ខេត្តសៀមរាប ៖ ករណីចាប់បុរសជាប្តីអត់ខាន់ស្លា ក្នុងករណីផ្ទុះអាវុធដែលបណ្តាលឱ្យជាប្រពន្ធរងរបួសធ្ងន់ គឺបានកើតឡើងស្ថិតផ្លូវជាតិលេខ៦ វេលាម៉ោង០២ និង៥០នាទីឈានចូលថ្ងៃទី២២ តុលា ស្ថិតក្នុងភូមិគោកចាស់ ឃុំស្រណាល ស្រុកក្រឡាញ់ ខេត្តសៀមរាប ហើយចាប់បាននៅវេលាម៉ោង៩និង៣០នាទីព្រឹកថ្ងៃដដែល ក្នុងភូមិសាស្ត្រស្រុកបរវេល ខេត្តបាត់ដំបង ។ សូមរំឹលឹកថា៖ លោកប្ដីបាញ់ប្រពន្ធនៅសៀមរាប ដណ្ដើមកូនជិះគេច ជាប់អន្ទាក់នៅស្រុកបវេល
បើតាមការរៀបរាប់ពីស្ត្រីរងគ្រោះជាប្រពន្ធបានឱ្យដឹងថា គាត់ត្រូវបានប្តី (ពុំបានរៀបការ) ហើយមានកូនស្រីម្នាក់អាយុ៩ខែ បានបាញ់ក្នុងរថយន្ត ត្រូវចំណុចលើសុដន់ ផ្នែកខាងឆ្វេង (បៀមគ្រាប់ជាប់ក្នុងសាច់) តែសំណាងល្អ ជនរងគ្រោះ(ស្ត្រី)មិនបាត់បង់ជីវិតទេ ហើយបានបើកទ្វារថយន្រត់ចេញក្រៅ ស្រែកឱ្យគេជួយ ។
ស្ត្រីរងគ្រោះបន្តថា គាត់និងប្តីមានកូនស្រីម្នាក់អាយុ៩ខែជាចំណងដៃ មិនទាន់រៀបការ។ ខណៈនោះកម្លាំងនគរបាល និងកម្លាំងប្រជាការពារ ដែលការពារសន្តិសុខសុវត្ថិភាពជូនសម្តេចតេជោ ហ៊ុន សែន ដែលឈរជើងនៅទីនោះក៏បានជួយសង្គ្រោះទាន់ពេលវេលា និងបានបញ្ជូនមកកាន់មន្ទីរពេទ្យបង្អែកខេត្តសៀមរាប ។ ខណៈនោះ សមត្ថកិច្ចស្រាវជ្រាវតាមចាប់ជនបង្ក ដើម្បីយកមកផ្តន្ទាទោសតាមច្បាប់។
ក្នុងនោះដែរ លោកបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប បានចុះទៅសួរសុខទុក្ខ និងរួមចំណែក ក្នុងការព្យាបាលជនរងគ្រោះ ហើយលោកបានឧបត្ថម្ភថវិកាចំនួន៥០០ដុល្លារអាមេរិច។លោកក៏សូមជូនពរឱ្យក្មួយស្រី រួចផុតពីគ្រោះថ្នាក់ដល់ អាយុជីវិត និងឆាប់បានជាសះស្បើយពីមុខរបួស។ក្នុងនោះ លោកបានអំពាវនាវដល់សមត្ថកិច្ច គ្រប់ជាន់ថ្នាក់ តាមចាប់ជនបង្ក (ជនសង្ស័យ) ឈ្មោះ ចាន់ ផល (ចាន់ ពៅ ) ឬ គុជ ផល្លី អាយុ ៥៧ឆ្នាំ មកផ្តន្ទាទោសតាមច្បាប់ ឲ្យខាងតែបាន។
ប្រភពបន្តថា មិនបានប៉ុន្មានម៉ោងផង កម្លាំងសមត្ថកិច្ចក៏បានតាមចាប់ខ្លួនជនបង្កបានជាក់ស្តែងនៅស្រុកបរវេល ខេត្តបាត់ដំបង។ ជុំវិញករណីនេះដែរ លោកឧត្តមសេនីយ៍ត្រី ភឹងចិន្តារ៉េត ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាបបានឲ្យដឹងថា ដោយមានកិច្ចសហការគ្នាបានល្អរវាងនគរបាលខេត្តសៀមរាបនិងតាមបណ្តារខេត្ត ជាពិសេសេខេត្តបាត់ដំបង ជនសង្ស័យដែលបាញ់ប្រពន្ធបណ្តាលឱ្យរបួសធ្ងន់នោះត្រូវបានកម្លាំងនគរបាលស្រុកបរវេលចាប់ខ្លួនបានហើយ និងកំពុងនាំខ្លួនមកកាន់ខេត្តសៀមរាប ដើម្បីសួរនាំតាមច្បាប់។ បច្ចុប្បន្នជនសង្ស័យត្រូវបានកម្លាំងជំនាញរៀបចំកសាងសំណុំរឿងបញ្ជូនខ្លួនទៅតុលាការខេត្ត ដើម្បីចាត់ការទៅតាមផ្លូវច្បាប់៕
ចែករំលែកព័តមាននេះ