រាជធានីភ្នំពេញ ៖ គណៈប្រតិភូតំណាងគណបក្សប្រជាជនកម្ពុជាបានប្រាប់ទៅកាន់បណ្តាគណបក្សនយោបាយអន្តរជាតិថា គណបក្សប្រជាជនកម្ពុជាបាន និងកំពុងអភិវឌ្ឍ ព្រមទាំងអនុវត្តគំរោង «ភូមិតេជោ១០០» ។ ការលើកឡើងនេះ ខណៈលោកជំទាវ…
រាជធានីភ្នំពេញ ៖ គណៈប្រតិភូតំណាងគណបក្សប្រជាជនកម្ពុជាបានប្រាប់ទៅកាន់បណ្តាគណបក្សនយោបាយអន្តរជាតិថា គណបក្សប្រជាជនកម្ពុជាបាន និងកំពុងអភិវឌ្ឍ ព្រមទាំងអនុវត្តគំរោង «ភូមិតេជោ១០០» ។
ការលើកឡើងនេះ ខណៈលោកជំទាវ កិត្តិសង្គហបណ្ឌិត ឃួន សុដារី អញ្ជើញចូលរួមជាភ្ញៀវឥស្សរជនជាន់ខ្ពស់ ក្នុងវេទិកាអន្តរគណបក្សអន្តរជាតិនៃអង្គការសហប្រតិបត្តិការសៀងហៃ (SCO) ។ លោកជំទាវ ឃួន សុដារី សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា អនុប្រធានទី២ នៃរដ្ឋសភា និងជាអនុប្រធានគណៈកម្មាធិការអចិន្ត្រៃយ៍សន្និសីទអន្តរជាតិនៃបណ្តាគណបក្សនយោបាយនៅអាស៊ី (អាយកាប់-ICAPP) នៅរសៀលថ្ងៃទី២០ ខែតុលា ឆ្នាំ២០២០ នៅវិមានរដ្ឋសភា បានអញ្ជើញចូលរួមជាភ្ញៀវឥស្សរជនជាន់ខ្ពស់ក្នុងពិធីបើកវេទិកាអន្តរគណបក្សអន្តរជាតិ (Internal Inter-Party Forum SCO+) នៃអង្គការសហប្រតិបត្តិការសៀងហៃ(SCO+) តាមប្រព័ន្ធវីដេអូ ក្រោមប្រធានបទស្តីពី «ការធ្វើពាណិជ្ជកម្មសម្រាប់ប្រជាជន» ។
ការអញ្ជើញចូលរួមរបស់ប្រតិភូតំណាងគណបក្សប្រជាជនកម្ពុជានាពេលនេះ ធ្វើឡើងតបតាមការអញ្ជើញរបស់ម្ចាស់ផ្ទះ គណបក្សរួបរួមរុស្សី តាមរយៈឯកឧត្តម អង់ដ្រេ គ្លីម៉ៅ អគ្គលេខាធិការរង ក្រុមប្រឹក្សាទូទៅ គណបក្សរួបរួមរុស្សី និងជាអនុប្រធានអង្គការ ICAPP ។
សូមជម្រាបថា សហព័ន្ធរុស្សី ក្នុងនាមជាប្រធានប្តូរវេននៃអង្គការសហប្រតិបត្តិការសៀងហៃ (SCO) បានរៀបចំធ្វើជាម្ចាស់ផ្ទះនៃ វេទិកាអន្តរគណបក្សអន្តរជាតិ ក្រោមប្រធានបទស្តីពី «ការធ្វើពាណិជ្ជកម្មសម្រាប់ប្រជាជន» ដោយមានការចូលរួមពីថ្នាក់ដឹកនាំមកពីគណបក្សរួបរួមរុស្សី ថ្នាក់ដឹកនាំគណបក្សកាន់អំណាច និងតំណាងអ្នកវិនិយោគិនមកពី SCO ក្រុមប្រទេស BRICS (ប្រេស៊ីល រុស្សី ឥណ្ឌា ចិន និងអាហ្វ្រិកខាងត្បូង) និងសមាគមន៍រដ្ឋឯករាជ្យកុំម្មុនវែល (Commonwealth of Independent States-CIS) និងអ្នកសង្កេតការណ៍មកពីប្រទេសផ្សេងៗ តាមប្រព័ន្ធអ៊ីនធើណែត ពីថ្ងៃទី ២២-២៣ ខែតុលា ឆ្នាំ២០២០ ។
