រាជធានីភ្នំពេញ ៖ នាពេលកន្លងមក កីឡាកាយវប្បកម្ម មិនត្រូវបានគេដាក់បញ្ចូលនៅក្នុងការប្រកួតស៊ីហ្គេមនោះទេ ដោយកីឡាមួយនេះ ត្រូវបានគេបើកប្រកួតប្រជែងតែក្នុងក្របខណ្ឌឯកជន ក្រោមការរៀបចំរបស់ប្រទេសខ្លះដែលធ្វើជាម្ចាស់ផ្ទះប៉ុណ្ណោះ ។ ការប្រកួតនាពេលកន្លងមក ក៏ត្រូវគេចាត់ទុកថា មិនសូវមានភាពទូលំទូលាយនោះដែរ បើទោះជាកីឡានេះ មានការរីកចម្រើនច្រើនមកហើយក្ដី។
យ៉ាងណាក៏ដោយយោងតាមការបញ្ជាក់ សម្រាប់ស៊ីហ្គេមនៅឆ្នាំ២០២១ ខាងមុខ វៀតណាម ជាម្ចាស់ផ្ទះ បានដាក់បញ្ចូលកាយវប្បកម្មឱ្យក្លាយជាវិញ្ញាសាប្រកួតផ្លូវការ ទើបគេមើលឃើញថា អត្តពលិកនៅក្នុងវិស័យនេះទាំងអស់ចាប់ផ្ដើមមានទឹកមាត់លេប ស្របពេលដែលកម្ពុជា ក៏មានធនធានកីឡាផ្នែកកាយវប្បកម្មល្អៗ ដែលមរំពឹងថានឹងទទួលបានមេដាយនៅក្នុងការប្រកួតនោះ។
លោក វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) បានមានប្រសាសន៍ថា ប្រទេសកម្ពុជាមាន គោលដៅចង់ឈានជើងចូលចំណាត់ថ្នាក់លេខ៧ ក្នុងចំណោម១១ប្រទេស នៃការប្រកួតកីឡា SEA GAMES នៅប្រទេសវៀតណាម ។ លោកពិតជាបង្ហាញនូវការសាទរយ៉ាងខ្លាំង ដែលប្រទេសវៀតណាមសម្រេចដាក់បញ្ចូលកីឡាផ្នែកកាយវប្បកម្ម និងវ៉ូវីណាម ឱ្យក្លាយជាវិញ្ញាសាផ្លូវការ ដែលកីឡាទាំងពីរនេះសុទ្ធតែកម្ពុជា មានធនធានល្អៗអាចដណ្ដើមបានមេដាយ ។
លោកបន្តថា កីឡាវ៉ូវីណាមដ្បិតថា កម្ពុជាទើបមាននៅក្នុងប្រទេស តែកម្ពុជាក៏មានឥទ្ធិពល ដែរ ។ ដោយឡែក កីឡាកាយវប្បកម្ម ក៏កម្ពុជាមានធនធានល្អសម្រាប់ការដណ្ដើមបានមេដាយផងដែរ ដោយសារតែផ្អែកតាមកន្លងមក គឺកីឡាកាយវប្បកម្មរបស់កម្ពុជា មានឱកាសដណ្ដើមបានមេដាយរួចស្រេចទៅហើយ ។
ការដាក់បញ្ចូលកាយវប្បកម្មចូលក្នុងស៊ីហ្គេមនៅវៀតណាម មិនត្រឹមតែធ្វើឱ្យកីឡាមួយនេះ មានចរន្តនៅក្នុងស៊ីហ្គេមប៉ុណ្ណោះទេ តែក៏នឹងជួយឱ្យកម្ពុជា អាចចំណេញមេដាយជាងមុន សម្រាប់ស៊ីហ្គេមឆ្នាំក្រោយផងដែរ ។ ម្យ៉ាងមកពីកម្ពុជា សំបូរធនធានអ្នកមានសាច់ដុំល្អ ដែលសូម្បីតែប្រទេសមួយចំនួន ក៏ពិបាកមើលស្រាលនោះផង ទើបកម្ពុជាបង្ហាញការរំពឹងនៅពេលវៀតណាមសម្រេចយកវិញ្ញាសាកាយវប្បកម្មឱ្យក្លាយជាវិញ្ញាសាប្រកួតនៅស៊ីហ្គេមឆ្នាំ២០២១ ។ លោកថាកម្ពុជានឹងអាចរំកិលចំណាត់ថ្នាក់ ដោយផ្អែកថាការប្រកួតនៅហ្វីលីពីន ម៉ាឡេស៊ី និងសិង្ហបុរី យើងទទួលបានចំណាត់ថ្នាក់លេខ៨ជាប់ៗគ្នារួចស្រេចនោះ។
លោក វ៉ាត់ ចំរើន អគ្គលេខាធិការ NOCC បន្តថា ប្រសិនបើយើងទទួលបានចំណាត់ថ្នាក់លេខ៧ យើងនឹងសម្រុកសម្រាប់ការប្រកួតកីឡាស៊ីហ្គេមឆ្នាំ២០២៣នៅកម្ពុជាឲ្យឈរចំណាត់ថ្នាក់លេខ៦ ឬលេខ៥ ដែលជាក្ដីស្រមៃចង់បានរបស់យើង ។ ដូច្នេះប្រសិនជាយើងទទួលបានចំណាត់ថ្នាក់លេខ៧ ពីការប្រកួតកីឡាស៊ីហ្គាមនៅប្រទេសវៀតណាម ពិតមែនគឺជាសញ្ញាល្អបំផុតហើយ ។
ោក វ៉ាត់ ចំរើន បានបន្ថែមទៀតថា ម្ចាស់ផ្ទះវៀតណាមដាក់៣៦ប្រភេទកីឡាក្នុងការប្រកួត ។ ចំណែកកម្ពុជានឹងបញ្ជូន៣១ ប្រភេទកីឡាត្រៀមចូលរួមជាមួយប្រភេទកីឡា មានសក្ដានុពលដណ្ដើមមេដាយបានចំនួន១១ ប្រភេទរួមមាន កីឡាប៉េតង់ តេក្វាន់ដូ WT វ៉ូ វីណាម ចំបាប់ វាយកូនបាល់ វ៉ូស៊ូ ប្រដាល់សកល ប្រដាល់ Kick Boxing សីដក់ ប្រដាល់(គុនខ្មែរ) និងកីឡាកាយវប្បកម្ម ។
គួរបញ្ជាក់ផងដែរថា កីឡាកាយវប្បកម្ម និងវ៉ូវីណាម ជាប្រភេទកីឡាដែលអត្តពលិកកម្ពុជា អាចមានសមត្ថភាពដណ្ដើមមេដាយមាសក្នុងព្រឹត្តិការណ៍កីឡាស៊ីហ្គេមនៅប្រទេសវៀតណាមព្រោះទាំង២ប្រភេទកីឡាចេញប្រកួតលើឆាកអន្តរជាតិ តែងតែឈ្នះមេដាយមាសរហូត ។ ប្រភេទកីឡាអាចឈានដល់រកមេដាយរួមមាន កីឡាការ៉ាតេ កីឡារាំ កីឡាអុក Xiangqi និង បាល់បោះ៣ទល់៣នាក់ ៕
ចែករំលែកព័តមាននេះ