រាជធានីភ្នំពេញ ៖ សហរដ្ឋអាមេរិកបានយល់ព្រមប្រគល់វត្ថុបុរាណដែលជា រូបចម្លាក់ ហនុមាន មកអោយកម្ពុជាវិញ បន្ទាប់ពីរូបចម្លាក់ ដ៍មានតម្លៃ នេហ ត្រូវបានគេដាក់តាំងអស់រយៈពេល៣៣ឆ្នាំ នាសារមន្ទីប្រទេសអាមេរិក ។ រូបចម្លាក់ ហនុមាន នៃប្រសាទកោះកេរ្តិ៍ ត្រូវបានគេបញ្ជូនពីសារមន្ទីរអាមេរិក មកដល់ព្រលានយន្តហោះអន្តរជាតិភ្នំពេញ កាលពីម៉ោង៨ និង៣០នាទី យប់ ថ្ងៃទី១០ ខែឧសភា ឆ្នាំ២០១៥ ។
ចំពោះរូបចម្លាក់ហនុមានខាងលើនេះ ជាវត្ថុបុរាណក្នុងសតវត្សរ៍ទី១០ ដែលត្រូវបានគេលួចចេញពីប្រាសាទកោះកេរ្តិ៍ ក្នុងខេត្តព្រះវិហារ ហើយក្រោយមក ឃើញដាក់តាំងនៅសារមន្ទីរ Cleveland Museumof Art ក្នុងសហរដ្ឋអាមេរិក ។ រូបហនុមាន ដែលបានបញ្ជូនមកដល់ភ្នំពេញវិញនេះ កឺមានដងខ្លួនជាមនុស្ស និងក្បាលស្វា អង្គុយលុតជង្គង់ ធ្វើពីថ្មភក់ មានកំពស់ ១១៦សង់ទីម៉ែត្រ និងទទឹង ៥៤សង់ទីម៉ែត្រ ។ រូបចម្លាក់ជាវត្ថុបុរាណរបស់កម្ពុជាទាំងនោះ ត្រូវបានលួចចេញពីក្នុងតំបន់ប្រាសាទកោះកេរ្តិ៍ ក្នុងសម័យសង្គ្រាម នាអំឡុងឆ្នាំ១៩៧០ នៅកម្ពុជា ។
គួររំលឹកថា កាលពីឆ្នាំ២០១៤ លោក សុខ អាន ឧបនាយករដ្ឋមន្ត្រីរដ្ឋមន្ត្រី ទទួលបន្ទុកទីស្តីការគណៈរដ្ឋមន្ត្រី តំណាងរាជរដ្ឋាភិបាលកម្ពុជា បានធ្វើដំណើរទៅកាន់ទីក្រុង New York សហរដ្ឋអាមេរិក ដើម្បីចុះហត្ថលេខា លើកិច្ចព្រមព្រៀងប្រគល់ និងទទួលយករូបចម្លាក់វត្ថុបុរាណរបស់កម្ពុជា ដែលសហរដ្ឋអាមេរិកប្រមូលបាន ពីការជួញដូរខុសច្បាប់ ។
គិតមកដល់ពេលនេះ យ៉ាងហោចណាស់ វត្ថុបុរាណចំនួន០៨ ត្រូវបានរាជរដ្ឋាភិបាលកម្ពុជា ទទួលបានមកវិញ ពីសារមន្ទីរចំនួន៤ នៅអាមេរិក ចាប់តាំងពីឆ្នាំ២០១៣ និងឆ្នាំ២០១៤ រួមមានសារមន្ទីរ The Metropolitan សារមន្ទីរ Christie’s សារមន្ទីរ Norton Simon និងសារមន្ទីរ Sotheby ។
យោងតាមមន្ត្រីជាន់ខ្ពស់របស់រាជរដ្ឋាភិបាលកម្ពុជាបានអោយដឹងថា ជុំវិញការទទួលយកវត្ថុបូរាណរូប ហនុមាន នេះ រាជរដ្ឋាភិបាលនឹងរៀបចំធ្វើសន្និសីទកាសែតមួយ នាថ្ងៃអង្គារ៍ ទី១២ ឧសភា ២០១៥ វេលាម៉ោង៩ នៅទីស្តីការគណៈរដ្ឋមន្ត្រី ៕
ចែករំលែកព័តមាននេះ