ក្នុងសុន្ទរកថារបស់ លោកជំទាវ ឃួន សុដារី បានសម្តែងនូវក្តីរីករាយ និងអបអរសាទរដល់គណបក្សរួបរួមរុស្សីដែលបានរៀបចំវេទិកាអន្តរគណបក្សយ៉ាងរហ័សទាន់ពេលវេលាដោយផ្តោតលើកិច្ចសហប្រតិបត្តិការ និងការកសាងភាពជាដៃគូក្នុងការឆ្លើយតបទៅនឹងការរាតត្បាតនៃ Covid-19 ។ លោកជំទាវ បានគូសបញ្ជាក់ថា« Covid-19 គឺជាបញ្ហាសកលដែលទាមទារឱ្យមានសាមគ្គីភាពគ្នាជាសកល និងដំណោះស្រាយរួម ។ ជាអកុសល ប្រទេសខ្លះបានកេងចំណេញនយោបាយទៅលើជំងឺរាតត្បាតនេះដោយសារផលប្រយោជន៍ និងភាពអាត្មានិយមតូចចង្អៀតរបស់ពួកគេ» ។
លោកជំទាវ បានបញ្ជាក់បន្ថែមថា ៖«នៅពេលដែលវិបត្តិសកលមានទំហំ និងទ្រង់ទ្រាយធំបែបនេះ វាចាំបាច់ខ្លាំងណាស់សម្រាប់យើងក្នុងជំរុញយុទ្ធនាការសកលរួមគ្នា ដើម្បីទប់ទល់នឹងឯកតោភាគីនិយម និងជាតិនិយមផ្តាច់មុខ បូករួមទាំងជាតិនិយមអំពីវ៉ាក់សាំង» ។ លោកជំទាវ បានលើកឡើងបន្តថា គណបក្សនយោបាយមានតួនាទីយ៉ាងសំខាន់ក្នុងការកំណត់នូវការប្តេជ្ញាចិត្តខ្ពស់ និងការទទួលខុសត្រូវខាងផ្នែកនយោបាយ សម្រាប់ការបង្កើតនូវរបៀបវារៈគោលនយោបាយ និងការប្រមូលធនធាន ដើម្បីដោះស្រាយវិបត្តិនៃជំងឺរាតត្បាតនេះ ។ ការធ្វើការសម្រេចចិត្តដោយផ្អែកលើវិទ្យាសាស្ត្រ និងទិន្នន័យ គឺមានសារៈសំខាន់ខ្លាំងណាស់ក្នុងការគ្រប់គ្រងវិបត្តិ ។
គណបក្សនយោបាយទាំងអស់ គឺមានសារៈសំខាន់ដូចជាភាគីពាក់ព័ន្ធដទៃជាសកល ដែលគួរពិចារណាលើចំណុចអាទិភាពរបស់ពួកគេដោយផ្តោតលើការកសាងស្តារឡើងវិញនូវផែនការមួយដែលមានភាពធន់មាំ និងបៃតង ព្រមជាមួយនឹងការស្តារសេដ្ឋកិច្ចឱ្យកាន់តែប្រសើរឡើងជាមួយអាទិភាពរបស់សង្គម។ ត្រង់ចំណុចនេះ លោកជំទាវ បានសង្កត់ធ្ងន់លើ «ការស្តារឡើងវិញប្រកបដោយភាពបៃតង» ដោយផ្តោតលើការបញ្ចូលធម្មជាតិទៅក្នុងគោលនយោបាយសេដ្ឋកិច្ច ។
ការងារថ្មីត្រូវបានបង្កើតឡើង ហើយនឹងត្រូវបានបង្កើតឡើងជាច្រើនទៀតនៅក្នុងថាមពលកកើតឡើងវិញ សេដ្ឋកិច្ចរាងជារង្វង់ និងបច្ចេកវិទ្យាបរិស្ថាន ។ លោកជំទាវ បានជម្រាបជូនពីស្ថានភាពរបស់កម្ពុជានៅក្នុងវេទិកានេះថា នៅប្រទេសកម្ពុជាបានអនុវត្តផែនការយុទ្ធសាស្ត្រជាតិ ស្តីពីកំណើនបៃតង (២០១៣-២០៣០) ដោយផ្តោតលើការប្រើប្រាស់ជានិរន្នលើធនធានធម្មជាតិ ប្រសិទ្ធភាពនៃថាមពល និរន្តរភាពបរិស្ថាន ការងារបៃតង បច្ចេកវិទ្យាបៃតង និងកំណែទំរង់សេដ្ឋកិច្ចដោយពិចារណាលើការលើកទឹកចិត្តបៃតង ដូចជាពន្ធដារបៃតង ហិរញ្ញវត្ថុបៃតង ឥណទានបៃតង មីក្រូហិរញ្ញវត្ថុ និងការវិនិយោគបៃតង ៕
ចែករំលែកព័តមាននេះ