានអណ្តែតទៅកឿងនឹងវាលចម្ការចម្ងាយជាង២០០ម៉ែត្រពីភូមិ ។

ទាំង២នាក់ម្តាយក្មេកនិងកូនប្រសាប្រុសនេះ បានរៀបរាប់ពីការបាត់បង់ផ្ទះ២ខ្នងរបស់
ពួកគាត់ កាលពីព្រឹកថ្ងៃទី២១ ខែតុលា ឆ្នាំ២០២០នៅភូមិដីស ឃុំស្ទឹងត្រង់ ស្រុកសាលាក្រៅ ។ ពួកគាត់និយាយថា ផ្ទះទាំង២ខ្នងបានត្រូវទឹកហូរកួចនាំយកទៅកាលពីវេលាម៉ោងប្រមាណ៨និង៣០នាទីព្រឹកថ្ងៃទី១៥ ខែតុលា ។ម្ចាស់ផ្ទះទាំង២ខ្នងដែលត្រូវទឹក ជំនន់ហូរកួចយកផ្ទះទៅបាត់នេះ ម្តាយក្មេកឈ្មោះ ជា យ៉ានអាយុ៥៩ឆ្នាំ ប្តីឈ្មោះ ដើប ថា អាយុ៦០ឆ្នាំ មានកូន៣នាក់ ។ ចំណែកកូនប្រសាប្រុសឈ្មោះ យឿង រាត្រី អាយុ៣៣ឆ្នាំ ប្រពន្ធឈ្មោះ ដើប សីហា មានកូនស្រីតូចម្នាក់ ។

ពួកគាត់ទាំង២នាក់ដែលជាម្តាយក្មេកនិងកូនប្រសា បានរៀបរាប់ទាំងទឹកភ្នែកប្រាប់ភ្នាក់ងារព័ត៌មានឱ្យដឹងថា ដោយសារភ្លៀងធ្លាក់ខ្លាំងអស់រយ:ពេលជាច្រើនថ្ងៃ និងតាំងពីយប់រហូតដល់ព្រឹកកាន់តែខ្លាំងឡើងៗនោះ បណ្តាលឱ្យក្លាយទៅជាជំនន់ទឹក ភ្លៀងហូរចាក់ពេញចម្ការ និងហូរកាត់ផ្លូវកម្ពស់លិចក្បាលមនុស្សចាស់ ហើយក៏ទាញយកផ្ទះរបស់ពួកគាត់រសាត់អណ្តែតតាមទឹកហូរអស់ទាំង២ខ្នងតែម្តង ។ ពេលនោះ ពួកគាត់នាំគ្នារត់យកតែអាយ៉ូសប៉ុណ្ណោះ ឯអ្វីៗនៅលើផ្ទះបានហូរទៅទាំងអស់ ។

ពេលនោះពួកគាត់មានការភ័យតក់ស្លុតយ៉ាងខ្លាំង ស្ទើរតែចាប់កូនចាប់ចៅនាំយកទៅទីទួលសុវត្ថិភាពស្ទើរតែមិនទាន់ ព្រោះទឹកហូរបុកខ្លាំងពេក ។ ពួកគាត់ក៏មិនអាចចាប់យកចានឆ្នាំង ឬសម្លៀកបំពាក់ មុងភួយ បានសូម្បីតែបន្តិចឡើយពោលគឺរសាត់ទៅតាមទឹកជាមួយផ្ទះអស់រលីងតែម្តង ហើយពេលនេះពួកគាត់បានសុំផ្ទះអ្នកភូមិស្នាក់នៅជាបណ្តោះអាសន្ន រង់ចាំសាងសង់ផ្ទះសាជាថ្មីឡើងវិញ ។

ក្រោយពីទឹកជំនន់ ខាងសាខាកាកបាទក្រហមកម្ពុជាខេត្ត ដឹកនាំដោយលោកជំទាវ បាន ស្រីមុំតំណាងរាស្ត្រមណ្ឌលប៉ៃលិន និងក្រុមការងារ បាននាំយកអំណោយជាសម្ភារ មុងភួយ សម្លៀកបំពាក់ និងលុយកាក់មកចែកជូនពួកគាត់ ជាពិសេសម្ហូបអាហារ មានចំនួន៣ដង ។ពេលនេះទៀត ខាងតំណាងរាស្ត្រមណ្ឌលប៉ៃលិន មានគម្រោងសាងសង់ផ្ទះឱ្យពួកគាត់ទាំងពីរនាក់ម្តាយនិងកូនឡើងវិញផងដែរ តែមិនទាន់មានដីផ្ទាល់ខ្លួន ព្រោះដីកន្លែងដែលទឹកលិចលង់ បានប្រគល់ជូនអាជ្ញាធរខេត្តយកធ្វើផ្លូវទៅហើយ ៕