ខេត្តកំពង់ឆ្នាំង ៖ បុរសម្នាក់បានបាត់បង់ជីវិតនៅនឹងកន្លែងកើតហេតុ បន្ទាប់ពីធ្លាក់ពីលើចុងត្នោត កាលពីម៉ោង7និង30នាទីព្រឹក ថ្ងៃទី 23 ខែតុលា ឆ្នាំ2020 ស្ថិតនៅភូមិថ្មី…
ខេត្តកំពង់ឆ្នាំង ៖ បុរសម្នាក់បានបាត់បង់ជីវិតនៅនឹងកន្លែងកើតហេតុ បន្ទាប់ពីធ្លាក់ពីលើចុងត្នោត កាលពីម៉ោង7និង30នាទីព្រឹក ថ្ងៃទី 23 ខែតុលា ឆ្នាំ2020 ស្ថិតនៅភូមិថ្មី ឃុំចោងម៉ោង ស្រុកទឹកផុស ខណៈពេលរូបគាត់កំពុងតែដើរលើស្នួរសម្រាប់ឆ្លងទៅយកទឹកត្នោតដូចសព្វដងនោះ ក៏ស្រាប់តែបាក់ធ្លាក់ចុះមកក្រោមតែម្តង ។
បើតាមលោក ខែម វិបុល អធិការនគរបាលស្រុកទឹកផុស បានឱ្យដឹងថា ជនរងគ្រោះមានឈ្មោះ ឆឹង សារឹម អាយុ47ឆ្នាំ មានមុខរបរធ្វើស្រែ និងឡើងត្នោតយកទឹកមករម្ងាស់ស្ករ មានប្រពន្ធឈ្មោះ ប៉ែន សារឿន អាយុ48ឆ្នាំ និងកូនចំនួន4នាក់ (ក្នុងនោះស្រី2 និងប្រុស2)។
លោកអធិការនគរបាលស្រុកទឹកផុស បានបន្តថា មុនពេលកើតហេតុ បុរសរងគ្រោះដែលមានមុខរបរធ្វើស្រែ និងឡើងដើមត្នោតរូបនេះ បានទៅឡើងដើមត្នោតនៅខាងក្រោយភូមិ ដូចសព្វដង ប៉ុន្តែចៃដន្យអាក្រក់ ខណៈពេលដែលរូបគាត់ឡើងតោងឡើងបង្អោង រួចដើរតាមស្នួរឆ្លងពីដើមត្នោតមួយទៅដើមត្នោតមួយទៀត ដើម្បីយកទឹកត្នោតនោះ ក៏ស្រាប់តែស្នួរដែលធ្វើអំពីដើមខ្លុងត្បែង បានបាក់ បណ្តាលធ្លាក់បុរសរងគ្រោះពីលើចុះមកដីបាត់បង់ជីវិតភ្លាមៗមួយរំពេចគួរឲ្យអាណោចអាធ័មបំផុត ។ ចំណែកដើមត្នោតដែលបានដាក់ស្នួរ បណ្តាលឱ្យធ្លាក់ជនរងគ្រោះមកដីនោះ គឺមានកម្ពស់ប្រមាណ១០ម៉ែត្រ។
ក្រោយពេលកើតហេតុ លោកក៏បានបញ្ជូនកម្លាំងរបស់នគរបាលស្រុក ទៅពិនិត្យ និងធ្វើកោសល្យវិច័យនៅកន្លែងកើតហេតុ ឃើញថា ជនរងគ្រោះពិតជាបាត់បង់ជីវិតដោយសារតែឡើងត្នោត ហើយបាក់ស្នួរធ្លាក់ចុះមកដីពិតប្រាកដមែន ។
ក្រោយពីពិនិត្យធ្វើកោសល្យវិច្ច័យរួចហើយ សមត្ថកិច្ចក៏បានប្រគល់សពជនរងគ្រោះទៅក្រុមគ្រួសារធ្វើបុណ្យតាមប្រពៃណី ។
សមត្ថកិច្ចនគរបាលបានបញ្ជាក់ថា ស្នួរដែលជនរងគ្រោះនោះដើរឆ្លងពីដើមមួយទៅដើមមួយទៀតនោះ គឺជនរងគ្រោះដើររាល់ថ្ងៃតែមិនអីឡើយ ប៉ុន្តែដោយសារតែយូរថ្ងៃខែ ទើបធ្វើឱ្យដើមខ្លុងត្បែង ដែលធ្វើជាស្នួរនោះបានពុកផុយ បណ្តាលឱ្យបាក់បែបនេះតែម្តង។ ហេតុនេះហើយ អ្នកប្រកបរបរឡើងត្នោត គួរប្រុងប្រយ័ត្ន និងប្តូរស្នួរសម្រាប់ដើររសួរឆ្លងពីដើមមួយទៅដើមមួយឱ្យបានញឹកញាប់ ចៀសវាងគ្រោះថ្នាក់ដូចករណីខាងលើ៕
ចែករំលែកព័តមាននេះ