រាជធានីភ្នំពេញ៖ ចាត់ទុកជាដំណឹងដ៏ល្អមួយសម្រាប់អ្នកជំនាញនិងជំនួញ ក៏ដូចជាពលរដ្ឋខ្មែរក្រោយពីប្រមុខដឹកនាំរាជរដ្ឋាភិបាលបានឯកភាពពន្យារពេលលើការប្រមូលពន្ធលើចំណេញមូលធនដែលមានអត្រាពន្ធថេរ ២០% សម្រាប់ការលក់អចលនទ្រព្យ ដែលគ្រោងនឹងត្រូវចាប់ផ្ដើមអនុវត្តជាផ្លូវការនៅខែមករាឆ្នាំ២០២១ ខាងមុខនេះហើយទៅអនុវត្តនៅដើមឆ្នាំ ២០២០វិញ ។
យោងតាមសេចក្ដីជូនដំណឹងរបស់អគ្គនាយកដ្ឋានពន្ធដា នៅថ្ងៃទី២២ ខែតុលា ឆ្នាំ២០២០ បានឲ្យដឹងថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានឯកភាពឲ្យលើកពេលលើការប្រមូលពន្ធលើចំណេញមូលធន រយៈពេល១ឆ្នាំទៀត ហើយអាចអនុវត្តរហូតដល់ដើមឆ្នាំ២០២២ វិញ ។
អគ្គនាយកដ្ឋានពន្ធដាបានបញ្ជាក់ថា បានបញ្ជាក់ថាការសម្រេចពន្យាពេលនេះនេះ គឺ ដើម្បីទុកពេលវេលាគ្រប់គ្រាន់ដល់អ្នកជាប់ពន្ធ និងសាធារណជនទាំងអស់ ដើម្បីស្វែងយល់ឲ្យកាន់តែច្បាស់នូវបទប្បញ្ញត្ដិ ស្ដីពីពន្ធលើចំណេញមូលធន ព្រមទាំងជាការត្រៀមខ្លួនចូលរួមអនុវត្តពន្ធលើចំណេញមូលធននេះ ឲ្យមានភាពរលូន និងមានប្រសិទ្ធភាពខ្ពស់ ចាប់ពីថ្ងៃទី០១ ខែមករា ឆ្នាំ២០២២តទៅ។
សូមរម្លឹកថា កន្លងមក ក្រុមអ្នកជំនាញ និងអ្នកជំនួញអចលនទ្រព្យនិងសមាគមអ្នកអភិវឌ្ឍន៍លំនៅឋានកម្ពុជា ធ្លាប់បានស្នើសុំរដ្ឋាភិបាលពន្យាពេលការអនុវត្តនេះ ដោយបានបង្ហាញពីក្ដីបារម្ភខ្លាំងចំពោះការអនុវត្តគិតពន្ធថ្មីនេះ ដោយបានអះអាងថា វានឹងធ្វើឲ្យមានការបន្ថែមបន្ទុកចំណាយសម្រាប់ពលរដ្ឋពិសេសអ្នករកស៊ីក្នុងរបរនេះ ខណៈបញ្ហាកូវីដ-១៩ នៅមិនទាន់ផុតរលត់ទៅនៅឡើយទេ ៕
ចែករំលែកព័តមាននេះ